ЭД НАР хүмүүсийг албадан ажиллуулж байна. Нэг ажилчныг ташуурдаж байгаа хүнийг хар даа! Энэ ажилчид бол Иаковын үр удам бөгөөд тэднийг израильчууд гэдэг. Харин тэднийг албадан ажиллуулж байгаа хүмүүс бол египетчүүд юм. Израильчууд Египетийн боол болжээ. Яагаад ингэв ээ?

Египетчүүд израильчуудыг дарлаж байв

Иаковын өнөр бүл Египетэд олон жилийн турш тайван амгалан амьдарч байлаа. Иосеф тэдэнд санаа тавьдаг байв. Тэрбээр Египетэд фараоны дараа ордог чухал хүн байсан шүү дээ. Гэвч хожим Иосеф нас баржээ. Тэгтэл израильчуудад дургүй шинэ фараон Египетийг захирдаг болов.

Тэгээд өнөө муу фараон израильчуудыг боол болгожээ. Бас тэднийг харгис хатуу хүмүүсээр харгалзуулав. Тэд Египетийн хотуудыг барих хүнд хүчир ажлыг израильчуудаар хийлгэж байлаа. Тэглээ ч израильчууд өсөж олширсоор байв. Египетчүүд тэднийг хэтэрхий олширч, хүчирхэг болох вий гэж айдаг боллоо.

Египетчүүд израильчуудыг дарлаж байв

Фараоны юу хийснийг чи мэдэх үү? Израиль ээжүүдийг хүүхдээ төрүүлэхэд нь тусалдаг эмэгтэйчүүд байдаг байв. Фараон тэдэнд: «Хүү төрвөл ал» гэж тушаажээ. Гэвч тэд сайн хүмүүс байсан учраас нялх хүүхдүүдийг алаагүй юм.

Тэгэхлээр нь фараон бүх ард түмэндээ: «Израилийн нялх хөвгүүдийг булаан авч алагтун. Зөвхөн охидыг амьд үлдээ» гэж тушаажээ. Харгис тушаал биш гэж үү? Нялх хөвгүүдээс нэг хүү яаж амьд үлдсэн тухай үзэцгээе.

Египетээс гарсан нь 1:6—22.



Асуулт

  • Зураг дээр, ташуур барьсан хүн хэн бэ? Тэр хэнийг ташуурдаж байна вэ?
  • Иосефыг нас барсны дараа израильчуудад юу тохиолдсон бэ?
  • Египетчүүд израильчуудаас яагаад айдаг болсон бэ?
  • Израиль ээжүүдийг хүүхдээ төрүүлэхэд нь тусалдаг эмэгтэйчүүдэд фараон ямар тушаал өгсөн бэ?

Нэмэлт асуулт

  • Египетээс гарсан нь 1:6—22-ыг уншина уу.

    Ехова Абрахамд өгсөн амлалтаа хэрхэн биелүүлж эхэлсэн бэ? (Ег. 1:7; Эх. 12:2; Үйлс 7:17)

    Еврей эх баригчид амийг ариун гэж хүндэтгэдгээ хэрхэн харуулсан бэ? (Ег. 1:17; Эх. 9:6)

    Эх баригчид Еховад үнэнч байсныхаа төлөө ямар шагнал хүртсэн бэ? (Ег. 1:20, 21; Сур. 19:17)

    Абрахамаас гарах, амласан Үрийн талаарх Еховагийн санаа зорилгыг Сатан хэрхэн нураахыг оролдсон бэ? (Ег. 1:22; Мат. 2:16)