“জাতি অমনা জাতি অমগী মথক্তা, অদুগা নিংথৌ লৈবাক অমনা নিংথৌ লৈবাক অমগী মথক্তা লান হৌরক্কনি। মফম কয়াদা কন্না য়ুহারাবা, চাক্তাঙবা অমসুং শাথিবা লায়নাশিং থোক্কনি” হায়না যীশুনা হায়রম্মী। (লূক ২১:১০, ১১) হায়রিবা থৌদোকশিং অসি মতম অমত্তদা পুন্না থোক্লকপা উরবদি মদুনা “ঈশ্বরগী নিংথৌ লৈবাক নকশিল্লক্লে” হায়বগী খুদমনি। হায়রিবা থৌদোকশিং অসি তশেংনমক থোক্লব্রা অমসুং পৃথিবী পুম্বদা পাক শন্না উবা ফংলব্রা? মখাদা পীরিবা প্রমাণশিং অসি খন্নরগা য়েংসি।

১. লান

শোক ১৯১৪ দা মীওইবগী পুৱারীদা অমুক্তা থোকখিদ্রিবা লান অমা থোকখি। শোক ১৯১৪ দা পৃথিবী অসিদা অচৌবা অহোংবা লাকখি হায়না পুৱারী নৈনবশিংনা তত্তনা খঙহল্লি মরমদি, চহি অসিদা পৃথিবীগী অহানবা লানজাও হৌখি। লান অদুদা তেঙ্ক, নোংথক্তগী থাদবা বোম, অফবা মখলগী নোংমৈ, হূ চেনবা গ্যাস অমসুং অতোপ্পা মী শিবা য়াবা খুৎলাই কয়া ইহান হানবা ওইনা পাক শন্না শীজিন্নবা হৌখি। মদুগী মতুংদা পৃথিবীগী অনীশুবা লানজাও অমুক থোকখি। লান অদুদা ইহান হানবা ওইনা এটোম বোম শীজিন্নবা হৌখি। শোক ১৯১৪ দগী হৌরগা হৌজিক ফাওবা পৃথিবীগী তোঙান তোঙান্বা মফম কয়াদা লেপ্পা লৈতনা লান শোক্নরি অদুগা লানশিং অদুদা মীওই লাখ কয়াগী পুন্সি মাঙখ্রে।

২. য়ুহার হাবা

ব্রিটানিকা একাদেমিক্কি মতুংইন্না, “য়াম্না চাউনা অমাঙ অতা” থোকহনবা ঙম্বা অকনবা য়ুহার হাবা ১০০ রোম চহী খুদিংগী অদুমক থোকই হায়না খঙহল্লি। “শোক ১৯০০ দগী থম্লকপা রের্কোদকী মতুংইন্না, চহী খুদিংগী অচৌবা য়ুহার হাবা ১৬ লোম থোক্কনি হায়না ঐখোয়না পান্নৈ” হায়না আমেরিকাগী জিওলোজিকেল সর্ভেনা ফোঙদোকই। মীওই খরনদি য়ুহার হাবগী মশিং হেনগৎলকপা নত্তে, টেক্নোলোজিগী খুত্থাংদা মসিগী মরমদা হেন্না খঙবা ঙম্লকপদগী হেনগৎলকপা মানবনি হায়না ফোঙদোকই। মখোয়না অসুম্না হায়জরবসু অচৌবা য়ুহার হাবা কয়া থোকপদগী পৃথিবীদা হান্না থোকখিদ্রিবা মওংদা পাক শন্না অমাঙ অতা, অশি অনা কয়া থোকহল্লি হায়বসিদি চুম্লবা ৱাফম্নি।

 ৩. চাক্তাঙবা

লান, শেনজা থুমজা তৌবা, শেল থুমগী ফিভম শোকচিল্লকপা, লৌউ শীংউনবগী অফবা থৌরাং লৈতবনা মরম ওইরগা পৃথিবী শীনবা থুংনা চাক্তাঙবা থোকহল্লি। ৱর্ল্ড ফুদ প্রোগ্রামগী “২০১৮ গী চহীগী পাউদম” মতুংইন্না, “পৃথিবী পুম্বদা, মীওই কোতি ৮২ গা লাখ ১০ না চানবগী অৱাৎপা মাইয়োক্নরি অদুগা মখোয় অদুগী মনুংদা মীওই কোতি ১২ গা লাখ ৪০ না কা হেনবা ফিভম মাইয়োক্নরি” হায়না ফোঙদোকই । চাবা ৱাৎপনা মরম ওইরগা চহী খুদিংগী অঙাং লাখ ৩১ রোমগী পুন্সি মাঙহল্লি। শোক ২০১১দা পৃথিবী পুম্বদা শিখিবা অঙাংশিংগী মরক্তা চাদা ৪৫ দি চাবা ফংদবদগী ওইখি।

৪. লায়না লাইচৎ

ৱর্ল্ড হেল্ট ওর্গনাইজেসনগী চেফোং অমনা হায়: “২১ শুবা সতাব্দি অসিদা অচৌবা লায়না লাইচৎ কয়া থোক্লকখ্রে। হান্নগী লায়নাশিং—কোলেরা,প্লেগ অমসুং য়েলো ফিভর—অমুক হন্না শন্দোরক্লি অদুগা অনৌবা কয়া অমসু থোক্লক্লি—সার্স, পেন্দেমিক ইনফ্লুয়েনজা, মর্স, ইবোলা অমসুং জিকা।” কোভিদ-১৯ লায়চৎনা খ্বাইদগী অনৌবনি। সাইন্টিস অমসুং দোক্তরশিংনা লায়না লায়চৎশিংগী মরমদা হেন্না ফজনা খঙবা হেনগৎলক্লবসু লায়না খুদিংমক ফহনবা ঙম্বগী পাম্বৈদি মখোয়না পুথোকপা ঙমদে।

৫. পৃথিবী শীনবা থুংনা তৌরিবা পাউ শন্দোকপগী থবক

যীশুনা মাঙজৌননা হায়রম্বা খুদমদুগী শরুক অমা ওইনা ৱাফম অসিসু ফোঙদোক্লম্মী: “নিংথৌ লৈবাক্কী অফবা ৱাপাউ অসি জাতি পূম্নমক্তা সাক্ষী ওইননবা তাইবংপান অপূম্বদা শন্দোক্কনি; অদুগা অরোইবা মতম অদু লাক্কনি।” (মাত্থি ২৪:১৪) ঙসি তাইবংপানসিদা অচৌবা খুদোংচাদবা কয়া মাইয়োক্নজরবসু জাতি খুদিংমক্তগী মীওই লাখ মরীফু হেনবনা ঈশ্বরগী নিংথৌলৈবাক্কী নুংঙাইবা পাউ শন্দোক্লি। লোন ১,০০০গী মথক্তা তোঙান তোঙানবা লৈবাক ২৪০ দা মখোয়না হায়রিবা থবক অসি তৌরি। অসুম্না পাক শন্না পাউ শন্দোকপগী থবক তৌবা অসি মীওইবগী পুৱারীদা অমুক্তা থোকখিদ্রি।

যীশুনা থোক্কনি হায়রম্বা থৌদোকশিংদু ঙসি ঐখোয়গী মতমদা চপচানা থোকপা উরি। ৱাফম অসিদা ঐখোয়না পুক্নীং চঙবা করিগী দরকার ওইরিবনো? মরমদি যীশুনা অসুম্না হায়রম্মী: “নখোয়না পূম্নমক অসি থোকপা উবদা ঈশ্বরগী নিংথৌ লৈবাক নকশিল্লক্লে হায়বা খঙউ।”—লূক ২১:৩১.

বাইবলগী মতুংইন্না চহি পাবা অমসুং যীশুনা পীরম্বা খুদম অসি কুপ্না য়েংবা মতমদা, ঈশ্বরনা মহাক্কী নিংথৌলৈবাক অদু শোক ১৯১৪ দা স্বর্গদা লিংখৎখ্রে হায়বা খঙবা ঙম্মী। a মতম অদুদা মহাক্কী মচানুপা যীশু খৃষ্টবু মহাক্না নিংথৌ ওইনা হাপখি। (থাগৎ ঈশৈ ২:২, ৪, ৬-৯) ইকুই কুইদনা, ঈশ্বরগী নিংথৌলৈবাক্না পৃথিবীদা শাসন তৌবা হৌরগনি অমসুং মসিনা মীওইবগী লৈঙাক খুদিংমকপু লৌথোকখ্রগনি, অদুগা পৃথিবী অসি মীওইবশিংনা লোম্বা নাইদনা লৈনবগীদমক পারাদাইস ওইনা শেমগৎলগনি।

“নহাক্কী নিংথৌ লৈবাক লাকসনু। স্বর্গদা নহাক্কী নীংবা তৌবগুম্না মালেমদসু তৌসনু” হায়না যীশুনা ঈশ্বরদা হায়জখিবা ৱাফমসি ইকুই কুইদনা পৃথিবীদা থোক্লরগনি। (মাত্থি ৬:১০) অদু ওইরবদি, নিংথৌলৈবাক অসিনা শোক ১৯১৪ দগী শাসন তৌবা হৌখিবা মতম অদুদগী হৌজিক ফাওবা করি করি তৌরক্লিবগে? নিংথৌলৈবাক অসিনা মীওইবশিংগী মথক্তা মপুং ফানা শাসন তৌরক্লবা মতমদা করম্বা অহোংবশিং উবা ফংগনি?