Водечкото тело го сочинува една мала група зрели христијани кои им даваат водство на Јеховините сведоци во целиот свет. Тие имаат две главни задачи:

•   Го надгледуваат подготвувањето на библиските упатства кои излегуваат во публикациите и кои се разгледуваат на состаноците и школите на Јеховините сведоци (Лука 12:42).

•   Го надгледуваат меѓународното дело на Јеховините сведоци така што го организираат проповедањето и одредуваат како да се користат доброволните прилози.

 Водечкото тело го следи примерот на „апостолите и старешините во Ерусалим“, кои во првиот век носеле важни одлуки во корист на целото христијанско собрание (Дела 15:2). Исто како тие верни мажи, членовите на Водечкото тело не се водачи на нашата организација. Тие дозволуваат да ги води Божјата Реч и признаваат дека Јехова Бог го поставил Исус Христос како глава на собранието (1. Коринќаните 11:3; Ефешаните 5:23).

Кои се членови на Водечкото тело?

 Членови на Водечкото тело се: Гејџ Флигл, Герит Леш, Дејвид Сплејн, Кенет Кук, Марк Сандерсон, Семјуел Херд, Стивен Лет, Џејкоб Рамф, Џефри Виндер, Џефри Џексон и Џоди Џејдли. Тие служат во нашето главно седиште во Ворвик (Њујорк, САД).

Како е организирано Водечкото тело?

 Водечкото тело има формирано шест одбори кои надгледуваат различни активности поврзани со нашето дело. Секој член служи во еден или во повеќе од овие одбори.

•   Одбор на координатори: Води сметка за правните аспекти и ги координира работите во случај на катастрофи, во ситуации кога Јеховините сведоци се прогонувани поради своите верски убедувања или во други вонредни ситуации во кои може да се најдат Јеховините сведоци.

•   Одбор за персонал: Се грижи за сите работи поврзани со членовите на бетелските семејства.

•   Одбор за издавање: Се грижи за печатењето и доставувањето на библиската литература, и ја надгледува изградбата на сали за состаноци, преведувачки канцеларии и подружници.

•   Одбор за служба: Го надгледува проповедањето на добрата вест за Царството (Матеј 24:14).

•   Одбор за поучување: Се грижи за подготовката на духовните поуки што се изнесуваат на состаноците и школите, и што ги добиваме преку аудио и видеоматеријалите.

•   Одбор за пишување: Се грижи за подготовката на духовните поуки кои излегуваат во печатен формат или на нашата интернет-страница. Исто така, ја надгледува работата на преведувачките тимови.

 Освен што служат во овие одбори, секоја седмица членовите на Водечкото тело одржуваат состанок на кој ги разгледуваат потребите на организацијата. На овие состаноци, тие разговараат за она што го пишува во Библијата и го следат водството на светиот дух трудејќи се да донесуваат едногласни одлуки (Дела 15:25).

Кои се помошници на Водечкото тело?

 Тоа се христијани достојни за доверба кои им помагаат на одборите на Водечкото тело (1. Коринќаните 4:2). Тие имаат способности и искуство кои се потребни за да можат да му помагаат на одборот на кој се доделени, и присуствуваат на неговиот седмичен состанок. Иако не учествуваат кога се донесуваат одлуки, помошниците обезбедуваат додатни информации, даваат конструктивни предлози, ги спроведуваат одлуките на одборот и редовно ги проверуваат резултатите од нив. Освен тоа, можат да добијат задача од Водечкото тело да посетат разни земји во светот или да држат говори на Годишниот состанок или, пак, кога се одржува дипломирање на Школата Гилеад.