ലൂക്കോസ്‌ എഴുതിയത്‌ 4:1-44

4  യേശു പരിശു​ദ്ധാ​ത്മാവ്‌ നിറഞ്ഞ​വ​നാ​യി യോർദാ​നിൽനിന്ന്‌ മടങ്ങി. ആത്മാവ്‌ യേശു​വി​നെ വിജന​ഭൂ​മി​യി​ലൂ​ടെ നയിച്ചു.+  പിശാചിന്റെ പ്രലോ​ഭനം നേരിട്ട്‌ യേശു 40 ദിവസം അവിടെ കഴിഞ്ഞു.+ ആ ദിവസ​ങ്ങ​ളിൽ യേശു ഒന്നും കഴിച്ചില്ല. അതു​കൊണ്ട്‌ 40 ദിവസം കഴിഞ്ഞ​പ്പോ​ഴേ​ക്കും യേശു​വി​നു വിശന്നു.  അപ്പോൾ പിശാച്‌ യേശു​വി​നോട്‌, “നീ ഒരു ദൈവ​പു​ത്ര​നാ​ണെ​ങ്കിൽ ഈ കല്ലി​നോട്‌ അപ്പമാ​കാൻ പറയൂ” എന്നു പറഞ്ഞു.  എന്നാൽ യേശു പിശാ​ചി​നോട്‌, “‘മനുഷ്യൻ അപ്പം​കൊണ്ട്‌ മാത്രമല്ല ജീവി​ക്കേ​ണ്ടത്‌’+ എന്ന്‌ എഴുതി​യി​ട്ടുണ്ട്‌” എന്നു പറഞ്ഞു.  അപ്പോൾ പിശാച്‌ യേശു​വി​നെ ഉയർന്ന ഒരു സ്ഥലത്തേക്കു കൊണ്ടു​പോ​യി ഭൂമി​യി​ലെ എല്ലാ രാജ്യ​ങ്ങ​ളും ക്ഷണനേ​രം​കൊണ്ട്‌ കാണി​ച്ചു​കൊ​ടു​ത്തു.+  എന്നിട്ട്‌ യേശു​വി​നോ​ടു പറഞ്ഞു: “ഈ സകല അധികാ​ര​വും അവയുടെ പ്രതാ​പ​വും ഞാൻ നിനക്കു തരാം. കാരണം ഇതെല്ലാം എനിക്കു തന്നിരി​ക്കു​ന്നു.+ എനിക്ക്‌ ഇഷ്ടമു​ള്ള​വനു ഞാൻ അതു കൊടു​ക്കും.+  അതു​കൊണ്ട്‌ നീ എന്റെ മുന്നിൽ വീണ്‌ എന്നെ​യൊന്ന്‌ ആരാധി​ച്ചാൽ ഇതെല്ലാം നിന്റേതാകും.”  യേശു പിശാ​ചി​നോ​ടു പറഞ്ഞു: “‘നിന്റെ ദൈവ​മായ യഹോ​വ​യെ​യാ​ണു നീ ആരാധിക്കേണ്ടത്‌. ആ ദൈവത്തെ മാത്രമേ നീ സേവിക്കാവൂ’*+ എന്ന്‌ എഴുതിയിട്ടുണ്ട്‌.”  അപ്പോൾ പിശാച്‌ യേശു​വി​നെ യരുശ​ലേ​മി​ലേക്കു കൊണ്ടു​പോ​യി ദേവാലയത്തിന്റെ ഏറ്റവും ഉയർന്ന ഭാഗത്ത്‌ നിറു​ത്തി​യിട്ട്‌ പറഞ്ഞു: “നീ ഒരു ദൈവ​പു​ത്ര​നാ​ണെ​ങ്കിൽ ഇവി​ടെ​നിന്ന്‌ താഴേക്കു ചാടുക.+ 10  ‘നിന്നെ കാക്കാൻ ദൈവം തന്റെ ദൂതന്മാ​രോ​ടു കല്‌പി​ക്കും,’ എന്നും 11  നിന്റെ കാൽ കല്ലിൽ തട്ടാതെ അവർ നിന്നെ കൈക​ളിൽ താങ്ങും’+ എന്നും എഴുതി​യി​ട്ടു​ണ്ട​ല്ലോ.” 12  അപ്പോൾ യേശു, “‘നിന്റെ ദൈവ​മായ യഹോ​വയെ നീ പരീക്ഷിക്കരുത്‌’+ എന്നു പറഞ്ഞിട്ടുണ്ട്‌” എന്ന്‌ ഉത്തരം പറഞ്ഞു. 13  അങ്ങനെ പിശാച്‌ പ്രലോ​ഭ​ന​ങ്ങ​ളെ​ല്ലാം അവസാ​നി​പ്പിച്ച്‌ യേശു​വി​നെ വിട്ട്‌ പോയി. എന്നിട്ട്‌ മറ്റൊരു അവസരം ഒത്തുകി​ട്ടാൻ കാത്തി​രു​ന്നു.+ 14  പിന്നെ യേശു ദൈവാത്മാവിന്റെ ശക്തിയോടെ* ഗലീല​യി​ലേക്കു മടങ്ങി​പ്പോ​യി. യേശു​വി​നെ​ക്കു​റി​ച്ചുള്ള നല്ല വാർത്തകൾ ചുറ്റു​മുള്ള നാട്ടി​ലെ​ല്ലാം പരന്നു.+ 15  യേശു അവരുടെ സിന​ഗോ​ഗു​ക​ളിൽ പഠിപ്പി​ക്കാൻ തുടങ്ങി; എല്ലാവ​രു​ടെ​യും ആദരവ്‌ നേടി. 16  പിന്നെ യേശു, താൻ വളർന്ന നസറെ​ത്തി​ലേക്കു പോയി.+ എല്ലാ ശബത്തി​ലും ചെയ്യാ​റു​ള്ള​തു​പോ​ലെ സിന​ഗോ​ഗിൽ ചെന്ന്‌+ വായി​ക്കാൻ എഴു​ന്നേ​റ്റു​നി​ന്നു. 17  യശയ്യ പ്രവാചകന്റെ ചുരുൾ യേശു​വി​നു കൊടു​ത്തു. യേശു ചുരുൾ തുറന്ന്‌ ഇങ്ങനെ എഴുതി​യി​രി​ക്കുന്ന ഭാഗം എടുത്തു: 18  “ദരിദ്രരോടു സന്തോ​ഷ​വാർത്ത ഘോഷി​ക്കാൻ യഹോവ എന്നെ അഭി​ഷേകം ചെയ്‌ത​തി​നാൽ ദൈവത്തിന്റെ ആത്മാവ്‌ എന്റെ മേലുണ്ട്‌. ബന്ദിക​ളോ​ടു സ്വാത​ന്ത്ര്യം ലഭിക്കു​മെ​ന്നും അന്ധന്മാ​രോ​ടു കാഴ്‌ച കിട്ടു​മെ​ന്നും പ്രഖ്യാ​പി​ക്കാ​നും മർദി​തരെ സ്വതന്ത്രരാക്കാനും+ 19  യഹോ​വ​യു​ടെ പ്രസാദവർഷത്തെക്കുറിച്ച്‌+ പ്രസം​ഗി​ക്കാ​നും ദൈവം എന്നെ അയച്ചിരിക്കുന്നു.” 20  എന്നിട്ട്‌ യേശു ചുരുൾ ചുരുട്ടി സേവകന്റെ കൈയിൽ തിരികെ കൊടു​ത്തിട്ട്‌ അവിടെ ഇരുന്നു. സിന​ഗോ​ഗി​ലു​ണ്ടാ​യി​രുന്ന എല്ലാവ​രും യേശു​വി​നെ​ത്തന്നെ നോക്കി​ക്കൊ​ണ്ടി​രു​ന്നു. 21  അപ്പോൾ യേശു അവരോട്‌, “നിങ്ങൾ ഇപ്പോൾ കേട്ട* ഈ തിരു​വെ​ഴുത്ത്‌ ഇന്നു നിറ​വേ​റി​യി​രി​ക്കു​ന്നു”+ എന്നു പറഞ്ഞു. 22  എല്ലാവ​രും യേശു​വി​നെ​ക്കു​റിച്ച്‌ മതി​പ്പോ​ടെ സംസാ​രി​ച്ചു. യേശുവിന്റെ വായിൽനിന്ന്‌ വന്ന ഹൃദ്യ​മായ വാക്കുകൾ കേട്ട്‌,+ “ഇത്‌ ആ യോസേഫിന്റെ മകനല്ലേ” എന്ന്‌ അവർ അതിശ​യ​ത്തോ​ടെ ചോദി​ച്ചു.+ 23  യേശു അവരോ​ടു പറഞ്ഞു: “‘വൈദ്യാ, ആദ്യം സ്വന്തം അസുഖം മാറ്റുക’ എന്ന പഴഞ്ചൊ​ല്ലു പറഞ്ഞു​കൊണ്ട്‌ നിങ്ങൾ എന്റെ അടുത്ത്‌ വരും. ‘കഫർന്ന​ഹൂ​മിൽ നീ കുറെ കാര്യങ്ങൾ ചെയ്‌തെന്നു ഞങ്ങൾ കേട്ടു. അതൊക്കെ നിന്റെ ഈ സ്വന്തനാ​ട്ടി​ലും ചെയ്യുക’ എന്നു നിങ്ങൾ എന്നോടു പറയു​മെന്ന്‌ എനിക്ക്‌ ഉറപ്പാണ്‌.”+ 24  യേശു ഇങ്ങനെ​യും പറഞ്ഞു: “ഒരു പ്രവാ​ച​ക​നെ​യും സ്വന്തം നാട്ടു​കാർ അംഗീകരിക്കാറില്ല+ എന്നു ഞാൻ സത്യമാ​യി നിങ്ങ​ളോ​ടു പറയുന്നു. 25  ഉദാഹരണത്തിന്‌, ഏലിയ​യു​ടെ കാലത്ത്‌ മൂന്നു വർഷവും ആറു മാസവും ആകാശം അടഞ്ഞ്‌ മഴ പെയ്യാതെ നാട്ടി​ലെ​ങ്ങും വലി​യൊ​രു ക്ഷാമം ഉണ്ടായി.+ ആ സമയത്ത്‌ ഇസ്രാ​യേ​ലിൽ ധാരാളം വിധവ​മാ​രു​ണ്ടാ​യി​രു​ന്നു. 26  എങ്കിലും ഏലിയയെ അവരിൽ ആരുടെ അടു​ത്തേ​ക്കും അയയ്‌ക്കാ​തെ സീദോ​നി​ലെ സാരെ​ഫാ​ത്തി​ലുള്ള ഒരു വിധവ​യു​ടെ അടു​ത്തേ​ക്കാണ്‌ അയച്ചത്‌+ എന്നു ഞാൻ സത്യമാ​യി നിങ്ങ​ളോ​ടു പറയുന്നു. 27  അതു​പോ​ലെ, എലീശ പ്രവാചകന്റെ കാലത്ത്‌ ഇസ്രാ​യേ​ലിൽ ധാരാളം കുഷ്‌ഠ​രോ​ഗി​ക​ളു​ണ്ടാ​യി​രു​ന്നു. എങ്കിലും അവർ ആരുമല്ല, സിറി​യ​ക്കാ​ര​നായ നയമാൻ മാത്ര​മാ​ണു ശുദ്ധീ​ക​രി​ക്ക​പ്പെ​ട്ടത്‌.”+ 28  ഇതു കേട്ട്‌ സിന​ഗോ​ഗി​ലു​ണ്ടാ​യി​രു​ന്ന​വർക്കെ​ല്ലാം വല്ലാതെ ദേഷ്യം വന്നു.+ 29  അവർ ചാടി​യെ​ഴു​ന്നേറ്റ്‌ യേശു​വി​നെ നഗരത്തി​നു പുറ​ത്തേക്കു പിടി​ച്ചു​കൊ​ണ്ടു​പോ​യി. ആ നഗരം ഒരു മലമു​ക​ളി​ലാ​യി​രു​ന്നു. അതു​കൊണ്ട്‌ മലയുടെ* വക്കിൽനിന്ന്‌ യേശു​വി​നെ തലകീ​ഴാ​യി തള്ളിയി​ടാ​നാ​യി​രു​ന്നു അവരുടെ പദ്ധതി. 30  എന്നാൽ യേശു അവരുടെ ഇടയി​ലൂ​ടെ പുറത്ത്‌ കടന്ന്‌ അവിടം വിട്ട്‌ പോയി.+ 31  പിന്നെ യേശു ഗലീല​യി​ലെ ഒരു നഗരമായ കഫർന്ന​ഹൂ​മിൽ ചെന്നു. അവിടെ ഒരു ശബത്തിൽ യേശു അവരെ പഠിപ്പി​ച്ചു​കൊ​ണ്ടി​രി​ക്കു​ക​യാ​യി​രു​ന്നു.+ 32  യേശു പഠിപ്പി​ക്കുന്ന രീതി കണ്ട്‌ അവർ അതിശ​യി​ച്ചു​പോ​യി.+ കാരണം അധികാ​ര​മു​ള്ള​വ​നാ​യി​ട്ടാ​ണു യേശു സംസാ​രി​ച്ചത്‌. 33  അപ്പോൾ സിന​ഗോ​ഗിൽ അശുദ്ധാ​ത്മാവ്‌ ബാധിച്ച ഒരു മനുഷ്യനുണ്ടായിരുന്നു. അയാൾ ഉച്ചത്തിൽ ഇങ്ങനെ വിളിച്ചുപറഞ്ഞു:+ 34  “നസറെത്തുകാരനായ യേശുവേ,+ അങ്ങയ്‌ക്ക്‌ ഇവിടെ എന്തു കാര്യം? ഞങ്ങളെ ഇല്ലാതാ​ക്കാൻ വന്നതാ​ണോ? അങ്ങ്‌ ആരാ​ണെന്ന്‌ എനിക്കു നന്നായി അറിയാം; ദൈവത്തിന്റെ പരിശു​ദ്ധൻ.”+ 35  എന്നാൽ അതിനെ ശകാരി​ച്ചു​കൊണ്ട്‌ യേശു പറഞ്ഞു: “മിണ്ടി​പ്പോ​ക​രുത്‌! അയാളിൽനിന്ന്‌ പുറത്ത്‌ വരൂ.” അപ്പോൾ ഭൂതം ആ മനുഷ്യ​നെ അവരുടെ മുന്നിൽ തള്ളിയി​ട്ടിട്ട്‌ അയാൾക്ക്‌ ഉപദ്ര​വ​മൊ​ന്നും ചെയ്യാതെ അയാളെ വിട്ട്‌ പോയി. 36  ഇതു കണ്ട്‌ എല്ലാവ​രും അതിശ​യ​ത്തോ​ടെ തമ്മിൽത്ത​മ്മിൽ ഇങ്ങനെ പറഞ്ഞു: “യേശുവിന്റെ സംസാരം കേട്ടോ? അതിശ​യം​തന്നെ! അധികാ​ര​ത്തോ​ടും ശക്തി​യോ​ടും കൂടെ യേശു അശുദ്ധാ​ത്മാ​ക്ക​ളോ​ടു കല്‌പി​ക്കു​ന്നു. ഉടനെ അവ പുറത്ത്‌ വരുക​യും ചെയ്യുന്നു.” 37  അങ്ങനെ, യേശു​വി​നെ​ക്കു​റി​ച്ചുള്ള വാർത്ത ചുറ്റു​മുള്ള നാട്ടി​ലെ​ങ്ങും പരന്നു.+ 38  സിന​ഗോ​ഗിൽനിന്ന്‌ ഇറങ്ങിയ യേശു ശിമോന്റെ വീട്ടിൽ ചെന്നു. ശിമോന്റെ അമ്മായി​യമ്മ കടുത്ത പനി പിടിച്ച്‌ കിടപ്പാ​യി​രു​ന്നു. ആ സ്‌ത്രീ​യെ സഹായി​ക്ക​ണ​മെന്ന്‌ അവർ യേശു​വി​നോട്‌ അപേക്ഷി​ച്ചു.+ 39  അപ്പോൾ യേശു ആ സ്‌ത്രീ​യു​ടെ അടുത്ത്‌ ചെന്ന്‌ പനിയെ ശാസിച്ചു. അവരുടെ പനി മാറി. ഉടനെ അവർ എഴു​ന്നേറ്റ്‌, വന്നവരെ സത്‌ക​രി​ച്ചു. 40  സൂര്യാ​സ്‌ത​മ​യ​മാ​യ​പ്പോൾ, പലപല രോഗ​ങ്ങൾകൊണ്ട്‌ കഷ്ടപ്പെ​ട്ടി​രു​ന്ന​വരെ ആളുകൾ യേശുവിന്റെ അടുത്ത്‌ കൊണ്ടു​വന്നു. ഓരോ​രു​ത്ത​രു​ടെ​യും മേൽ കൈ വെച്ച്‌ യേശു അവരെ സുഖ​പ്പെ​ടു​ത്തി.+ 41  “അങ്ങ്‌ ദൈവ​പു​ത്ര​നാണ്‌”+ എന്നു വിളി​ച്ചു​പ​റ​ഞ്ഞു​കൊണ്ട്‌ അനേക​രിൽനിന്ന്‌ ഭൂതങ്ങൾ പുറത്ത്‌ പോയി. പക്ഷേ താൻ ക്രിസ്‌തു​വാ​ണെന്ന്‌ അവയ്‌ക്ക്‌ അറിയാ​മാ​യി​രു​ന്ന​തു​കൊണ്ട്‌ യേശു അവയെ സംസാ​രി​ക്കാൻ അനുവ​ദി​ക്കാ​തെ ശകാരി​ച്ചു.+ 42  നേരം വെളു​ത്ത​പ്പോൾ യേശു ഒറ്റപ്പെട്ട ഒരു സ്ഥലത്തേക്കു പോയി.+ പക്ഷേ ജനം യേശു​വി​നെ തിരഞ്ഞു​ചെന്നു. കണ്ടെത്തി​യ​പ്പോൾ, തങ്ങളെ വിട്ട്‌ പോക​രു​തെന്നു യേശു​വി​നോട്‌ അപേക്ഷി​ച്ചു. 43  എന്നാൽ യേശു അവരോ​ടു പറഞ്ഞു: “മറ്റു നഗരങ്ങ​ളി​ലും എനിക്കു ദൈവരാജ്യത്തിന്റെ സന്തോ​ഷ​വാർത്ത പ്രസം​ഗി​ക്കേ​ണ്ട​തുണ്ട്‌. അതിനു​വേ​ണ്ടി​യാണ്‌ എന്നെ അയച്ചി​രി​ക്കു​ന്നത്‌.”+ 44  അങ്ങനെ, യേശു യഹൂദ്യ​യി​ലെ സിന​ഗോ​ഗു​ക​ളിൽ പ്രസം​ഗി​ച്ചു​പോ​ന്നു.

അടിക്കുറിപ്പുകള്‍

അഥവാ “ആ ദൈവ​ത്തി​നു മാത്രമേ നീ വിശു​ദ്ധ​സേ​വനം ചെയ്യാവൂ.”
അഥവാ “ദൈവാ​ത്മാവ്‌ നിറഞ്ഞ​വ​നാ​യി.”
അക്ഷ. “നിങ്ങളു​ടെ കാതു​ക​ളി​ലുള്ള.”
അഥവാ “കുന്നിന്റെ.”

പഠനക്കുറിപ്പുകൾ

ആത്മാവ്‌ . . . നയിച്ചു: ഇവിടെ കാണുന്ന ന്യൂമ എന്ന ഗ്രീക്കു​പദം ദൈവാ​ത്മാ​വി​നെ കുറി​ക്കു​ന്നു. ദൈവത്തിന്റെ ഇഷ്ടമനു​സ​രിച്ച്‌ കാര്യങ്ങൾ ചെയ്യു​ന്ന​തിന്‌ ഒരു വ്യക്തിയെ പ്രേരി​പ്പി​ക്കാ​നുള്ള ശക്തി അതിനുണ്ട്‌.​—മർ 1:12; പദാവ​ലി​യിൽ “ആത്മാവ്‌” കാണുക.

മനുഷ്യൻ അപ്പം​കൊണ്ട്‌ മാത്രമല്ല ജീവി​ക്കേ​ണ്ടത്‌: എബ്രാ​യ​തി​രു​വെ​ഴു​ത്തു​ക​ളി​ലെ ആവ 8:3-ൽനിന്ന്‌ യേശു ഉദ്ധരിച്ച ഭാഗം ലൂക്കോ​സും മത്തായി​യും രേഖ​പ്പെ​ടു​ത്തി​യി​ട്ടു​ണ്ടെ​ങ്കി​ലും ലൂക്കോ​സി​ന്റെ വിവര​ണ​ത്തിൽ കാണു​ന്നതു താരത​മ്യേന ഹ്രസ്വ​മായ ഒരു ഉദ്ധരണി​യാണ്‌. ആ ഉദ്ധരണി പൂർത്തി​യാ​ക്കുക എന്ന ലക്ഷ്യത്തിൽ, ചില പുരാതന ഗ്രീക്കു കൈ​യെ​ഴു​ത്തു​പ്ര​തി​ക​ളും പരിഭാ​ഷ​ക​ളും ഈ വാക്യ​ത്തിൽ “ദൈവ​ത്തി​ന്റെ എല്ലാ വചനം​കൊ​ണ്ടു​മാണ്‌ (ജീവി​ക്കേ​ണ്ടത്‌)” എന്ന ഭാഗം​കൂ​ടി കൂട്ടി​ച്ചേർത്തി​രി​ക്കു​ന്ന​താ​യി കാണാം. അങ്ങനെ അവർ ലൂക്കോ​സി​ന്റെ വിവര​ണ​വും മത്ത 4:4-ലെ സമാന്ത​ര​വി​വ​ര​ണ​വും ഒരു​പോ​ലെ​യാ​ക്കി​യി​രി​ക്കു​ന്നു. എന്നാൽ ലൂക്കോ​സി​ന്റെ സുവി​ശേ​ഷ​ത്തി​ന്റെ​തന്നെ കൂടുതൽ പഴക്കമുള്ള ചില കൈ​യെ​ഴു​ത്തു​പ്ര​തി​ക​ളിൽ ഹ്രസ്വ​മായ ഉദ്ധരണി​യേ കാണു​ന്നു​ള്ളൂ. വസ്‌തുത ഇതാ​ണെ​ങ്കി​ലും, ശ്രദ്ധേ​യ​മായ ഒരു കാര്യ​മുണ്ട്‌: ക്രിസ്‌തീയ ഗ്രീക്ക്‌ തിരു​വെ​ഴു​ത്തു​ക​ളു​ടെ പല എബ്രാ​യ​പ​രി​ഭാ​ഷ​ക​ളി​ലും (അനു. സി-യിൽ J7, 8, 10, 13-15, 17 എന്നു സൂചി​പ്പി​ച്ചി​രി​ക്കു​ന്നു.) ദൈർഘ്യ​മേ​റിയ ഉദ്ധരണി ഉപയോ​ഗി​ച്ചി​രി​ക്കു​ന്നി​ടത്ത്‌, ദൈവ​നാ​മത്തെ പ്രതി​നി​ധാ​നം ചെയ്യുന്ന നാല്‌ എബ്രായ അക്ഷരങ്ങൾ കാണാം. ദൈർഘ്യ​മേ​റിയ ആ ഉദ്ധരണി​യി​ലെ കൂട്ടി​ച്ചേർത്തി​രി​ക്കുന്ന ഭാഗം ഇങ്ങനെ പരിഭാ​ഷ​പ്പെ​ടു​ത്താ​വു​ന്ന​താണ്‌: “യഹോ​വ​യു​ടെ വായിൽനിന്ന്‌ പുറ​പ്പെ​ടുന്ന എല്ലാം​കൊ​ണ്ടു​മാണ്‌ (ജീവി​ക്കേ​ണ്ടത്‌).”

യഹോവ: ഇവിടെ ഉദ്ധരി​ച്ചി​രി​ക്കുന്ന ആവ 6:13; 10:20 എന്നിവ​യു​ടെ മൂല എബ്രാ​യ​പാ​ഠ​ത്തിൽ ദൈവത്തിന്റെ പേരിനെ പ്രതി​നി​ധാ​നം ചെയ്യുന്ന നാല്‌ എബ്രാ​യ​വ്യ​ഞ്‌ജ​നാ​ക്ഷ​രങ്ങൾ (അതിന്റെ ലിപ്യ​ന്ത​രണം യ്‌ഹ്‌വ്‌ഹ്‌ എന്നാണ്‌.) കാണാം.​—അനു. സി കാണുക.

ദേവാലയത്തിന്റെ ഏറ്റവും ഉയർന്ന ഭാഗം: മത്ത 4:5-ന്റെ പഠനക്കു​റി​പ്പു കാണുക.

യഹോവ: ഇവിടെ ഉദ്ധരി​ച്ചി​രി​ക്കുന്ന ആവ 6:16-ന്റെ മൂല എബ്രാ​യ​പാ​ഠ​ത്തിൽ ദൈവത്തിന്റെ പേരിനെ പ്രതി​നി​ധാ​നം ചെയ്യുന്ന നാല്‌ എബ്രാ​യ​വ്യ​ഞ്‌ജ​നാ​ക്ഷ​രങ്ങൾ (അതിന്റെ ലിപ്യ​ന്ത​രണം യ്‌ഹ്‌വ്‌ഹ്‌ എന്നാണ്‌.) കാണാം.​—അനു. സി കാണുക.

സിനഗോഗുകൾ: പദാവ​ലി​യിൽ “സിന​ഗോഗ്‌” കാണുക.

എല്ലാ ശബത്തി​ലും ചെയ്യാ​റു​ള്ള​തു​പോ​ലെ: തെളി​വു​കൾ സൂചി​പ്പി​ക്കു​ന്ന​ത​നു​സ​രിച്ച്‌ ബാബി​ലോ​ണി​യൻ പ്രവാ​സ​ത്തി​നു മുമ്പുള്ള കാലത്ത്‌ ജൂതന്മാർ ശബത്ത്‌ ആചരി​ക്കാൻ സിന​ഗോ​ഗു​ക​ളിൽ കൂടി​വ​ന്നി​ട്ടില്ല. സാധ്യ​ത​യ​നു​സ​രിച്ച്‌, എസ്രയു​ടെ​യും നെഹമ്യ​യു​ടെ​യും കാലം​മു​ത​ലാണ്‌ അങ്ങനെ​യൊ​രു രീതി തുടങ്ങി​യത്‌. ഇത്‌ ആത്മീയ​മാ​യി പ്രയോ​ജനം ചെയ്യുന്ന ഒരു കാര്യ​മാ​യി​രു​ന്ന​തു​കൊണ്ട്‌ യേശു​വും ആ രീതി പിന്തു​ടർന്നു. യേശു ഭൂമി​യിൽ ജീവി​ച്ചി​രുന്ന കാലത്ത്‌ ഉടനീളം യേശു​വി​ന്റെ വീട്ടു​കാർക്കു നസറെ​ത്തി​ലെ സിന​ഗോ​ഗിൽ പോകുന്ന പതിവു​ണ്ടാ​യി​രു​ന്ന​താ​യി രേഖയുണ്ട്‌. ആരാധ​ന​യ്‌ക്കാ​യി ഒരുമി​ച്ചു​കൂ​ടുന്ന സമാന​മാ​യൊ​രു രീതി പിൽക്കാ​ലത്ത്‌ ക്രിസ്‌തീ​യ​സ​ഭ​യി​ലും തുടങ്ങി.

വായി​ക്കാൻ എഴു​ന്നേ​റ്റു​നി​ന്നു: സിന​ഗോ​ഗി​ലെ ആരാധ​നാ​രീ​തി വർണി​ക്കുന്ന, ലഭ്യമാ​യ​തി​ലേ​ക്കും ഏറ്റവും പഴക്കമുള്ള വിവര​ണ​മാണ്‌ ഇതെന്നു പണ്ഡിത​ന്മാർ അഭി​പ്രാ​യ​പ്പെ​ടു​ന്നു. ജൂതപാ​ര​മ്പ​ര്യം പറയു​ന്നത്‌, സിന​ഗോ​ഗി​ലേക്കു വരുന്നവർ ആ കെട്ടി​ട​ത്തിൽ പ്രവേ​ശി​ച്ചു​ക​ഴി​യു​മ്പോൾ ആദ്യം സ്വന്തമായ പ്രാർഥ​നകൾ നടത്തി​യി​രു​ന്നു എന്നാണ്‌. അതായി​രു​ന്നു പൊതു​വേ സിന​ഗോ​ഗി​ലെ ശുശ്രൂ​ഷ​യ്‌ക്കു തുടക്കം കുറി​ച്ചി​രു​ന്നത്‌. അതേത്തു​ടർന്ന്‌ ആവ 6:4-9; 11:13-21 എന്നീ ഭാഗങ്ങൾ ചൊല്ലും. പിന്നീട്‌ പൊതു​പ്രാർഥ​ന​കൾക്കുള്ള സമയമാണ്‌. അതിനു ശേഷം പട്ടിക​യ​നു​സ​രിച്ച്‌ പഞ്ചഗ്ര​ന്ഥി​യി​ലെ ഒരു ഭാഗം ഉറക്കെ വായി​ക്കും. എ.ഡി. ഒന്നാം നൂറ്റാ​ണ്ടിൽ “ശബത്തു​തോ​റും” അത്തരത്തിൽ തിരു​വെ​ഴു​ത്തു വായി​ച്ചി​രു​ന്ന​താ​യി പ്രവൃ 15:21 പറയുന്നു. ശുശ്രൂ​ഷ​യു​ടെ അടുത്ത ഘട്ടം, പ്രവച​ന​പു​സ്‌ത​ക​ത്തി​ലെ ഒരു ഭാഗം വായിച്ച്‌ അതിൽനി​ന്നുള്ള ഒരു പാഠം വിശദീ​ക​രി​ക്കു​ന്ന​താ​യി​രു​ന്നു. സാധ്യ​ത​യ​നു​സ​രിച്ച്‌ അതെക്കു​റി​ച്ചാണ്‌ ഈ വാക്യം പറയു​ന്നത്‌. വായി​ക്കു​ന്ന​യാൾ പൊതു​വേ നിന്നു​കൊ​ണ്ടാണ്‌ അതു ചെയ്‌തി​രു​ന്നത്‌. ഏതു പ്രവച​ന​ഭാ​ഗം വായി​ക്ക​ണ​മെന്നു തീരു​മാ​നി​ക്കാൻ അദ്ദേഹ​ത്തി​നു കുറെ​യൊ​ക്കെ സ്വാത​ന്ത്ര്യ​മു​ണ്ടാ​യി​രു​ന്നെന്നു തോന്നു​ന്നു.

യശയ്യ പ്രവാചകന്റെ ചുരുൾ: യശയ്യയു​ടെ ചാവു​കടൽ ചുരുൾ, 17 വലിയ തുകൽക്ക​ഷ​ണങ്ങൾ ഒന്നോ​ടൊ​ന്നു ചേർത്ത്‌ തയ്യാറാ​ക്കി​യ​താ​യി​രു​ന്നു. 54 കോള​ങ്ങ​ളുള്ള ആ ചുരു​ളിന്‌ 7.3 മീ. (24 അടി) നീളമുണ്ട്‌. സാധ്യ​ത​യ​നു​സ​രിച്ച്‌, അത്രയും നീളമുള്ള ഒരു ചുരു​ളാ​യി​രി​ക്കാം നസറെ​ത്തി​ലെ സിന​ഗോ​ഗി​ലു​ണ്ടാ​യി​രു​ന്നത്‌. ഒന്നാം നൂറ്റാ​ണ്ടിൽ ബൈബിൾഭാ​ഗങ്ങൾ അധ്യാ​യ​ങ്ങ​ളും വാക്യ​ങ്ങ​ളും ആയി തിരി​ക്കുന്ന രീതി ഇല്ലാതി​രു​ന്ന​തു​കൊണ്ട്‌ താൻ വായി​ക്കാൻ പോകുന്ന ഭാഗം യേശു​വിന്‌ അതിൽനിന്ന്‌ തിരഞ്ഞ്‌ കണ്ടുപി​ടി​ക്ക​ണ​മാ​യി​രു​ന്നു. എന്നാൽ യേശു ആ പ്രവച​ന​ഭാ​ഗം എടുത്തു എന്ന വസ്‌തുത സൂചി​പ്പി​ക്കു​ന്നതു യേശു​വി​നു ദൈവ​വ​ച​ന​ത്തി​ലെ ഭാഗങ്ങൾ വളരെ പരിചി​ത​മാ​യി​രു​ന്നു എന്നാണ്‌.

യഹോവ: ഇവിടെ ഉദ്ധരി​ച്ചി​രി​ക്കുന്ന യശ 61:1-ന്റെ മൂല എബ്രാ​യ​പാ​ഠ​ത്തിൽ ദൈവ​നാ​മത്തെ പ്രതി​നി​ധാ​നം ചെയ്യുന്ന നാല്‌ എബ്രാ​യ​വ്യ​ഞ്‌ജ​നാ​ക്ഷ​രങ്ങൾ (അതിന്റെ ലിപ്യ​ന്ത​രണം യ്‌ഹ്‌വ്‌ഹ്‌ എന്നാണ്‌.) കാണാം.​—അനു. സി കാണുക.

യഹോവ എന്നെ അഭി​ഷേകം ചെയ്‌ത​തി​നാൽ ദൈവ​ത്തി​ന്റെ ആത്മാവ്‌: ലൂക്കോസ്‌ ഇവിടെ യശയ്യ പ്രവച​ന​ത്തി​ന്റെ സെപ്‌റ്റു​വ​ജിന്റ്‌ ഭാഷാ​ന്ത​ര​ത്തിൽനി​ന്നാണ്‌ ഉദ്ധരി​ച്ചി​രി​ക്കു​ന്നത്‌. അവിടെ ദൈവ​നാ​മം ഒരു പ്രാവ​ശ്യ​മേ കാണു​ന്നു​ള്ളൂ. എന്നാൽ യേശു ഈ ഭാഗം വായി​ച്ചത്‌ യശയ്യ പ്രവച​ന​ത്തി​ന്റെ (61:1, 2) എബ്രാ​യ​പാ​ഠ​ത്തിൽനി​ന്നാ​യി​രി​ക്കാം. അവിടെ ദൈവ​നാ​മത്തെ പ്രതി​നി​ധാ​നം ചെയ്യുന്ന നാല്‌ എബ്രാ​യ​വ്യ​ഞ്‌ജ​നാ​ക്ഷ​രങ്ങൾ (അതിന്റെ ലിപ്യ​ന്ത​രണം യ്‌ഹ്‌വ്‌ഹ്‌ എന്നാണ്‌) രണ്ടിടത്ത്‌ കാണു​ന്നുണ്ട്‌. ക്രിസ്‌തീയ ഗ്രീക്കു​തി​രു​വെ​ഴു​ത്തു​ക​ളു​ടെ പല എബ്രാ​യ​പ​രി​ഭാ​ഷ​ക​ളി​ലും (അനു. സി-യിൽ J7, 8, 10, 13-15 എന്നു സൂചി​പ്പി​ച്ചി​രി​ക്കു​ന്നു.) ദൈവ​നാ​മം ആ രണ്ടു സ്ഥലങ്ങളി​ലും കാണാം.

ബന്ദിക​ളോ​ടു സ്വാത​ന്ത്ര്യം ലഭിക്കു​മെന്നു പ്രഖ്യാ​പി​ക്കാൻ: യേശു യശയ്യ പ്രവച​ന​ത്തിൽനിന്ന്‌ ഉദ്ധരിച്ച ഈ ഭാഗം ചില ജൂതന്മാർ അക്ഷരാർഥ​ത്തി​ലാ​യി​രി​ക്കാം മനസ്സി​ലാ​ക്കി​യത്‌. (യശ 61:1) എന്നാൽ യേശു​വി​ന്റെ ശുശ്രൂ​ഷ​യു​ടെ ലക്ഷ്യം, ആളുകളെ ആത്മീയ​മായ ബന്ധനത്തിൽനിന്ന്‌ വിടു​വി​ക്കുക എന്നതാ​യി​രു​ന്നു. അതു​കൊ​ണ്ടു​തന്നെ യേശു പ്രഖ്യാ​പി​ച്ചത്‌ ആത്മീയാർഥ​ത്തി​ലുള്ള സ്വാത​ന്ത്ര്യ​മാണ്‌. സാധ്യ​ത​യ​നു​സ​രിച്ച്‌, ഈ പ്രവച​ന​ത്തി​നും അതിനെ തന്റെ ശുശ്രൂ​ഷ​യു​മാ​യി ബന്ധിപ്പിച്ച യേശു​വി​ന്റെ വാക്കു​കൾക്കും ജൂബിലി വർഷവു​മാ​യി ബന്ധമുണ്ട്‌. എല്ലാ 50-ാം വർഷവും ആചരി​ച്ചി​രുന്ന ജൂബി​ലി​യു​ടെ സമയത്ത്‌ ദേശ​മെ​ങ്ങും സ്വാത​ന്ത്ര്യം പ്രഖ്യാ​പി​ക്കുന്ന രീതി​യു​ണ്ടാ​യി​രു​ന്നു.​—ലേവ 25:8-12.

യഹോ​വ​യു​ടെ: ഇവിടെ ഉദ്ധരി​ച്ചി​രി​ക്കുന്ന യശ 61:2-ന്റെ മൂല എബ്രാ​യ​പാ​ഠ​ത്തിൽ ദൈവ​നാ​മത്തെ പ്രതി​നി​ധാ​നം ചെയ്യുന്ന നാല്‌ എബ്രാ​യ​വ്യ​ഞ്‌ജ​നാ​ക്ഷ​രങ്ങൾ (അതിന്റെ ലിപ്യ​ന്ത​രണം യ്‌ഹ്‌വ്‌ഹ്‌ എന്നാണ്‌.) കാണാം.​—അനു. സി കാണുക.

യഹോ​വ​യു​ടെ പ്രസാ​ദ​വർഷം: അഥവാ “യഹോ​വ​യ്‌ക്കു സ്വീകാ​ര്യ​മായ വർഷം.” യേശു ഇവിടെ യശ 61:1, 2-ൽനിന്ന്‌ ഉദ്ധരി​ക്കു​ക​യാ​യി​രു​ന്നു. ഈ പ്രവച​ന​ഭാ​ഗം തന്നിൽ നിറ​വേ​റു​ന്ന​താ​യി യേശു പറഞ്ഞു. താൻ ചെയ്‌തു​കൊ​ണ്ടി​രി​ക്കുന്ന രക്ഷയുടെ ശുശ്രൂഷ യഹോ​വ​യു​ടെ ‘പ്രസാ​ദ​ത്തി​ന്റെ’ ‘വർഷത്തി​നു’ തുടക്കം കുറി​ച്ചെ​ന്നും അതോടെ ആളുക​ളിൽ പ്രസാ​ദിച്ച്‌ അവരെ സ്വീക​രി​ക്കാ​നുള്ള യഹോ​വ​യു​ടെ സമയം തുടങ്ങി​യെ​ന്നും സൂചി​പ്പി​ക്കു​ക​യാ​യി​രു​ന്നു യേശു. എന്നാൽ യശയ്യ പ്രവച​ന​ത്തി​ലെ തുടർന്നുള്ള വാക്കുകൾ ‘ദൈവം പ്രതി​കാ​രം ചെയ്യുന്ന (താരത​മ്യേന ഹ്രസ്വ​മായ) ദിവസ​ത്തെ​ക്കു​റിച്ച്‌’ പറയു​ന്നു​ണ്ടെ​ങ്കി​ലും യേശു ആ ഭാഗം വായി​ച്ചില്ല. രക്ഷയ്‌ക്കാ​യി തന്നി​ലേക്കു തിരി​യു​ന്ന​വ​രിൽ ദൈവം പ്രസാ​ദി​ക്കുന്ന താരത​മ്യേന ദീർഘ​മായ ‘പ്രസാ​ദ​വർഷ​ത്തിൽ’ ആളുക​ളു​ടെ ശ്രദ്ധ പിടി​ച്ചു​നി​റു​ത്താ​നാ​യി​രി​ക്കാം യേശു അതെക്കു​റിച്ച്‌ മാത്രം വായി​ച്ചത്‌.​—ലൂക്ക 19:9, 10; യോഹ 12:47.

ഇരുന്നു: ഇങ്ങനെ ചെയ്‌ത​തി​ലൂ​ടെ, താൻ സംസാ​രി​ക്കാൻപോ​കു​ക​യാ​ണെന്നു സൂചി​പ്പി​ക്കു​ക​യാ​യി​രു​ന്നു യേശു. സിന​ഗോ​ഗിൽ കൂടി​വ​ന്ന​വ​രു​ടെ മുന്നിൽ നിന്ന്‌ വായി​ക്കുന്ന ഒരാൾ തിരിച്ച്‌ തന്റെ ഇരിപ്പി​ട​ത്തിൽ പോയി ഇരിക്കു​ന്ന​തി​നു പകരം അവി​ടെ​യുള്ള ‘എല്ലാവർക്കും’ കാണാ​വുന്ന ഒരിടത്ത്‌ ഇരുന്ന്‌ പഠിപ്പി​ക്കു​ന്ന​താ​യി​രു​ന്നു അന്നത്തെ രീതി.​—മത്ത 5:1-ന്റെ പഠനക്കു​റി​പ്പു താരത​മ്യം ചെയ്യുക.

പഴഞ്ചൊല്ല്‌: അഥവാ “പഴമൊ​ഴി; ദൃഷ്ടാ​ന്തകഥ; ദൃഷ്ടാന്തം.” ഇതിന്റെ ഗ്രീക്കു​പ​ദ​മായ പരബൊ​ളേ​യു​ടെ അക്ഷരാർഥം “അരികിൽ (ചേർത്ത്‌) വെക്കുക” എന്നാണ്‌. ഇതിന്‌ ഒരു ദൃഷ്ടാ​ന്ത​ക​ഥ​യെ​യോ പഴഞ്ചൊ​ല്ലി​നെ​യോ ദൃഷ്ടാ​ന്ത​ത്തെ​യോ അർഥമാക്കാനാകും.​—മത്ത 13:3-ന്റെ പഠനക്കു​റി​പ്പു കാണുക.

മൂന്നു വർഷവും ആറു മാസവും: വരൾച്ച അവസാ​നി​ക്കു​ന്ന​തി​നെ​ക്കു​റിച്ച്‌ ഏലിയ പ്രഖ്യാ​പി​ച്ചത്‌ “മൂന്നാം വർഷം” ആണെന്നു 1രാജ 18:1 പറയുന്നു. അതു​കൊ​ണ്ടു​തന്നെ യേശുവിന്റെ വാക്കുകൾ 1 രാജാ​ക്ക​ന്മാ​രി​ലെ വിവര​ണ​വു​മാ​യി യോജി​ക്കു​ന്നി​ല്ലെ​ന്നാ​ണു ചിലരു​ടെ വാദം. എന്നാൽ വരൾച്ച മൂന്നു വർഷത്തിൽ താഴെ മാത്രമേ നീണ്ടു​നി​ന്നു​ള്ളൂ എന്ന്‌ എബ്രാ​യ​തി​രു​വെ​ഴു​ത്തു​ക​ളി​ലെ ആ വിവരണം സൂചി​പ്പി​ക്കു​ന്നില്ല എന്നതാണു സത്യം. സാധ്യ​ത​യ​നു​സ​രിച്ച്‌, “മൂന്നാം വർഷം” എന്നു പറഞ്ഞി​രി​ക്കുന്ന കാലഘട്ടം കണക്കു​കൂ​ട്ടേ​ണ്ടത്‌ ഏലിയ ആഹാബി​നോ​ടു വരൾച്ച​യെ​ക്കു​റിച്ച്‌ ആദ്യമാ​യി പ്രഖ്യാ​പിച്ച സമയം​മു​ത​ലാണ്‌. (1രാജ 17:1) ഏലിയ ഇക്കാര്യം രാജാ​വി​നോ​ടു പറയു​ന്ന​തി​നു മുമ്പു​തന്നെ വേനൽക്കാ​ലം തുടങ്ങി​യി​ട്ടു​ണ്ടാ​കും. സാധാ​ര​ണ​ഗ​തി​യിൽ ആറു മാസം നീളുന്ന വേനൽ ഇത്തവണ പതിവി​ലും നീണ്ടി​രി​ക്കാ​നും സാധ്യ​ത​യുണ്ട്‌. ഇനി, വരൾച്ച അവസാ​നി​ച്ചത്‌ ഏലിയ “മൂന്നാം വർഷം” ആഹാബിന്റെ മുന്നിൽ വീണ്ടും ചെന്ന ഉടനെ അല്ല, മറിച്ച്‌ കർമേൽ പർവത​ത്തിൽവെച്ച്‌ നടന്ന അഗ്നിപ​രി​ശോ​ധ​ന​യ്‌ക്കു ശേഷമാണ്‌ എന്നതും ഓർക്കുക. (1രാജ 18:18-45) അതു​കൊണ്ട്‌ ഇവിടെ കാണുന്ന യേശുവിന്റെ വാക്കു​ക​ളും യാക്ക 5:17-ൽ ക്രിസ്‌തുവിന്റെ അർധസ​ഹോ​ദ​ര​നായ യാക്കോബ്‌ രേഖ​പ്പെ​ടു​ത്തി​യി​രി​ക്കുന്ന സമാന​മായ വാക്കു​ക​ളും 1രാജ 18:1-ലെ കാലക്ക​ണ​ക്കു​മാ​യി നന്നായി യോജി​ക്കു​ന്നു.

സാരെ​ഫാത്ത്‌: ഫൊയ്‌നി​ക്യ​പ്ര​ദേ​ശത്തെ ഈ പട്ടണത്തി​ന്റെ സ്ഥാനം മെഡിറ്ററേനിയൻ തീരത്ത്‌ സീദോൻ, സോർ എന്നീ നഗരങ്ങ​ളു​ടെ ഇടയ്‌ക്കാ​യി​രു​ന്നു. ഇസ്രാ​യേ​ല്യ​രു​ടെ പ്രദേ​ശ​ത്തി​നു വെളി​യി​ലാ​യി​രു​ന്നു അത്‌. അതിന്റെ ഗ്രീക്കു​പേര്‌ സരെപ്‌ത എന്നായി​രു​ന്നു. 1രാജ 17:9, 10; ഓബ 20 എന്നീ വാക്യ​ങ്ങ​ളിൽ അതിന്റെ എബ്രാ​യ​പേര്‌ കാണാം. ആധുനിക ലബാ​നോ​നി​ലെ സരഫന്റ്‌ എന്ന സ്ഥലപ്പേ​രി​ലൂ​ടെ ആ പേര്‌ ഇന്നും നിലനി​ന്നു​പോ​രു​ന്നു. സീദോന്‌ ഏതാണ്ട്‌ 13 കി.മീ. തെക്കു​പ​ടി​ഞ്ഞാ​റാ​യാണ്‌ സരഫന്റി​ന്റെ സ്ഥാനം. എന്നാൽ മെഡിറ്ററേനിയൻ തീരത്ത്‌ സ്ഥിതി ചെയ്‌തി​രുന്ന പുരാതന സാരെ​ഫാത്ത്‌ പട്ടണത്തി​ന്റെ സ്ഥാനം സരഫന്റിൽനിന്ന്‌ കുറച്ച്‌ ദൂരെ​യാ​യി​രു​ന്നി​രി​ക്കാം.​—അനു. ബി10 കാണുക.

ശുദ്ധീ​ക​രി​ക്ക​പ്പെ​ട്ടത്‌: അഥവാ “സുഖം പ്രാപി​ച്ചത്‌.” നയമാന്റെ കുഷ്‌ഠ​രോ​ഗം മാറി​യ​തി​നെ​ക്കു​റി​ച്ചാണ്‌ ഇവിടെ പറയു​ന്നത്‌. (2രാജ 5:3-10, 14) ഒരാൾക്ക്‌ ഈ അസുഖം ബാധി​ച്ചാൽ, മോശ​യു​ടെ നിയമ​മ​നു​സ​രിച്ച്‌ അയാൾ ആചാര​പ​ര​മാ​യി അശുദ്ധ​നാ​കു​മാ​യി​രു​ന്നു. (ലേവ 13:1-59) അതു​കൊ​ണ്ടു​തന്നെ കുഷ്‌ഠം ഭേദമാ​കു​ന്ന​തി​നെ​ക്കു​റിച്ച്‌ പറയു​ന്നി​ടത്ത്‌ ഈ ഗ്രീക്കു​പ​ദ​പ്ര​യോ​ഗം മിക്ക​പ്പോ​ഴും ഉപയോ​ഗി​ക്കാ​റുണ്ട്‌.​—മത്ത 8:3; 10:8; മർ 1:40, 41.

യേശു​വി​നെ തലകീ​ഴാ​യി തള്ളിയി​ടാ​നാ​യി​രു​ന്നു: ജൂതപാ​ര​മ്പ​ര്യ​മ​നു​സ​രിച്ച്‌, കുറ്റക്കാ​ര​നെന്നു കണ്ടെത്തിയ ഒരാളെ ചെങ്കു​ത്തായ ഒരു മലയുടെ മുകളിൽനിന്ന്‌ താഴേക്കു തള്ളിയി​ടുന്ന രീതി​യു​ണ്ടാ​യി​രു​ന്നെന്ന്‌ പിൽക്കാ​ലത്ത്‌ താൽമൂ​ദിൽ രേഖ​പ്പെ​ടു​ത്തി​യി​ട്ടുണ്ട്‌. മരി​ച്ചെന്ന്‌ ഉറപ്പാ​ക്കാൻ അയാളെ കല്ലെറി​യു​മാ​യി​രു​ന്നെ​ന്നും അതു പറയുന്നു. നസറെ​ത്തി​ലെ ജനക്കൂ​ട്ട​ത്തി​ന്റെ പദ്ധതി അതായി​രു​ന്നോ എന്ന്‌ അറിയി​ല്ലെ​ങ്കി​ലും യേശു​വി​നെ കൊല്ല​ണ​മെ​ന്നു​ത​ന്നെ​യാ​യി​രു​ന്നു അവരുടെ ഉദ്ദേശ്യം.

കഫർന്ന​ഹൂം: “നഹൂമിന്റെ ഗ്രാമം” അഥവാ “ആശ്വാസത്തിന്റെ ഗ്രാമം” എന്ന്‌ അർഥമുള്ള ഒരു എബ്രാ​യ​പേ​രിൽനിന്ന്‌ വന്നിരി​ക്കു​ന്നത്‌. (നഹൂ 1:1, അടിക്കു​റിപ്പ്‌) യേശുവിന്റെ ഭൗമി​ക​ശു​ശ്രൂ​ഷ​യിൽ വളരെ​യ​ധി​കം പ്രാധാ​ന്യ​മു​ണ്ടാ​യി​രുന്ന ഒരു നഗരം. ഗലീലക്കടലിന്റെ വടക്കു​പ​ടി​ഞ്ഞാ​റേ തീരത്ത്‌ സ്ഥിതി​ചെ​യ്‌തി​രുന്ന ഈ നഗരത്തെ മത്ത 9:1-ൽ യേശുവിന്റെ ‘സ്വന്തം നഗരം’ എന്നാണു വിളി​ച്ചി​രി​ക്കു​ന്നത്‌. സമു​ദ്ര​നി​ര​പ്പിൽനിന്ന്‌ 200 മീറ്ററി​ലേറെ (650 അടി) താഴ്‌ന്ന പ്രദേ​ശ​മാ​യി​രു​ന്നു കഫർന്ന​ഹൂം. നസറെ​ത്താ​കട്ടെ, സമു​ദ്ര​നി​ര​പ്പിൽനിന്ന്‌ ഏതാണ്ട്‌ 360 മീ. (1,200 അടി) ഉയരത്തി​ലും. അതു​കൊണ്ട്‌, യേശു കഫർന്ന​ഹൂ​മി​ലേക്ക്‌ “ഇറങ്ങി​ച്ചെന്നു” എന്നാണു ഗ്രീക്കു​പാ​ഠ​ത്തിൽ കാണു​ന്നത്‌.

അശുദ്ധാ​ത്മാവ്‌: അഥവാ “അശുദ്ധ​മായ ഭൂതാ​ത്മാവ്‌.”​—പദാവ​ലി​യിൽ “ആത്മാവ്‌” കാണുക.

അങ്ങയ്‌ക്ക്‌ ഇവിടെ എന്തു കാര്യം?: മത്ത 8:29-ന്റെ പഠനക്കു​റി​പ്പു കാണുക.

ശിമോ​ന്റെ അമ്മായി​യമ്മ: അതായത്‌ പത്രോ​സി​ന്റെ അമ്മായി​യമ്മ. പത്രോ​സി​നെ കേഫ എന്നും വിളി​ച്ചി​രു​ന്നു. (യോഹ 1:42) കേഫ വിവാ​ഹി​ത​നാ​ണെന്നു സൂചി​പ്പി​ക്കുന്ന 1കൊ 9:5-ലെ പൗലോ​സി​ന്റെ വാക്കു​ക​ളും ഇതുമാ​യി യോജി​ക്കു​ന്നു. തെളി​വ​നു​സ​രിച്ച്‌, പത്രോ​സും സഹോ​ദ​ര​നായ അന്ത്ര​യോ​സും താമസി​ച്ചി​രുന്ന വീട്ടിൽത​ന്നെ​യാ​ണു പത്രോ​സി​ന്റെ അമ്മായി​യ​മ്മ​യും താമസി​ച്ചി​രു​ന്നത്‌.​—മർ 1:29-31; പത്രോസ്‌ അപ്പോ​സ്‌ത​ലന്റെ വ്യത്യ​സ്‌ത​പേ​രു​ക​ളെ​ക്കു​റിച്ച്‌ വിശദീ​ക​രി​ച്ചി​രി​ക്കുന്ന മത്ത 10:2-ന്റെ പഠനക്കു​റി​പ്പു കാണുക.

കടുത്ത പനി പിടിച്ച്‌: പത്രോ​സി​ന്റെ അമ്മായി​യമ്മ ‘പനി പിടിച്ച്‌ കിടക്കു​ക​യാ​യി​രു​ന്നു’ എന്ന്‌ മത്തായി​യും മർക്കോ​സും പറഞ്ഞി​ട്ടുണ്ട്‌. (മത്ത 8:14; മർ 1:30) എന്നാൽ അതു ‘കടുത്ത പനിയാ​യി​രു​ന്നെന്ന്‌’ പറഞ്ഞ്‌ രോഗ​ത്തി​ന്റെ ഗുരു​ത​രാ​വ​സ്ഥ​യി​ലേക്കു ശ്രദ്ധ ക്ഷണിക്കു​ന്നതു ലൂക്കോസ്‌ മാത്ര​മാണ്‌. ഒരു വൈദ്യ​നാ​യ​തു​കൊ​ണ്ടാ​യി​രി​ക്കാം അദ്ദേഹം ഇക്കാര്യം രേഖ​പ്പെ​ടു​ത്തി​യത്‌.​—“ലൂക്കോസ്‌​—ആമുഖം” കാണുക.

ദൃശ്യാവിഷ്കാരം

യഹൂദ്യ വിജന​ഭൂ​മി, യോർദാൻ നദിക്കു പടിഞ്ഞാറ്‌
യഹൂദ്യ വിജന​ഭൂ​മി, യോർദാൻ നദിക്കു പടിഞ്ഞാറ്‌

യോഹ​ന്നാൻ സ്‌നാ​പകൻ തന്റെ ശുശ്രൂഷ ആരംഭി​ച്ച​തും പിശാച്‌ യേശു​വി​നെ പ്രലോ​ഭി​പ്പി​ച്ച​തും ഈ തരിശു​ഭൂ​മി​യിൽവെ​ച്ചാണ്‌.

വിജന​ഭൂ​മി
വിജന​ഭൂ​മി

ബൈബി​ളിൽ വിജന​ഭൂ​മി എന്നു പരിഭാ​ഷ​പ്പെ​ടു​ത്തി​യി​രി​ക്കുന്ന മൂലഭാ​ഷാ​പ​ദങ്ങൾ (എബ്രാ​യ​യിൽ മിദ്‌ബാർ; ഗ്രീക്കിൽ എറേ​മൊസ്‌) പൊതു​വേ സൂചി​പ്പി​ക്കു​ന്നത്‌ അധികം ജനവാ​സ​മി​ല്ലാത്ത, കൃഷി ചെയ്യാത്ത സ്ഥലങ്ങ​ളെ​യാണ്‌. മരങ്ങ​ളൊ​ന്നും ഇല്ലാതെ കുറ്റി​ച്ചെ​ടി​ക​ളും പുല്ലും മാത്രം വളരുന്ന സ്ഥലങ്ങളും പുൽത്ത​കി​ടി​കൾപോ​ലും ഇതിൽപ്പെ​ടും. ഉണങ്ങി​വരണ്ട മരുഭൂ​മി​കളെ കുറി​ക്കാ​നും ഈ പദത്തി​നാ​കും. സുവി​ശേ​ഷ​ങ്ങ​ളിൽ പൊതു​വേ വിജന​ഭൂ​മി എന്നു വിളി​ച്ചി​രി​ക്കു​ന്നത്‌ യഹൂദ്യ വിജന​ഭൂ​മി​യെ ആണ്‌. യോഹ​ന്നാൻ സ്‌നാ​പകൻ ജീവി​ച്ച​തും പ്രസം​ഗ​പ്ര​വർത്തനം നടത്തി​യ​തും പിശാച്‌ യേശു​വി​നെ പ്രലോ​ഭി​പ്പി​ച്ച​തും ഇവി​ടെ​വെ​ച്ചാണ്‌.—മർ 1:12.

ദേവാ​ല​യ​ത്തി​ന്റെ മുകളി​ലെ കൈമ​തിൽ
ദേവാ​ല​യ​ത്തി​ന്റെ മുകളി​ലെ കൈമ​തിൽ

താഴേക്കു ചാടാൻ പറയു​ന്ന​തി​നു മുമ്പ്‌ സാത്താൻ യേശു​വി​നെ അക്ഷരാർഥ​ത്തിൽ “ദേവാ​ല​യ​ത്തി​ന്റെ മുകളി​ലെ കൈമ​തി​ലി​ന്മേൽ (അഥവാ “ദേവാ​ല​യ​ത്തി​ന്റെ ഏറ്റവും ഉയർന്ന ഭാഗത്ത്‌”)” നിറു​ത്തി​ക്കാ​ണും. പക്ഷേ യേശു നിന്നി​രി​ക്കാൻ സാധ്യ​ത​യുള്ള കൃത്യ​സ്ഥലം നമുക്ക്‌ അറിയില്ല. ഇവിടെ ഉപയോ​ഗി​ച്ചി​രി​ക്കുന്ന ‘ദേവാ​ലയം’ എന്ന പദത്തിനു ദേവാ​ല​യ​സ​മു​ച്ച​യത്തെ മുഴു​വ​നാ​യി കുറി​ക്കാ​നാ​കു​ന്ന​തു​കൊണ്ട്‌ യേശു നിന്നത്‌ ആലയവ​ള​പ്പി​ന്റെ തെക്കു​കി​ഴക്കേ മൂലയ്‌ക്കാ​യി​രി​ക്കാം (1). യേശു നിന്ന സ്ഥലം ദേവാ​ല​യ​സ​മു​ച്ച​യ​ത്തി​ന്റെ മറ്റൊരു മൂലയാ​യി​രി​ക്കാ​നും സാധ്യ​ത​യുണ്ട്‌. ഇതിൽ എവി​ടെ​നിന്ന്‌ വീണാ​ലും യഹോവ ഇടപെ​ട്ടി​ല്ലെ​ങ്കിൽ മരണം ഉറപ്പാ​യി​രു​ന്നു.

യശയ്യയു​ടെ വിഖ്യാ​ത​മായ ചുരുൾ
യശയ്യയു​ടെ വിഖ്യാ​ത​മായ ചുരുൾ

ചാവു​കടൽ ചുരു​ളി​ലെ യശയ്യ പുസ്‌ത​ക​ത്തി​ന്റെ ഒരു ഭാഗമാണ്‌ (1QIsa) ഇവിടെ കാണി​ച്ചി​രി​ക്കു​ന്നത്‌. ഈ ചുരുൾ ബി.സി. 125-നും ബി.സി. 100-നും ഇടയ്‌ക്കു​ള്ള​താ​ണെന്നു കരുത​പ്പെ​ടു​ന്നു. ചാവു​ക​ട​ലിന്‌ അടുത്തുള്ള ഖുംറാ​നി​ലെ ഒരു ഗുഹയിൽനിന്ന്‌ 1947-ൽ കണ്ടെടു​ത്ത​താണ്‌ ഇത്‌. യേശു നസറെ​ത്തി​ലെ സിന​ഗോഗ്‌ സന്ദർശി​ച്ച​പ്പോൾ വായിച്ച യശയ്യ 61:1, 2 വാക്യ​ങ്ങ​ളാണ്‌ ഇവിടെ എടുത്തു​കാ​ണി​ച്ചി​രി​ക്കു​ന്നത്‌. യശയ്യയു​ടെ ചാവു​കടൽ ചുരുൾ 17 തുകൽത്താ​ളു​കൾ ചേർന്ന​താ​യി​രു​ന്നു. ആ താളുകൾ ലിനൻനൂ​ലു​കൊണ്ട്‌ തുന്നി​ച്ചേർത്തി​രു​ന്നു. അവയുടെ ശരാശരി നീളം 26.4 സെന്റി​മീ​റ്റ​റും (10.3 ഇഞ്ച്‌) വീതി ഏതാണ്ട്‌ 25.2 സെന്റി​മീ​റ്റർമു​തൽ (ഏതാണ്ട്‌ 10 ഇഞ്ച്‌) 62.8 സെന്റി​മീ​റ്റർവ​രെ​യും (ഏതാണ്ട്‌ 25 ഇഞ്ച്‌) ആയിരു​ന്നു. ഇപ്പോൾ ആ ചുരു​ളി​ന്റെ ആകെ നീളം 7.3 മീ. (24 അടി) ആണ്‌. ഇതു​പോ​ലുള്ള ഒരു ചുരു​ളിൽനി​ന്നാ​യി​രി​ക്കാം മിശി​ഹ​യെ​ക്കു​റി​ച്ചുള്ള പ്രവച​ന​ഭാ​ഗം യേശു തുറന്ന്‌ ‘എടുത്തത്‌.’ (ലൂക്ക 4:17) ആ ഭാഗത്ത്‌ ദൈവ​നാ​മത്തെ സൂചി​പ്പി​ക്കുന്ന എബ്രാ​യാ​ക്ഷ​രങ്ങൾ വരുന്ന മൂന്നു സ്ഥലങ്ങളും ഇവിടെ പ്രത്യേ​കം അടയാ​ള​പ്പെ​ടു​ത്തി​യി​ട്ടുണ്ട്‌.

കഫർന്ന​ഹൂ​മി​ലെ സിന​ഗോഗ്‌
കഫർന്ന​ഹൂ​മി​ലെ സിന​ഗോഗ്‌

ഈ ചിത്ര​ത്തിൽ കാണുന്ന വെള്ള ചുണ്ണാ​മ്പു​കൽഭി​ത്തി​കൾ എ.ഡി. രണ്ടാം നൂറ്റാ​ണ്ടി​ന്റെ അവസാ​ന​ഭാ​ഗ​ത്തി​നും അഞ്ചാം നൂറ്റാ​ണ്ടി​ന്റെ ആദ്യഭാ​ഗ​ത്തി​നും ഇടയ്‌ക്കു പണിത ഒരു സിന​ഗോ​ഗി​ന്റെ ഭാഗമാണ്‌. എന്നാൽ ഭിത്തിക്കു താഴെ കറുത്ത കൃഷ്‌ണ​ശി​ല​കൊണ്ട്‌ പണിത അടിത്ത​റ​യു​ടെ ഭാഗങ്ങൾ, ഒന്നാം നൂറ്റാ​ണ്ടി​ലെ ഒരു സിന​ഗോ​ഗി​ന്റേ​താ​ണെന്നു ചിലർ കരുതു​ന്നു. അതു സത്യ​മെ​ങ്കിൽ, യേശു ആളുകളെ ഈ സിന​ഗോ​ഗിൽവെച്ച്‌ പഠിപ്പി​ച്ചി​ട്ടു​ണ്ടാ​കും. മർ 1:23-27; ലൂക്ക 4:33-36 എന്നീ വാക്യ​ങ്ങ​ളിൽ പറഞ്ഞി​രി​ക്കുന്ന ഭൂതബാ​ധി​തനെ സുഖ​പ്പെ​ടു​ത്തി​യ​തും ഇവി​ടെ​വെ​ച്ചാ​യി​രി​ക്കാം.