Etal ñan katak ko ilo bok in

Etal ñan secondary menu

Etal ñan laajrak in katak ko

Ri Kõnnaan ro an Jeova

Kajin M̦ajel̦

Naan in Keeañ (Kein Katak)  |  Pãpode 2018

Wõnm̦aanl̦o̦k Wõt im Kõkajoor Jem̦jerã eo Am̦ Ippãn Jeova!

Wõnm̦aanl̦o̦k Wõt im Kõkajoor Jem̦jerã eo Am̦ Ippãn Jeova!

“Kom̦win kõtl̦o̦k bwe Jetõb Kwõjarjar en tõl mour ko ami.”​—GA. 5:16, UBS.

AL: 136, 10

1, 2. Ta eo juon jeid im jatid em̦m̦aan ear kile kõn e make, im ta eo ear kõm̦m̦ane?

ROBERT ear peptaij ke ear juon jo̦dikdik, ak ear jab lukkuun kaorõk m̦ool eo ilo mour eo an. Ej ba: “Ejjel̦o̦k men en̦ ebõd iar kõm̦m̦ane, bõtab iar karejar ñan Jeova kõnke iar limo im ear jab lukkuun itok jãn bũruõ. Iar ãinwõt juon eo elukkuun kajoor ilo tõmak kõnke aolep iien iar pãd ilo kweilo̦k ko, im iar bar akjel̦õri bainier jejjo allõñ ilo juon iiõ. Ijoke, meñe iar kõm̦m̦ani aolep men kein, ak iar kile bwe ewõr jet men ij aikuj kakõm̦anm̦anl̦o̦k ilo mour e aõ.”

2 Robert ear jab lukkuun mel̦el̦e kõn ta eo ear aikuj kakõm̦anm̦anl̦o̦k ilo mour eo an m̦ae iien eo ke ear m̦õj an m̦are. Jet iien, erro ej kõrã eo pãleen kõm̦m̦an liñña jãn Baibõl̦. Ear l̦ap an kõrã eo pãleen jel̦ã kõn Baibõl̦ im ear pidodo an uwaaki kajjitõk ko Robert ear kwal̦o̦ki. Bõtab ekkã an kar Robert jab jel̦ã uwaaki kajjitõk ko kõrã eo pãleen ej kwal̦o̦ki im ear jook. Ej ba: “Ear ãinwõt ñe iar jaje aolep men. Kõn men in iar l̦õmn̦ak ippa make im ba, ‘El̦aññe inaaj jipañ im kõkajoor tõmak eo an lio ippa ãinwõt bõran baam̦le eo am̦ro, alikkar bwe ewõr juon men ij aikuj kõm̦m̦ane.’” Im Robert ear jino kate ñan kõm̦m̦ane men in. Ej ba: “Iar lukkuun bõk aõ iien ñan katak Baibõl̦ im ke iar kõm̦m̦ane men in, ear jino l̦apl̦o̦k aõ mel̦el̦e kõn katak ko. Ekar l̦apl̦o̦k aõ mel̦el̦e men ko iar katak kaki im men eo eaorõktata ej bwe iar ejaake juon jem̦jerã epaak ippãn Jeova.”

3. (1) Ta eo jemaroñ katak jãn bwebwenato eo an Robert? (2) Ta kajjitõk ko jilu jenaaj etali ilo katak in?

 3 Elõñ men ko jemaroñ katak jãn bwebwenato eo an Robert. Bõlen jemaroñ mel̦el̦e jidik kõn kobban Baibõl̦ eo im eokkutkut ad pãd ilo kweilo̦k ko im kwal̦o̦k naan. Bõtab ilo m̦ool, ejjab mel̦el̦ein men in bwe el̦ap an kajoor tõmak eo ad, im jej lukkuun kaorõk jem̦jerã eo ad ippãn Jeova. Ak bõlen em̦õj ad ejaake juon jem̦jerã epaak ippãn Jeova ak kiiõ ñe jej bar lukkuun etale kõj make, jej kile bwe ewõr wãween ko jej aikuj kakõm̦anm̦anl̦o̦k. (Pil. 3:16, UBS) Kõn men in, ewõr jilu kajjitõk ko relukkuun aorõk jenaaj etali ilo katak in: (1) Ta eo enaaj jipañ kõj ñan jel̦ã el̦aññe jej lukkuun kaorõk jem̦jerã eo ad ippãn Jeova? (2) Ta ko jej aikuj kõm̦m̦ani ñan kõkajoorl̦o̦k jem̦jerã eo ad ippãn Jeova? (3) Ñe ekajoor jem̦jerã eo ad ippãn Jeova, ewi wãween an naaj men in jipañ kõj ilo mour ko ad kajjojo raan?

JEN ETALE KÕJ MAKE

4. Naanin kakapilõklõk eo ilo Epesõs 4:23, 24 ej ñan wõn?

4 Ke jaar jino karejar ñan Anij, elõñ oktak ko jaar aikuj kõm̦m̦ani me rar jelõt aolepen mour eo ad. Ijoke, jejjab aikuj bõjrak jãn ad kõm̦m̦an oktak meñe em̦õj ad peptaij. Baibõl̦ ej jiroñ kõj im ba: “Bũruomi im l̦õmn̦ak ko ami ren lukkuun kããl.” (Ep. 4:23, 24, UBS) Kõnke jejjab weeppãn, jej aikuj wõnm̦aanl̦o̦k wõt im kõm̦m̦an oktak ko ilo mour ko ad. Bareinwõt, meñe elõñ iiõ in ad karejar ñan Jeova, ak jej aikuj wõnm̦aanl̦o̦k wõt im kõkajoor jem̦jerã eo ad Ippãn.​—Pil. 3:12, 13, UBS.

5. Ta kajjitõk ko remaroñ jipañ kõj ñan jel̦ã ewi joñan ad kaorõk jem̦jerã eo ad ippãn Jeova?

5 Ñan kõkajoorl̦o̦k tõmak eo ad im kaorõk wõt jem̦jerã eo ad ippãn Jeova, eaorõk bwe en m̦ool ad etale kõj make. Jekdo̦o̦n ñe jedik ak jerũtto, kõj kajjojo jemaroñ kajitũkin kõj make kajjitõk kein: ‘Ij ke kile an kajoorl̦o̦k jem̦jerã eo aõ ippãn Jeova? Wãween mour e aõ ej ke kaalikkar bwe ij kate eõ bwe in ãinwõt Christ? Wãween m̦wilũ im kõm̦m̦an ko aõ ilo iien kweilo̦k ko rej kaalikkar ta kõn ña? Men ko ij bwebwenato kaki ippãn ro jet rej kaalikkar ta kõn kõn̦aan ko aõ? Wãween aõ katak Baibõl̦, nuknuk im tõreejab, im em̦m̦akũt ñan naanin kauwe ko rej kaalikkar ta kõn ña? Ewi wãween aõ em̦m̦akũt ñe ro jet rej kapoik eõ ñan kõm̦m̦ane juon men ebõd? Ij ke juon eo ekajoor ilo tõmak?’ (Ep. 4:13, UBS) Kajjitõk kein remaroñ jipañ kõj ñan jel̦ã ewi joñan ad lukkuun kaorõk jem̦jerã eo ad ippãn Jeova.

6. Ta eo emaroñ bar jipañ kõj ñan lale ñe jej lukkuun kaorõke jem̦jerã eo ad ippãn Jeova?

6 Jet iien jej aikuji an ro jet jipañ kõj ñan lale el̦aññe jej lukkuun kaorõke jem̦jerã eo ad ippãn Jeova. Rijjilõk Paul ear kõmel̦el̦e bwe juon eo ej l̦õmn̦ak kõn men ko an kanniõk, ejjab kile im mel̦el̦e bwe wãween mour eo an ejjab kabuñbũruon Anij. Bõtab, juon eo ej kaorõke jem̦jerã eo an ippãn Jeova el̦ap an mel̦el̦e kõn wãween an Jeova kalimjeki men ko rej wal̦o̦k. Bareinwõt, ejel̦ã bwe Jeova ejjab m̦õn̦õn̦õ kõn wãween mour eo an ro rej l̦õmn̦ak kõn men ko an kanniõk. (1 Ko. 2:14-16, UBS; 3:1-3, UBS) Em̦m̦aan ro rej lale eklejia me rej bõk l̦õmn̦ak ko an Christ, ekkã aer kile ñe juon ej jino l̦õmn̦ak kõn men ko an kanniõk im rej m̦õkaj im jipañ armej in. Innem el̦aññe em̦m̦aan rein rej kajjioñ jipañ kõj, jenaaj ke m̦õn̦õn̦õ in roñjake im kõm̦m̦an oktak? Eokwe el̦aññe aet, innem jej kaalikkar bwe jekõn̦aan kõkajoorl̦o̦k tõmak eo ad im jej lukkuun kaorõke jem̦jerã eo ad ippãn Jeova.​—Ekl. 7:5, 9.

KÕKAJOORL̦O̦K JEM̦JERÃ EO AM̦ IPPÃN JEOVA

7. Etke ad jel̦ã wõt kõn Baibõl̦ ejjab bwe ñan ad maroñ kõkajoor jem̦jerã eo ad ippãn Jeova?

7 Ejjab bwe ñan ad jel̦ã wõt kõn Baibõl̦ ñan kõkajoorl̦o̦k jem̦jerã eo ad ippãn Jeova. Ear l̦ap jel̦ãl̦o̦kjen̦ eo an Kiiñ Solomon kõn Jeova, im naan ko an repãd ilo Baibõl̦. Bõtab tokãlik, ear jino m̦õjn̦o̦l̦o̦k jem̦jerã eo an ippãn Jeova im ear jab dãpij wõt an tiljek. (1 Kñ. 4:29, 30; 11:4-6) Kõn men in, ta eo eaorõk im jej aikuj in bar kõm̦m̦ane ijello̦kun wõt ad jel̦ã kõn Baibõl̦? Eokwe, eaorõk bwe jen wõnm̦aanl̦o̦k wõt im kõkajoor jem̦jerã eo ad ippãn Jeova. (Kol. 2:6, 7) Ewi wãween ad maroñ kõm̦m̦ane men in?

8, 9. (1) Ta eo enaaj jipañ kõj ñan kõkajoorl̦o̦k tõmak eo ad? (2) Ta mejãnkajjik eo ad ñe jej katak Baibõl̦ im kõl̦mãnl̦o̦kjen̦ kake? (Lale pija eo ilo jinoin katak in.)

 8 Ilo raan ko an rijjilõk ro, Paul ear rõjañ Kũrjin ro bwe ren “wõnm̦aanl̦o̦k ñan katak ko rekkar ñan ro rerũtto ilo mour in Kũrjin.” (Hi. 6:1, UBS) Ewi wãween ad maroñ l̦oore naanin kakapilõklõk in ilo raan kein? Juon wãween eaorõk jemaroñ kõm̦m̦ane ej ilo ad katak kõn bok eo “Pãd Wõt ilo Yokwe eo an Anij.” Bok in enaaj jipañ eok ñan jel̦ã ewi wãween am̦ maroñ kõjerbali naanin kakapilõklõk ko jãn Baibõl̦ ilo mour eo am̦. Ñe em̦õj am̦ kõjem̦l̦o̦k bok in, elõñ bar bok ko jet kwõmaroñ katak ñan jipañ eok bwe tõmak eo am̦ en kajoor wõt. (Kol. 1:23) Eaorõk bwe jen kõl̦mãnl̦o̦kjen̦ kõn ta ko jej katak kaki, im bareinwõt kajjitõk ippãn Jeova bwe en jipañ kõj bwe jen jerbali men ko jej katak kaki.

9 Ñe jej katak kõn Baibõl̦ im kõl̦mãnl̦o̦kjen̦ kake, mejãnkajjik eo ad ej bwe en wõr juon kõn̦aan ilo bũruod ñan kabuñbũruon Jeova im pokaki kien ko an. (Sam 40:8, UBS; 119:97) Jej aikuj bar kate kõj ñan jum̦aik jabdewõt men remaroñ bõbraik kõj jãn ad kõkajoorl̦o̦k tõmak eo ad im jem̦jerã eo ad ippãn Jeova.​—Tai. 2:11, 12.

10. Ta eo jo̦dikdik ro remaroñ kõm̦m̦ane bwe en kajoorl̦o̦k jem̦jerã eo aer ippãn Jeova?

10 Ñe kwõj juon jo̦dikdik, ewõr ke am̦ mejãnkajjik ñan kal̦apl̦o̦k ijo kun̦aam̦ ñan karejar ñan Jeova? Juon jeid im jatid em̦m̦aan me ej jerbal ilo Betel̦ ekkã an kõnono ippãn jo̦dikdik ro rej pojakin peptaij ilo iien kweilo̦k el̦ap ko, im kajjitõk ippãer kõn mejãnkajjik ko aer. Em̦m̦aan in ear kile bwe elõñ iaan jo̦dikdik rein rar lukkuun kõl̦mãnl̦o̦kjen̦ kõn wãween aer naaj maroñ karejar ñan Jeova ilju im jekl̦aj. Im jet iaaer rar pepe ñan kal̦apl̦o̦k ijo kun̦aaer ak em̦m̦akũt ñan juon jikin me el̦ap aikuj rukwal̦o̦k naan ie. Bõtab jet iaan jo̦dikdik rein rar jab maroñ uwaake kajjitõk eo an em̦m̦aan in. Men in ej ke kaalikkar bwe jo̦dikdik rein rej l̦õmn̦ak bwe rejjab aikuj kõm̦m̦an aer mejãnkajjik ñan kal̦apl̦o̦k ijo kun̦aaer ilo doulul eo an Jeova? Eokwe el̦aññe kwõj juon jo̦dikdik, kajitũkin eok make: ‘Ij ke etal ñan kweilo̦k ko im bõk kun̦aõ ilo kwal̦o̦k naan kõnke jinõ im jema rej ba in kõm̦m̦ani men kein? Ak ewõr ke juon aõ make jem̦jerã epaak ippãn Anij?’ Alikkar bwe eaorõk bwe en wõr ad mejãnkajjik jekdo̦o̦n ñe jedik ak jerũtto, kõnke mejãnkajjik kein renaaj jipañ kõj ñan kõkajoorl̦o̦k tõmak eo ad im jem̦jerã eo ad ippãn Jeova.​—Ekl. 12:1, 13, UBS.

11. (1) Ta eo jej aikuj in kõm̦m̦ane bwe en kajoorl̦o̦k jem̦jerã eo ad ippãn Jeova? (2) Ta waanjoñak eo ilo Baibõl̦ jemaroñ anõke?

11 Ãlikin ad loe ta ko jej aikuj kakõm̦anm̦anl̦o̦k ilo mour ko ad, jej aikuj in jino kõm̦m̦an oktak. Joñan an aorõk, ad bõk mour indeeo ej wawa ioon ad kõm̦m̦ane men in. (Rom 8:6-8, UBS) Jeova ejjab kõtmãne bwe jen jim̦we iien otemjej, eñin unin ej letok jetõb kwõjarjar eo an ñan jipañ kõj. Meñe ãindein, ak jej aikuj in lukkuun kate kõj. Jeid im jatid John Barr, eo im ear uwaan Kumi eo Ej Lale Aolep Eklejia ko Ipel̦aakin Lal̦, ear kwal̦o̦k kõn naan ko ilo Luk 13:24 im ba: “Elõñ rar jab lo tõprak ilo aer del̦o̦ñ ilo ial̦ eo eaidik kõnke rar jab lukkuun kate er ñan kõkajoorl̦o̦k tõmak eo aer.” Kõn men in, jen ãinwõt Jekob, eo ear lukkuun kate ke ear eotaak ippãn enjel̦ eo m̦ae iien eo kar kõjeraam̦m̦ane. (Jen. 32:26-28, UBS) Innem meñe ad katak Baibõl̦ emaroñ juon men ekãitoktoklimo, ak jejjab aikuj in riit bajjek ãinwõt ad riiti bokin bwebwenato ko rekãitoktoklimo. Bõtab, jej aikuj lukkuun kate kõj ñan pukot katak ko raorõk ilo Baibõl̦ me renaaj jipañ kõj.

12, 13. (1) Ta eo enaaj jipañ kõj ñan l̦oore naanin kakapilõklõk eo ilo Rom 15:5? (2) Ewi wãween joñak eo an rijjilõk Piter im naanin kakapilõklõk eo an emaroñ jipañ kõj? (3) Ta ko kwõmaroñ kõm̦m̦ani ñan kõkajoorl̦o̦k jem̦jerã eo am̦ ippãn Jeova? (Lale bo̦o̦k eo “ Men ko Kwõmaroñ Kõm̦m̦ani ñan Kõkajoorl̦o̦k Jem̦jerã eo Am̦ Ippãn Jeova.”)

12 Ñe jej lukkuun kate kõj ñan kõkajoor jem̦jerã eo ad ippãn Jeova, jetõb kwõjarjar eo an enaaj jipañ kõj ñan ukot wãween ad l̦õmn̦ak. Im jidik kõn jidik, jemaroñ katak ñan bõk l̦õmn̦ak eo an Christ. (Rom 15:5, UBS) Jetõb kwõjarjar emaroñ jipañ kõj bwe jen julo̦k kõn̦aan ko rebõd im kwal̦o̦k kadkad ko rej kabuñbũruon Anij. (Ga. 5:16, 22, 23) Kõn men in, jejjab aikuj ebbeer el̦aññe jej lo bwe el̦ap wõt ad l̦õmn̦ak kõn men ko an kanniõk ak men ko rej kabuñbũruod. Jej aikuj wõnm̦aanl̦o̦k wõt im kajjitõk ippãn Jeova kõn jetõb kwõjarjar eo an ñan  jipañ kõj bwe jen l̦õmn̦ak kõn men ko rejim̦we. (Luk 11:13, UBS) Jen keememej joñak eo an kar rijjilõk Piter. Ewõr jet iien Piter ear jab l̦õmn̦ak ãinwõt Christ. (Matu 16:22, 23; Luk 22:34, 54-62, UBS; Ga. 2:11-14, UBS) Meñe ãindein, ak ear jab ebbeer im Jeova ear jipañe. Im jidik kõn jidik, Piter ear jino l̦õmn̦ak ãinwõt Christ im jemaroñ bar anõke joñak in an.

13 Tokãlik, Piter ear kõnnaan kõn kadkad ko rem̦m̦an me jej aikuj kate kõj ñan kwal̦o̦ki. (Riit 2 Piter 1:5-8.) Ñan waanjoñak, jej aikuj in kate kõj ñan jel̦ã irooj iood make, jel̦ã kijenmej, yokwe ro jeid im jatid im bar kwal̦o̦k kadkad ko jet rem̦m̦an. Kajjojo raan jemaroñ kajitũkin kõj make, ‘Ta kadkad ko rem̦m̦an imaroñ kate eõ ñan kwal̦o̦ki rainin me renaaj jipañ eõ im kõkajoorl̦o̦k jem̦jerã eo aõ ippãn Jeova?’

L̦OORI NAANIN KAKAPILÕKLÕK KO ILO BAIBÕL̦ AOLEP RAAN

14. Ilo ad kaorõke jem̦jerã eo ad ippãn Jeova, ewi wãween an men in naaj jipañ kõj ilo mour ko ad kajjojo raan?

14 Ñe jej bõk l̦õmn̦ak ko an Christ, men in enaaj jelõt wãween m̦wilid ilo jikin jerbal ak ilo jikin jikuul̦, wãween ad kõnono, im wãween ad kõm̦m̦ani pepe ko kajjojo raan. Pepe ko jej kõm̦m̦ani renaaj kaalikkar bwe jej anõke joñak eo an Christ. Im kõnke jej kaorõke jem̦jerã eo ad ippãn Jeova, jejjab kõn̦aan bwe jabdewõt men en ko̦kkure jem̦jerã eo ad Ippãn. Kõn men in, el̦aññe ro jet rej kajjioñ kapo kõj ñan kõm̦m̦ane juon men ebõd, ad l̦õmn̦ak ãinwõt Christ enaaj jipañ kõj ñan jum̦aik menin kapo kein. Innem m̦okta jãn ad kõm̦m̦ane juon pepe, em̦m̦an jen bõjrak im kajitũkin kõj make: ‘Ta naanin kakapilõklõk ko ilo Baibõl̦ me remaroñ jipañ eõ? Ta eo Christ enaaj kar kõm̦m̦ane el̦aññe en kar iioone wãween in? Ta eo enaaj kabuñbũruon Jeova?’ Ñan jipañ im kammineneik kõj ñan l̦õmn̦ak ilo wãween in, em̦m̦an jen lale jet waanjoñak ko kõn men ko jemaroñ aikuj kõm̦m̦an pepe kaki. Im ilo ad naaj etali waanjoñak kein, jenaaj lale naanin kakapilõklõk ko jãn Baibõl̦ me renaaj jipañ kõj ñan kõm̦m̦ane pepe eo ejim̦we.

15, 16. Ewi wãween ad bõk l̦õmn̦ak eo an Christ enaaj jipañ kõj (1) ñe jej kõm̦m̦an pepe kõn wõn eo jenaaj m̦areiki? (2) ñe jej kããlõt wõn ro jenaaj m̦õttãik er?

15 Ñe jej kõm̦m̦an pepe kõn wõn eo jenaaj m̦areiki. Naanin kakapilõklõk eo kõn men in ej pãd ilo 2 Korint 6:14, 15, UBS. (Riit.) Paul ear kaalikkar bwe juon eo ej l̦õmn̦ak kõn jem̦jerã eo an ippãn Jeova, elukkuun oktak jãn eo ej l̦õmn̦ak kõn men ko an kanniõk. Eoktak wãween aerro kalimjek men ko rej wal̦o̦k jãn doon. Innem, ewi wãween an naanin kakapilõklõk in maroñ jipañ eok ñe kwõj itõn kõm̦m̦an pepe ñan kããlõt wõn eo kwõnaaj m̦areiki?

16 Ñe jej kããlõt wõn ro jenaaj m̦õttãik er. Naanin kakapilõklõk eo kõn men in ej pãd ilo 1 Korint 15:33, UBS. (Riit.) Juon eo ej l̦õmn̦ak kõn jem̦jerã eo an ippãn Jeova eban m̦õttãik ro me remaroñ kam̦õjn̦o̦ik tõmak eo an. Em̦m̦an ñe kwõj bar l̦õmn̦ak kõn wãween am̦ maroñ kõjerbale naanin kakapilõklõk in ilo wãween ko jet. Ñan waanjoñak, ewi wãween naanin kakapilõklõk in emaroñ jipañ eok ilo am̦ kõjerbali weepjait ko armej rej illik pija ie im bwebwenato ippãn ro jet? Ewi wãween an maroñ jipañ eok ñe ro jet me kwõjaje kajjier rej kajjitõk ippam̦ ñan iukkure ippãer Online?

Pepe ko ij kõm̦m̦ani renaaj ke jipañ eõ ñan kõkajoorl̦o̦k jem̦jerã eo aõ ippãn Jeova? (Lale pãrokõrããp 17)

17-19. Ñe jej kaorõk jem̦jerã eo ad ippãn Jeova, ewi wãween an men in jipañ kõj (1) ñan kõjparok jãn m̦akũtkũt ko me remaroñ ko̦kkure jem̦jerã eo ad ippãn Jeova? (2) bwe en wõr ad mejãnkajjik ko rem̦m̦an? (3) ñan jel̦ã kõm̦adm̦õdi apañ ko rej wal̦o̦k ikõtaad im ro jet?

17 M̦akũtkũt ko me remaroñ ko̦kkure jem̦jerã eo ad ippãn Jeova. Jej loe naanin kakkõl eo kõn men in ilo Hibru 6:1, UBS. (Riit.) Ta jet iaan “jerbal  ko rewaan” jej aikuj kõjparok kõj jãni? Men kein rej jitõñl̦o̦k ñan m̦akũtkũt ko ejjel̦o̦k tokjãer me reban jipañ kõj ñan kõkajoorl̦o̦k jem̦jerã eo ad ippãn Jeova. Naanin kakapilõklõk in emaroñ jipañ kõj ñan uwaaki kajjitõk kein ãinwõt: ‘M̦akũtkũt rot in eaorõk ke im ewõr ke tokjãn? Ij aikuj ke bõk kun̦aõ im kobal̦o̦k ilo peejnej ko an ro jet? Etke ijjab aikuj kobal̦o̦k ippãn kumi in armej ro rej kajjioñ ukoti men ko rej wal̦o̦k ilo lal̦ in?’

Pepe ko ij kõm̦m̦ani renaaj ke jipañ eõ kõm̦m̦ani mejãnkajjik ko rem̦m̦an? (Lale pãrokõrããp 18)

18 Ad kõm̦m̦an mejãnkajjik ñan kal̦apl̦o̦k ijo kun̦aad ilo ad karejar ñan Jeova. Jesus ear kwal̦o̦k juon naanin kakapilõklõk em̦m̦an kõn ad kõm̦m̦an mejãnkajjik ke ear kwal̦o̦k katak eo an Ioon Tol̦ eo. (Matu 6:33) Juon eo el̦ap an kaorõke jem̦jerã eo an ippãn Jeova ej likũt Aelõñ eo m̦oktata ilo mour eo an. Innem ad keememej wõt naanin kakapilõklõk in enaaj jipañ kõj ñan uwaaki kajjitõk kein ãinwõt: ‘Ij aikuj ke wõnm̦aanl̦o̦k im pukot jel̦ãl̦o̦kjen̦ ilo jikuul̦ ko reutiejl̦o̦k ãlikin aõ kadiwõjl̦o̦k jãn high school? Ij aikuj ke bõk juon jerbal em̦m̦an me el̦ap on̦ããn?’

Pepe ko ij kõm̦m̦ani renaaj ke jipañ eõ ñan kõm̦m̦an aenõm̦m̦an ippãn ro jet? (Lale pãrokõrããp 19)

19 Ñe ej wal̦o̦k apañ ko ikõtaad im ro jet. Naanin kakapilõklõk eo an Paul ñan kar Kũrjin ro ilo Rom emaroñ jipañ kõj ñe ej wal̦o̦k apañ ko ikõtaad im ro jet. (Rom 12:18, UBS) Kõnke jej rũkal̦ooran Christ, jej kate kõj bwe jen “aenõm̦m̦an ippãn armej otemjej.” Innem ewi wãween ad em̦m̦akũt ñe ej wõr apañ ko ikõtaad im ro jet? Epen ke ad kõttãik kõj im roñjake an ro jet kwal̦o̦k l̦õmn̦ak ko aer? Ak ro jet rejel̦ã ke bwe jej kajjioñ kõm̦m̦an aenõm̦m̦an?​—Jem. 3:18.

20. Etke kokõn̦aan wõnm̦aanl̦o̦k wõt im kõkajoor jem̦jerã eo am̦ ippãn Jeova?

20 Waanjoñak kein rej kwal̦o̦k ewi wãween an naanin kakapilõklõk ko ilo Baibõl̦ maroñ jipañ kõj ñan kõm̦m̦ani pepe ko rej kam̦ool bwe jetõb kwõjarjar ej tõl kõj. Innem el̦aññe jej lukkuun kaorõke jem̦jerã eo ad ippãn Jeova, jenaaj lo m̦õn̦õn̦õ ilo mour ko ad. Robert, eo me kar kwal̦o̦k kake m̦oktal̦o̦k, ej ba: “Ãlikin aõ kar ejaake juon jem̦jerã epaak ippãn Jeova, men in ear jipañ eõ bwe in juon bõran baam̦le eo em̦m̦an im juon jemãn em̦m̦an. Iar lukkuun jokwane im m̦õn̦õn̦õ.” Kõn men in, el̦aññe jej kate kõj joñan wõt ad maroñ ñan wõnm̦aanl̦o̦k im kõkajoor jem̦jerã eo ad ippãn Jeova, elõñ tokjãn ko rem̦m̦an jenaaj bar loi. Jenaaj m̦õn̦õn̦õ ilo mour ko ad kiiõ, im ilju im jekl̦aj jenaaj bõk “mour eo em̦ool.”​—1 Ti. 6:19.