Префрли се на текстот

Префрли се на споредното мени

Префрли се на содржината

Јеховини сведоци

македонски

Што навистина учи Библијата?

 ДОДАТОК

Како пророштвото на Даниел го претскажува доаѓањето на Месијата

Како пророштвото на Даниел го претскажува доаѓањето на Месијата

ПРОРОКОТ Даниел живеел повеќе од 500 години пред раѓањето на Исус. Сепак, Јехова му открил на Даниел информации врз основа на кои можело точно да се пресмета времето кога Исус ќе биде помазан, односно назначен за Месија, или  Христос. На Даниел му било речено: „Знај и разбери дека од часот кога ќе излезе речта да се обнови и повторно да се изгради Ерусалим па до Месијанскиот Водач ќе поминат седум седмици, и уште шеесет и две седмици“ (Даниел 9:25).

За да го пресметаме времето кога требало да дојде Месијата, најнапред треба да дознаеме кога започнал периодот што водел до неговото доаѓање. Според пророштвото, овој период започнал „од часот кога ќе излезе речта да се обнови и повторно да се изгради Ерусалим“. Кога ,излегла речта‘? Библискиот писател Неемија вели дека наредбата повторно да се изградат ѕидовите на Ерусалим излегла „во дваесеттата  година на цар Артаксеркс“ (Неемија 2:1, 5-8). Историчарите потврдуваат дека првата полна година во која владеел Артаксеркс била 474 год. пр.н.е. Според тоа, 20-тата година од неговото владеење била 455 год. пр.н.е. Сега ја имаме појдовната точка за Даниеловото пророштво за Месијата, а тоа е 455 год. пр.н.е.

Даниел покажува колку ќе трае тој период што ќе води до доаѓањето на „Месијанскиот Водач“. Во пророштвото се спомнуваат „седум седмици, и уште шеесет и две седмици“ — што значи, вкупно 69 седмици. Колку време е тоа? Некои библиски преводи велат дека не се работи за седмици од по седум дена, туку за седмици што се состојат од години. Тоа значи дека секоја седмица означува седум години. На Евреите од старо време им бил познат овој концепт за седмици што се состојат од години, односно периоди од по седум години. На пример, секоја седма година била година за одмор (2. Мојсеева 23:10, 11). Според тоа, пророчките 69 седмици се состојат од 69 периоди од по 7 години, што вкупно изнесува 483 години.

Сега треба само уште да пресметаме. Ако на 455 год. пр.н.е. додадеме 483 години, ќе дојдеме до 29 год. од н.е. Токму таа година Исус се крстил и станал Месија! * (Лука 3:1, 2, 21, 22). Зарем не сме воодушевени од ваквото исполнување на ова библиското пророштво?

^ пас. 2 Од 455 год. пр.н.е. до 1 год. пр.н.е. поминале 454 години. Од 1 год. пр.н.е. до 1 год. од н.е. поминала една година (бидејќи не постои нулта година). А од 1 год. од н.е. до 29 год. од н.е. поминале 28 години. Кога ќе ги собереме овие три броја, добиваме вкупно 483 години. Исус бил „погубен“ во 33 год. од н.е., додека траела 70-тата седмица од години (Даниел 9:24, 26). Види во книгите Обрни внимание на Даниеловото пророштво!, 11. поглавје, и Увид во Светото писмо, том 2, страници 899-901 (англ.). Двете публикации се издадени од Јеховините сведоци.