Префрли се на текстот

Префрли се на споредното мени

Префрли се на содржината

Јеховини сведоци

македонски

Мојата книга со библиски приказни

Приказна 111: Едно момче заспало

Приказна 111: Едно момче заспало

ЛЕЛЕ! Што се случило? Дали момчето кое лежи на земја е сериозно повредено? Гледај, меѓу луѓето што излегуваат од куќата е и Павле! Го гледаш ли и Тимотеј? Дали момчето паднало од прозорецот?

Павле доаѓа да го воскресне Ефтих

Да, токму тоа се случило. Павле држел говор пред учениците во Троада. Тој знаел дека нема да ги види долго време затоа што следниот ден морал да замине со брод. Затоа продолжил да зборува сѐ до полноќ.

Ова момче, кое се вика Ефтих, седело на прозорецот. Но, заспало и паднало од прозорецот на третиот кат! Затоа луѓето изгледаат толку загрижени. Кога го подигнале момчето, виделе дека се случило најлошото. Било мртво!

Кога Павле видел дека момчето е мртво, легнал врз него и го прегрнал. Потоа рекол: 'Не грижете се. Тој е жив!‘ И навистина бил жив! Тоа било чудо! Павле го оживеал! Сите присутни неизмерно се израдувале.

Сите повторно се качиле горе и вечерале. Павле продолжил да зборува сѐ до зори. Но можеш да бидеш сигурен дека Ефтих не заспал повторно! Потоа Павле, Тимотеј и оние што патувале со нив се качиле на брод. Знаеш ли каде отишле?

Кратко пред тоа, Павле завршил со своето трето проповедничко патување, па тргнал на пат за дома. На тоа патување, само во градот Ефес Павле останал три години. Затоа третото патување траело уште подолго од второто.

Откако ја напуштил Троада, бродот стоел некое време во Милет. Бидејќи Ефес не бил многу далеку, Павле порачал да дојдат во Милет старешините од ефеското собрание за да може да разговара со нив за последен пат. Потоа, кога дошло време бродот да замине, тие биле многу тажни додека гледале како Павле си оди.

Конечно, бродот стигнал во Цезареја. Додека Павле престојувал во домот на ученикот Филип, пророкот Агав го предупредил. Тој рекол дека Павле ќе стане затвореник кога ќе се врати во Ерусалим. Токму тоа и се случило. Подоцна, откако две години бил во затвор во Цезареја, Павле бил испратен во Рим за да излезе на суд пред цезарот (така се викал римскиот владетел). Ајде да видиме што се случило на патот за Рим.

Дела, поглавја 19-26.



Прашања

  • Кое е момчето што лежи на земја на сликата, и што му се случило?
  • Што направил Павле кога видел дека момчето е мртво?
  • Каде отишле Павле, Тимотеј и оние што патувале со нив, и што се случило кога застанале кај Милет?
  • Какво предупредување му дал на Павле пророкот Агав, и на кој начин се случило токму така како што рекол пророкот?

Дополнителни прашања

  • Прочитај Дела 20:7-38.

    Како можеме да останеме 'чисти од крвта на сите‘, според зборовите на Павле, запишани во Дела 20:26, 27? (Езек. 33:8; Дела 18:6, 7).

    Зошто старешините треба да 'се држат за веродостојните зборови‘ кога поучуваат? (Дела 20:17, 29, 30; Тит 1:7-9; 2. Тим. 1:13).

  • Прочитај Дела 26:24-32.

    Како успеал Павле, со помош на своето римско државјанство, да ја исполни задачата да проповеда, која ја добил од Исус? (Дела 9:15; 16:37, 38; 25:11, 12; 26:32; Лука 21:12, 13).