НА „ЗЕЛЕНИОТ ОСТРОВ“ се наоѓаат две држави: поголемата е независна Република Ирска, а помалата е Северна Ирска, која е дел од Обединетото Кралство.

Поради обилните дождови, Ирска е распослана со прекрасни зелени предели, по што и го добила името „Зелениот Остров“. Меѓу убавините што го красат овој остров се и живописните езера и реки, како и планините и ридовите нанижани покрај брегот.

Ирскиот народ е прилично напатен. На пример, се проценува дека во периодот помеѓу 1845 и 1851 год., околу еден милион луѓе умреле од глад и болести како резултат на пламеницата што ги уништила посевите со компир. Спас од бедата мнозина побарале во други земји, како Австралија, Британија, Канада и САД. Денес околу 35 милиони Американци се со ирски корени.

Ирците се познати како срдечни и гостољубиви луѓе. Омилена рекреација им се јавањето и екипните спортови, како што се крикет, рагби, фудбал и ирски фудбал (сличен на обичниот). Кај жените омилен е камоги, екипен спорт сличен на хокеј на трева.

 Ирците многу сакаат и да си муабетат, а музиката зазема посебно место во нивниот живот. Ирскиот танц е познат насекаде. При танцувањето, горниот дел од телото останува неподвижен, а со нозете се изведуваат брзи и прецизни движења.

Во Ирска има Јеховини сведоци веќе над сто години. Моментално, има повеќе од 6.000 Сведоци кои ги поучуваат другите за Библијата.