Te whakautu o te Paipera

 He kāwanatanga tūturu te Kīngitanga o te Atua, i whakatūria e Ihowā ko te Atua. Nā te mea, he kāwana te “rangatiratanga o te Atua” mai i te rangi, e kī ana hoki te Paipera, arā, te “rangatiratanga o te rangi.” (Māka 1:14, 15; Matiu 4:17) He ōrite ngā āhua o ngā kāwanatanga tangata, engari, he pai rawa atu te Kīngitanga o te Atua me ōna āhuatanga katoa.

•   Ngā Rangatira. I whakawahia e te Atua a Īhu Karaiti hei Kīngi o te Kīngitanga, ā, i hoatu ki a ia te mana kaha rawa. (Matiu 28:18) Nā te mea, he Rangatira aroha, whakapono hoki a Īhu, ka whakamahia e ia tōna mana hei pāinga mō ētahi atu. (Matiu 4:23; Māka 1:40, 41; 6:31-34; Ruka 7:11-17) I raro i te tohutohu a te Atua, i whiriwhiria e Īhu ētahi atu tāngata mai i ngā iwi katoa, kia kāwana tahi i te rangi, arā, “ka kīngi anō rātou ki runga ki te whenua.”​—Whakakitenga 5:9, 10.

•   Wā. Kāore e pērā i ngā kāwanatanga tangata, arā, ka puta mai, ka ngaro atu; “e kore e ngaro” te Kīngitanga o te Atua.​—Rāniera 2:44.

•   Ngā Tāngata. Ko ngā tāngata o tōna Kīngitanga, he tāngata whakarongo ki te Atua, ahakoa ō rātou whakapapa, tūrangawaewae rānei.​—Ngā Mahi 10:34, 35.

•   Ngā Ture. Ehara ngā ture o te Kīngitanga o te Atua i te mea whakawhiu hara anake. Ka whakapai ake hoki tēnei Kīngitanga i te āhua o āna tāngata. Hei tauira, e kī ana te Paipera: “‘Kia whakapaua tōu ngākau, tōu wairua, tōu hinengaro, ki te aroha ki te Ariki, ki tōu Atua.’ Ko te tuatahi tēnei, ko te kupu nui. He rite anō te tuarua ki tēnei, ‘Kia aroha koe ki tōu hoa tata, ānō ko koe.’” (Matiu 22:37-39) Mā te aroha o ngā tāngata o te Kīngitanga ki te Atua me ngā hoa tata hoki, e akiakina ai rātou kia whai pāinga ki ētahi atu.

•   Mātauranga. Ahakoa he tiketike ngā taumata o te Kīngitanga o te Atua, ka whakaakona anōtia ngā tāngata ka pēhea e tūtuki ai.​—Īhāia 48:17, 18.

•   Whāinga. Kāore e whakanuia ngā rangitira e te Kīngitanga o te Atua ki runga ake i ngā tāngata. Mahue kē tana tutuki i tā te Atua e hiahia ai. Ka whai wāhi anō hoki tēnei ki te kī taurangi, arā, ka noho te hunga aroha ki a ia ki runga i te whenua pararaiha.​—Īhāia 35:1, 5, 6; Matiu 6:10; Whakakitenga 21:1-4.