Skip to content

Skip to secondary menu

Skip to table of contents

Jehovah’s Witness Ki

Toabaita

Si Fa’aroṉoa Le’a Fasia Tha God!

 Lesina 4

Ni Tei Natha Jesus Christ?

Ni Tei Natha Jesus Christ?

Uria taa naka kwaiakori uria u’unu la bia tha Jesus?MATTHEW 11:29; MARK 10:13-16.

1. I fei natha Jesus e lae mai fasia?

Tha Jesus e e’eta fasi imole ki sui bana sula’ania ni nia ṉa spirit e too mai i heven, sui fetei ka futa i fanua nei iano. (John 8:23) Nia ṉa thauṉa’ia nana’o tha God, bia ni nia ka adomia the God uria thauṉai lana si do ki sui bo’o. Talito’ona ni nia bona’a natha God e thauṉa’i nia i tala’ana, adelana bo’o ka tala’ana keki alaṉi nia ana ‘te’efa kaluwane muta’ia’ tha God. (John 1:14) Tha Jesus e raa mala wane ni ṉata tha God, adelana keka alaṉi nia ana “ṉa Ba’ea.”Te’emania Proverbs 8:22, 23, 30; Colossae 1:15, 16.

2. Uria taa natha Jesus ka sifo mai i fanua nei iano?

Tha God e falea mai kaluwane nia i fanua nei iano ka futa ana ni Mary, thari i Jew. Adelana bo’o tha Jesus ka a’i si futa ana ta wane i fanua nei iano. (Luke 1:30-35) Tha Jesus e sifo mai i fanua nei iano uria (1) to’olana mamana la sulia tha God, (2) fata’i lana abula la sulia manatana tha God doanita si maṉa na kuka tatha mena i la afeta’ia ki, bia (3) fale lana maṉona uria “ta’e la fasi” kulu.Te’emania Matthew 20:28.

3. Si taa natha Jesus e ta’e fasi kulu uria?

Ta’e la fasia ta wane, nia na sido na wane e ilia uria fa’asitatha lana wane fasia maea. (Exodus 21:29, 30) Tha God e a’i si manto’ona u bo’o mai uria imole ki keki fulato’ona ara’ia bia maea. E ade’ufita na kuka thaito’omana? Tha God e fa’aroṉoa tha Adam, nia kai fulato’ona maea masa ni nia ka “abula ta’a.” Masa ni nia ka a’i si abula ta’a, e afeta’i ka fulato’ona maea. (Genesis 2:16, 17; 5:5) Baebol e fa’aroṉo ania ṉa maea e “fulato’ona” imole ki i nunufana tha Adam. Adelana bo’o, kwalafana tha Adama te’efau  keka fulato’ona maea i nunufana abula ta’a la. Kulu ato’ia ta wane uria kai ta’e fasi kulu fasia kuka sitatha ana maea na kulu fulato’ona fasia tha Adam.Te’emania Rome 5:12; 6:23.

Ni tei bo’o ne farana uria kai ta’e fasi kulu fasi kuka sitatha fasia maea? Kulu usia abula ta’a la kulu ki i tala’akalu’a asi maṉa na kulu mae. Wane ne a’i si laula’u e a’i si farana uria kai ta’e fasia abula ta’a lana ruana la’u imole.Te’emania Psalm 49:7-9.

4. Uria taa ni bo’o natha Jesus ka mae?

Tha Jesus e e’eta fasi kulu sula’ania nia wane e laula’u. Nia e ai si abulata’a u bo’o fasia ka mae ura abulata’a la nia ki, mani nia e mae bana ura abulata’a lana imole ki. Asi maṉa natha God e falea mai Kaluwane nia ka mae uri kulu, nia e fatania liothaua baita na e too ania i fana imole ki. Tha Jesus e liothau la’u bo’o iekelu’a asi maṉa ne adesulia Maka nia bia ka mae uria abula ta’a la kulu ki.Te’emania John 3:16; Rome 5:18, 19.

5. Si taa ni bo’o natha Jesus e ilia i tara’ena?

Si maṉa natha Jesus e too i fanua nei iano, ni ka fa’asuia mata’ia, tata’ea imole ki na kera mae, bia ka adomia imole ki na kera baro. Si do eki na e reroa e fatania si do na e toto kai ilia i fana imole ki na kera adesulia, i la si maṉa ne ni u mai. (Matthew 15:30, 31; John 5:28) I buriana tha Jesus e mae, tha God ka fa’amaruki nia mala ta spirit. (1 Peter 3:18) Sui tha Jesus ka ono i aba a’ola tha God ma’akwalia si maṉa natha Jehovah kai falea sukwa’ia i fana uria kai kwaitalai fafia fanua nei iano. (Hebrew 10:12, 13) I tara’ena tha Jesus e kwaitalai sui na’a i heven, ma to’a nia ki na kera lae i buriana keka fa’aroṉoa ana imole ki asi fa’aroṉoa le’a eri i la fanua nei iano rereba’a.Te’emania Daniel 7:13, 14; Matthew 24:14.

Karaṉia na’a tha Jesus kai aruto’ona sukwa’ia nia uria fa’adaṉa lana fiila ki, bia to’a na kera ilia do ta’a ki ne falea fiila. Imole ki na kera fatania fito’oa kera atha Jesus asi maṉa na kera adesuli nia, keki fulato’ona marukia i la fanua nei iano falu.Te’emania Psalm 37:9-11.