Мый Лондонын шуко еҥан Паддингтон районыштыжо шочынам. Мый авам да кум акам дене пырля иленам. Ачам алкоголик лийын, сандене тудо чӱчкыдын мӧҥгыштӧ лийын огыл.

Изиэм годым авам мыйым малаш вочмо деч ончыч Юмылан кумалаш туныктен. Мыйын изи Библий лийын. Тудо Псалом книга гыч гына шоген. Сем-влакым шонен луктын, мый псалом-влакым муренам. Икана ик книгаште мый тыгай шомакым лудын налынам: «Иктаж-кунам эрла огеш лий». Тиде шонымаш ушем гыч лектын огыл. Тидын деч вара мый йӱд вошт мален омыл — ончыкылык нерген тургыжланенам. Мый шоненам: «Илышын ала-могай смыслже лийшаш. Молан мый тиде тӱняшке толынам?» Мыйын колымем шуын огыл!

Мыланем оккультизм оҥай лияш тӱҥалын. Мый колышо-влак дене мутланаш тӧченам. Ме тунемше-влак дене пырля шӱгарлаш коштынна. Тыгак ме шучко фильм-влакым онченна. Тиде чот лӱдмашан лийын, но мыланна келшен.

Лу ияш годым мый уда корныш шогалынам. Мый тамакым шупшаш тӱҥалынам, да тиде мыйын привычкыш пурен. Пеш вашке мый марихуаным шупшаш тӱҥалынам. Латик ияш годым мый аракам йӱын ончалынам. Тамже мыланем келшен огыл, зато руштмаш эффектше келшен. А эше мылам кушташ да музыкым колышташ келшен. Сандене кунам кертынам, тунам тӱрлӧ касыш да йӱд клубыш коштынам. Кажне йӱдым мый пӧрт гыч шылын каенам, а эрдене гына пӧртылынам. А вес кечын, нойымым шижын, мый школыш каен омыл. А миенам гын, чӱчкыдын переменыште аракам подылынам.

Школым мый пеш уда оценке-влак дене пытаренам. Чыла тидын нерген пален налмеке, авам чот шыдешкен, вет ончыч тудо уда илышем нерген нимомат пален огыл. Тидын верч ме чот сыренна, да мый мӧҥгӧ гыч лектын каенам. Икмыняр жап мый Тони лӱман таҥем дене иленам. Тудо законым пудыртен илен да наркотик-влакым ужален. Тудо чот торжа айдеме лийын. Вашке мый мӱшкыраҥынам да латкуд ияш годым эргым ыштенам.

Марлан лекдыме йочан ӱдырамаш-влаклан приютышто илымем годым мый Иегован Таныкше-влак дене палыме лийынам. Мыланна эргым дене тиде приютышто пӧлемым пуэныт. Иегован Таныкше улшо кок ӱдырамаш южо самырык ава-влак деке толын коштын. Икана мый нунын мутланымышкышт ушненам. Танык-влак йоҥылыш улыт манын, мый ончыктынем ыле. Но нуно мыланем чыла йодышем-влаклан Библий гыч раш вашмутым ончыктеныт. Нунын поро улмышт мыланем чот келшен, сандене мый нунын дене Библийым шымлаш келшенам.

Библий гыч пален налме шинчымаш мыйын илышемым ӱмыр мучкылан вашталтен. Изинек мый колымаш деч лӱдынам. А ындыжым мый ылыжмаш нерген пален налынам! (Иоаннын 5:28, 29). Тыгак Юмо мыйым йӧрата манын, мый пален налынам (1 Петрын 5:7). Мыйын шӱмемым поснак Иеремия 29:11 гыч шомак тарватен. Тушто возымо: «Мый сайын палем, мом тыланда шонен пыштенам, — ойла Иегова. — Тыланда орлыкым огыл, а тынысым пуынем. Тыланда ончыкылык ден ӱшаным пуаш шонем». Мый рай мландыште курымеш илен кертам манын, ӱшанем лектын (Псалом 36:29).

Иегован Таныкше-влак мый декем чын йӧратымашыштым ончыктеныт. Нунын вашлиймашышкышт икымше гана толмеке, мый нунын коклаште тыныс ден шокшо йӧратымашым ужынам. Нуно чылаштат тыгай чот поро лийыныт! (Иоаннын 13:34, 35). Черкыштем мый тыгайым ужын омыл. Нуно мыланем жап ден вниманийыштым ойыреныт да полшаш тыршеныт. Мыйын кугу йӧратыше ешем уло манын, мый шижынам.

Библийым шымлен, мый умылен налынам: Юмылан йӧрышӧ лияшлан илышемым вашталташ кӱлеш. Йӧсӧ лийын гынат, мый тамакым шупшмым кудалтенам. Тыгак мый умыленам: колыштмо музык марихуаным шупшаш кумылемым вияҥда. Сандене мый тыгай музыкым колышташ чарненам. Аракам йӱаш алгаштарымаш деч кораҥашлан мый кас-влакыш да йӱд клубыш коштмым чарненам. Мый у йолташ-влакым муынам. Нуно мыланем Юмылан йӧрышӧ илыш дене илаш полшеныт (Притчи 13:20).

Тыгак Тони Иегован Таныкше-влак дене Библийым шымлаш тӱҥалын. Иегован Таныкше-влак тудын чыла йодышыжлан вашмутым Библий гыч ончыктеныт. Тыге тудо чыным муын манын умылен налын. Тудо тӱрыснек шке илышыжым вашталтен: ончычсо йолташыж-влак дене кыл кучымым чарнен, преступный илышыжым коден да марихуаным шупшмым кудалтен. Мемнан Иеговалан йӧрышӧ лиймына шуын. Эргына тичмаш ешыште кушшо манын, ме сералташ шонен пыштенна. 1982-шо ийыште ме мужыраҥынна.

Шарнем, мый «Орол башне» ден «Помыжалтса!» журналлаште * мыланем оҥай статья-влакым кычалынам. Тушто каласкалалтын, кузе еҥ-влак тыгай вашталтыш-влакым шке илышыштышт ыштен кертыныт, могайым мыят ыштынем ыле. Нине историй-влак мыйым чот кумылаҥденыт. Нуно мыйым Иеговалан йӧрышӧ лияшлан умбакыжат вийым пышташ таратеныт. Иегова мыйым ынже кодо манын, мый тудым сӧрвален йодынам. 1982-шо ийыште июль тылзын ме Тони дене пырля тынеш пуренна да Иегован Таныкше-влак лийынна.

Иегова Юмо дене йолташ лиймаш илышемым утарен. Ме Тони дене Юмын полшымыжым йӧсӧ жапыштат ужынна. Ме Иеговалан ӱшанаш тунемынна да тудын мемнан пелен эре лиймыжым да ешна верч тыршымыжым ужынна (Псалом 54:23).

Ме эрге ден ӱдырналан Иеговам йӧратен налаш полшен кертынна. Нунын икшывыштат Юмо нерген шинчымашым налын кушкыт. Тидлан мый чот куанем.

Ындыжым мый ончыкылык але колымаш нерген йӱд вошт тургыжланен ом кие. Кажне арнян тӱрлӧ погынымашыш миен, ме Тони дене пырля иза-ака-влакым пеҥгыдемдена. Нунын дене пырля ме еҥ-влаклан Иисус Христослан ӱшанаш полшена. Тидлан кӧра нуно курымеш илен кертыт.