വിവരങ്ങള്‍ കാണിക്കുക

രക്തപ്പകർച്ച—ഡോക്‌ടർമാർ ഇപ്പോൾ പറയു​ന്നത്‌

രക്തപ്പകർച്ച—ഡോക്‌ടർമാർ ഇപ്പോൾ പറയു​ന്നത്‌

രക്തം സ്വീക​രി​ക്കാ​ത്ത​തി​ന്റെ പേരിൽ കാലങ്ങ​ളാ​യി ആളുകൾ യഹോ​വ​യു​ടെ സാക്ഷി​ക​ളെ വിമർശിക്കാറുണ്ട്‌. ‘രക്തം ഒഴിവാ​ക്കാൻ’ ബൈബിൾ പറയുന്നതുകൊണ്ടാണ്‌ അവർ രക്തം സ്വീക​രി​ക്കാ​ത്തത്‌. പക്ഷേ ചില സാഹചര്യങ്ങളിൽ രക്തപ്പകർച്ചയാണ്‌ ഏറ്റവും നല്ല ചികിത്സ എന്നു ഡോക്‌ടർമാർ കരുതി​യി​രു​ന്ന​തു​കൊണ്ട്‌ സാക്ഷികൾക്കു ചിലപ്പോൾ ചില പ്രശ്‌ന​ങ്ങ​ളും ഉണ്ടായി​ട്ടുണ്ട്‌.—പ്രവൃത്തികൾ 15:29.

എന്നാൽ അടുത്ത കാലത്താ​യി വൈദ്യ​ശാ​സ്‌ത്ര​രം​ഗത്ത്‌ അനുഭ​വ​പ​രി​ച​യ​മു​ള്ള പലരും രക്തപ്പകർച്ച കൂടാ​തെ​യു​ള്ള ചികിത്സാരീതികൾ ശുപാർശ ചെയ്യുന്നു. അതിനു ധാരാളം പ്രയോ​ജ​ന​ങ്ങ​ളു​ണ്ടെ​ന്നാണ്‌ അവർ പറയു​ന്നത്‌.

സ്റ്റാൻഫോഡ്‌ യൂണി​വേ​ഴ്‌സി​റ്റി സ്‌കൂൾ ഓഫ്‌ മെഡിസിൻ പുറത്തി​റ​ക്കു​ന്ന ഒരു പ്രസി​ദ്ധീ​ക​ര​ണ​ത്തി​ന്റെ (Stanford Medicine Magazine) 2013-ലെ ഒരു ലക്കത്തിൽ രക്തത്തെ​ക്കു​റിച്ച്‌ ഒരു പ്രത്യേക റിപ്പോർട്ടുണ്ടായിരുന്നു. ആ ലേഖന​ത്തി​ലെ, “ഒഴുക്കി​നെ​തി​രെ—രക്തപ്പകർച്ച കുറയു​ന്ന​തി​ന്റെ കാരണ​മെന്ത്‌?” എന്ന ഭാഗത്ത്‌ സാറാ സി. പി. വില്യംസ്‌ ഇങ്ങനെ എഴുതി: “കഴിഞ്ഞ പത്തു വർഷത്തെ പല പഠനങ്ങ​ളും തെളി​യി​ക്കു​ന്നത്‌ ലോക​മെ​ങ്ങു​മു​ള്ള ആശുപത്രിവാർഡുകളിലും ഓപ്പറേഷൻ തീയറ്ററുകളിലും രോഗികൾക്കു വേണ്ടതി​ല​ധി​കം രക്തം നൽകുന്നു എന്നാണ്‌. ഒരു ആവശ്യവുമില്ലാത്തപ്പോൾപ്പോലും ചിലപ്പോൾ രക്തം നൽകാറുണ്ട്‌.”

പെൻസിൽവേനിയ ആശുപ​ത്രി​യി​ലെ, രക്തരഹിത ചികി​ത്സ​യും ശസ്‌ത്ര​ക്രി​യ​യും എന്ന വിഭാ​ഗ​ത്തി​ന്റെ സ്ഥാപി​ക​യും ഡയറക്‌ട​റും ആയ പട്രീഷ്യ ഫോഡി​ന്റെ (എം. ഡി.) വാക്കുകൾ സാറാ ഉദ്ധരി​ക്കു​ന്നുണ്ട്‌. ഡോ. പട്രീഷ്യ ഫോഡ്‌ ഇങ്ങനെ പറയുന്നു: “ജീവൻ രക്ഷിക്കുന്ന ഏറ്റവും പ്രധാ​ന​ഘ​ട​കം രക്തമാ​യ​തു​കൊണ്ട്‌ രക്തത്തിന്റെ അളവ്‌ ഒരു പരിധിയിൽ താഴെപ്പോയാൽ ആളുകൾ മരിക്കും എന്ന ആശയം വൈദ്യ​രം​ഗ​ത്തു​ള്ള​വ​രു​ടെ മനസ്സിൽ പതിഞ്ഞി​രി​ക്കു​ക​യാണ്‌. . . ചില പ്രത്യേകസാഹചര്യങ്ങളിൽ ഇതു ശരിയാണെങ്കിൽത്തന്നെ * മിക്ക സാഹച​ര്യ​ങ്ങ​ളി​ലും, മിക്ക രോഗി​ക​ളു​ടെ കാര്യ​ത്തി​ലും, ഇതു സത്യമല്ല.”

ഓരോ വർഷവും 700-ഓളം യഹോ​വ​യു​ടെ സാക്ഷി​ക​ളെ ചികി​ത്സി​ക്കു​ന്ന ഡോ. പട്രീഷ്യ ഇങ്ങനെ കൂട്ടിച്ചേർക്കുന്നു: “ഞാൻ പല ഡോക്‌ടർമാരോടും സംസാ​രി​ച്ചി​ട്ടുണ്ട്‌. . . അവരിൽ പലർക്കുമുള്ള തെറ്റായ ഒരു ധാരണ​യാണ്‌, മിക്ക രോഗി​ക​ളെ​യും രക്തം കൊടു​ക്കാ​തെ രക്ഷിക്കാൻ കഴിയില്ല എന്നത്‌. . . ഒരു പരിധി​വ​രെ ഞാനും ഇങ്ങനെ കരുതി​യി​രു​ന്നു. എന്നാൽ ഇങ്ങനെയുള്ള രോഗി​ക​ളെ ലളിത​മാ​യ മറ്റു ചില ചികിത്സാരീതികൾ ഉപയോഗിച്ച്‌ രക്ഷിക്കാൻ കഴിയുമെന്ന്‌ എനിക്ക്‌ അധികം വൈകാ​തെ മനസ്സി​ലാ​യി.”

ഒരു വൈദ്യ​ശാ​സ്‌ത്ര​മാ​സി​ക​യു​ടെ (Archives of Internal Medicine) 2012 ആഗസ്റ്റിലെ ലക്കത്തിൽ, ഹൃദയ​ശ​സ്‌ത്ര​ക്രി​യ​യ്‌ക്കു വിധേ​യ​രാ​യ​വ​രെ​ക്കു​റിച്ച്‌ നടത്തിയ 28 വർഷത്തെ ഒരു പഠനത്തി​ന്റെ ഫലം പ്രസി​ദ്ധീ​ക​രി​ച്ചു. രക്തം സ്വീക​രി​ച്ച രോഗി​ക​ളോ​ടു​ള്ള താരതമ്യത്തിൽ, സമാന​മാ​യ രോഗ​മു​ണ്ടാ​യി​രു​ന്ന യഹോ​വ​യു​ടെ സാക്ഷി​ക​ളു​ടെ ആരോ​ഗ്യ​സ്ഥി​തി മെച്ചമാ​യി​രു​ന്ന​ത്രെ. അവർക്കു ശസ്‌ത്ര​ക്രി​യ കഴിഞ്ഞുള്ള പ്രശ്‌നങ്ങൾ കുറവായിരുന്നു. അവർ പെട്ടെന്നു സുഖ​പ്പെ​ട്ടെ​ന്നു മാത്രമല്ല, രക്തം സ്വീക​രി​ച്ച രോഗികളെക്കാൾ ഏകദേശം 20 വർഷം കൂടുതൽ ജീവിക്കുകയും ചെയ്‌തു.

മറ്റൊരു മാസി​ക​യു​ടെ (The Wall Street Journal) 2013 ഏപ്രിൽ 8 ലക്കത്തിലെ ഒരു ലേഖനം ഇങ്ങനെ പറഞ്ഞു: “വിശ്വാ​സ​പ​ര​മാ​യ കാരണങ്ങളാൽ രക്തം സ്വീകരിക്കാത്തവർക്കുവേണ്ടി രക്തരഹിത ശസ്‌ത്രക്രിയകൾ, അതായത്‌ മറ്റുള്ളവരിൽനിന്നുള്ള രക്തം കുത്തി​വെ​ക്കാ​തെ​യു​ള്ള ശസ്‌ത്രക്രിയകൾ, നടത്താൻ തുടങ്ങിയിട്ട്‌ വർഷങ്ങളായി. എന്നാൽ ഇപ്പോൾ പല ആശുപ​ത്രി​ക​ളും ഈ രീതി ഇഷ്ടപ്പെ​ട്ടു​തു​ട​ങ്ങി​യി​രി​ക്കു​ന്നു. . . രക്തരഹിത ശസ്‌ത്ര​ക്രി​യ​യെ അനുകൂ​ലി​ക്കു​ന്ന ഡോക്‌ടർമാർ പറയുന്നത്‌, ഇങ്ങനെ ചെയ്യു​ക​വ​ഴി രക്തം വാങ്ങു​ന്ന​തി​നും അതു സൂക്ഷി​ക്കു​ന്ന​തി​നും ശുദ്ധീ​ക​രി​ക്കു​ന്ന​തി​നും പരി​ശോ​ധി​ക്കു​ന്ന​തി​നും ശരീരത്തിൽ കയറ്റുന്നതിനും ഒക്കെയു​ളള പണം ലാഭി​ക്കാം എന്നാണ്‌. മാത്രമല്ല, രക്തപ്പകർച്ചയുടെ ഫലമാ​യു​ളള അണുബാ​ധ​യും മറ്റു കുഴപ്പ​ങ്ങ​ളും ഒഴിവാ​ക്കു​ന്ന​തി​നും അങ്ങനെ പെട്ടെന്ന്‌ ആശുപ​ത്രി വിടു​ന്ന​തി​നും അതു സഹായി​ക്കു​ന്നു.”

അമേരി​ക്ക​യി​ലെ ക്ലെവലന്റ്‌ ക്ലിനി​ക്കി​ലെ രക്തം കൈകാ​ര്യം ചെയ്യുന്ന വിഭാ​ഗ​ത്തി​നു മേൽനോട്ടം വഹിക്കുന്ന റോബർട്ട്‌ ലോറൻസിനു പറയാ​നു​ള്ളത്‌ ഇതാണ്‌: “രോഗി​ക്കു രക്തം നൽകുമ്പോൾ, അയാളെ സഹായി​ക്കു​ക​യാണ്‌ എന്നൊരു തോന്നൽ നമുക്കുണ്ടായേക്കാം. . . എന്നാൽ വാസ്‌തവം അതല്ല എന്നാണു വർഷങ്ങളായുള്ള അനുഭവങ്ങൾ സൂചിപ്പിക്കുന്നത്‌.”

^ ഖ. 5 രക്തത്തെക്കുറിച്ചുള്ള യഹോ​വ​യു​ടെ സാക്ഷി​ക​ളു​ടെ വീക്ഷണം അറിയാൻ, “സാധാരണ ചോദി​ക്കാ​റു​ള്ള ചോദ്യങ്ങൾ—നിങ്ങൾ രക്തം സ്വീക​രി​ക്കാ​ത്തത്‌ എന്തു​കൊണ്ട്‌?” എന്ന ലേഖനം കാണുക.