Матеј 28:1-20
28 Откако заврши сабатот, на првиот ден од седмицата, кога се разденуваше, Марија Магдалена и другата Марија дојдоа да го видат гробот.
2 И одеднаш се случи силен земјотрес, бидејќи Јеховин ангел слезе од небото и го отркала каменот, па седна на него.
3 Блескаше како молња, а облеката му беше бела како снег.
4 Кога го видоа, стражарите почнаа да се тресат од страв и се стаписаа.
5 А ангелот им рече на жените: „Не плашете се, зашто знам дека го барате Исус кој беше прикован на столб.
6 Не е овде, бидејќи воскресна, како што рече. Дојдете, видете го местото каде што беше неговото тело.
7 Потоа одете бргу и кажете им на неговите ученици дека стана од мртвите и речете им: ’Тој оди пред вас во Галилеја, таму ќе го видите‘. Ете, тоа имав да ви го кажам“.
8 Тогаш жените брзо си заминаа откај гробот. Уплашени, но и многу радосни, отрчаа да им го кажат тоа на неговите ученици.
9 По патот ги сретна Исус и им рече: „Здраво!“ А тие му пријдоа, му се поклонија и го фатија за нозете.
10 Тогаш Исус им рече: „Не плашете се! Одете и кажете им на моите браќа да појдат во Галилеја. Таму ќе ме видат“.
11 Кога тие две тргнаа, некои од стражарите дојдоа во градот и им раскажаа на главните свештеници за сѐ што се случи.
12 А тие се собраа со старешините за да се договорат што да прават, па им дадоа на војниците многу сребреници
13 и им рекоа: „Вака кажете: ’Неговите ученици дојдоа ноќта и го украдоа додека ние спиевме‘.
14 А ако тоа дојде до ушите на управителот, вие не грижете се, ние ќе му објасниме сѐ“.*
15 И тие ги зедоа сребрениците и направија како што им беше кажано. Така оваа приказна се рашири меѓу Евреите и остана до ден-денес.
16 А 11-те ученици отидоа во Галилеја на гората каде што ги упати Исус.
17 Кога го видоа, му се поклонија. Но некои се посомневаа дека тоа е тој.
18 Исус им пријде и им рече: „Дадена ми е сета власт на небото и на земјата.
19 Затоа одете и правете ученици од луѓето од сите народи. Крштавајте ги во името на Таткото и на Синот и на светиот дух
20 и учете ги да држат сѐ што ви заповедав. И знајте дека јас ќе бидам со вас во сите денови сѐ до крајот на овој свет“.*
Фусноти
^ Или: „ќе го убедиме“.
