Skip to content

Skip to secondary menu

Skip to table of contents

Jehovah’s Witness Ki

Toabaita

Si Fa’aroṉoa Le’a Fasia Tha God!

 Lesina 10

E Ade’ufita Fasia Oko Riki Thaito’omana To’odoa Ne Mamana?

E Ade’ufita Fasia Oko Riki Thaito’omana To’odoa Ne Mamana?

“Muka fiia profet ne a’i kesi mamana.”MATTHEW 7:15.

“Kera sore’a kera thaito’omana tha God, ma raa kera ki e fatania kera tofea bona’a tha God.”TITUS 1:16.

1. E ’ufita, te’e to’odoa bo’o ne mamana?

Tha Jesus e to’oa i sana to’a nia ki na e toleda, te’e to’odoa bo’o ne mamana. To’odoa eri e ’uria ta tala na e kwaitalai uria marukia tathaa. Tha Jesus e sore’a: “Aṉe’e imole bo’o na kera todaa” tala eri. (Matthew 7:14) Talito’ona to’odoa ne ṉado ana Baebol natha God e alafafia. Imole ki sui bo’o na kera too ana to’odoa na e mamana kera too ana te’e fiito’oa.Te’emania John 4:23, 24; 14:6; Ephesus 4:4, 5.

2. Si taa natha Jesus e sore’a sulia Kristin ki ne a’i kesi mamana?

Tha Jesus e falea mamalafo sulia profet ki ne a’i kesi mamana toto keki labatania to’odoa na e mamana. I thara kau, abula lada riki lana e ’uria ana sani kera to’a mamana ni fo’a. Figute’e wane kera ki mena, keka fiia ada sani kera bona’a na Kristin ki. Ma e ade’ufita fasia oko thaito’omana masa ni kera Kristin mamana ki mado e a’i? Biraṉada bia abula lada na kai fatania si kula eri.Te’emania Matthew 7:13-23.

3. E ade’ufita fasia oko riki thaito’omana to’a na kera lae sulia to’odoa ne mamana?

Manatakalia fasi lima si do eki:

  • To’a na kera lae sulia to’odoa ne mamana kera fareba’ita ana Baebol mala Ba’elana tha God. Keka ili uria abula la sulia kwaifamanataia na e ni iei. To’odoa ne mamana e e’eta fasia to’odoa na e lae bana sulia manate’edo wane ki. (Matthew 15:7-9)  To’a na kera lae sulia to’odoa ne mamana kera abula sulia si do na kera u’unutania.Te’emania John 17:17; 2 Timothy 3:16, 17.

  • To’a na kera lae mamana i buriana tha Jesus kera fare’inoto ana thatana tha God, Jehovah. Tha Jesus e fare’inoto ana thatana tha God asi maṉa na e u’unu lala’a sulia. Ni nia ka adomia imole ki uria keki thaito’omana tha God bia ka to’oa fo’a la i sada uria fa’aabu lana thatana tha God. (Matthew 6:9) I la fanua na o too iei, to’odoa ta na kera alu lala’a ana thatana tha God?Te’emania John 17:26; Rome 10:13, 14.

  • Kristin mamana ki kera fa’aroṉo tatalo ana Inotoa tha God. Tha God e arasia mai tha Jesus uria kai fa’aroṉo tatalo ana si fa’aroṉoa le’a sulia Inotoa tha God. Talito’ona Inotoa tha God bona’a na manatato’oṉadoa imole ki. Tha Jesus e u’unu sulia Inotoa eri lalae ka fula ana fathato na e mae. (Luke 4:43; 8:1; 23:42, 43) Ni nia ka sore’a to’a na kera lae i buriana keki fa’aroṉo tatalo ana Inotoa eri. Masa ta imole e u’unu bi oe sulia Inotoa tha God, riki lana e ’uria to’odoa taa ni bo’o na ni nia e too iei?Te’mania Matthew 24:14.

  • To’a na kera lae i buriana tha Jesus kesi ado bia fanua nei iano. Ni oe oki riki thaito’omada sula’ania kesi kwaisafui i lana gavmanu mado i la olisusu’ua ki na kai to’o. (John 17:16; 18:36) Ni kera kesi ilia la’u bo’o biraṉaa ta’a ki bia abula la ana fanua nei iano na kai kwailabata’i.Te’emania James 4:4.

  • Kristin mamana ki kera too ana liothaua mamana uri kera kwailiu. Kera to’oa fasia Ba’elana tha God uria fareba’ita la ana kule’e to’a ki sui bana. Doanita to’o teisi maṉa to’odoa ki na e a’i kesi mamana keka sukwai ura safu lana omea ki, Kristin mamana ki kera lalakwa bona’a ura keki ilia sido eri. (Micah 4:1-3) Ma keka falea si maṉa kera bia si do ki na kera too ania ura adomi lana ma fa’asukwa’i lana tei imole ki la’u.Te’emania John 13:34, 35; 1 John 4:20.

4. To’odoa taa ni bo’o na o riki thaito’omana e mamana?

To’odoa taa ni bo’o, na to’odo lana e gwauṉa’i fasia Baebol, ka fare’inoto ana thatana tha God, bia ka fa’aroṉo tatalo ana Inotoa tha God bona’a na manatato’oṉadoa imole ki? Imole ki ana to’odoa taa ni bo’o, na kera too ana liothaua bia kesi kwaisafui bona’a i la omea? O manata ’ufita sulia si kula eri?Te’emania 1 John 3:10-12.