SYLVIANA, juon bainier 20 jim̦a an iiõ, ej ba: “Ke ij roñjake bwebwenato ko an ro m̦õtta me rar jipañ ilo jikin ko el̦ap aer aikuji bainier ro, ilukkuun bar kõn̦aan etal im jipañ.” Jiroñ in ej wõnm̦aanl̦o̦k im ba, “Bõtab iar l̦õmn̦ak bwe ijjab maroñ kõm̦m̦ane men in.”

Kwõj ke bar bõk ejja l̦õmn̦ak in wõt an Sylviana? Kwõlukkuun ke kõn̦aan jipañ ilo juon jikin me el̦ap aer aikuj rukwal̦o̦k naan ro ie, bõtab kwõj pere el̦aññe kwõmaroñ kajejjete mejãnkajjik in am̦? El̦aññe aet, eokwe jouj im jab ebbeer! Kõn jipañ eo jãn Jeova, elõñ to̦ujin ro jeid im jatid rar maroñ el̦l̦ã jãn men ko me rar kapañ aer kal̦apl̦o̦k ijo kun̦aaer ilo jerbalin kwal̦o̦k naan. Bwe jen jel̦ã wãween an kar Jeova kõpel̦l̦o̦k ial̦ eo ñan jet iaan rein, jen bwebwenato kõn aelõñin Madagascar, ãneo (island) kein kãmen me el̦aptata ilo pel̦aakin lal̦ in.

Ium̦win iiõ ko 10 rej kab jem̦l̦o̦kl̦o̦k, elõñl̦o̦k jãn 70 rukwal̦o̦k naan ro im bainier ro rekijejeto jãn 11 aelõñ ko rar itok im jipañ ilo ãne in me ej m̦õttan aelõñin Africa. * (Lale kõmel̦el̦e eo itulal̦.) Elõñ armej ro ilo ijin rej kaorõke Baibõl̦ eo. Bareinwõt, elõñ rukwal̦o̦k ro jãn Madagascar rar m̦õn̦õn̦õ in em̦m̦akũt ñan jikin ko jet ilowaan wõt ãne in ekilep bwe ren jipañ kajeedede ennaan eo kõn Aelõñ eo. Jen kiiõ kal̦apl̦o̦k ad jel̦ã kajjien jet iaan rein.

RAR JOL̦O̦K AER MIJAK, INEPATA, IM EBBEER

Perrine im Louis

Louise im Perrine, ruo rippãlele 30 jim̦a aerro iiõ, rar em̦m̦akũt jãn France ñan Madagascar. Elõñ iiõ in aerro kar l̦õmn̦ak in kal̦apl̦o̦k ijo kun̦aaerro ilo jerbalin kwal̦o̦k naan ilo bar juon aelõñ, bõtab Perrine ear mijak in em̦m̦akũt. Ej ba: “Iar mijak in etal ñan juon jikin inaaj ruwamãejet ie. Im iar inepata kõnke inaaj kar etal jãn baam̦le ko am̦ro, eklejia eo, apartment eo am̦ro kab jikin ko em̦õj am̦ro imminene kaki, im bareinwõt kõn an naaj oktak jikejuul̦ eo am̦ro. Ilo m̦ool, men eo el̦aptata iar aikuj kate eõ ñan anjo̦ ioon ej inepata ko aõ make.” Bõtab ilo 2012 eo, Perrine ear kwal̦o̦k an peran, im erro Louis kar em̦m̦akũt. Ta l̦õmn̦ak eo an Perrine kõn pepe in aerro? Ej ba: “Ñe ij reilikl̦o̦k ñan iien ko rej kab mootl̦o̦k, ij keememej wãween an kar Jeova jipañ kõm̦ro ilo mour ko am̦ro im men in ej kõkajoor tõmak eo am̦ro.” Louis ej  bar ba, “Elukkuun kabwilõñlõñ bwe ilo Kwõjkwõj eo kein kajuon ilo Madagascar, ekar wõr 10 am̦ro rũkkatak rar itok ñan iien in eaorõk!”

Ta eo ear kõkajoor erro ñan pãdwõt ilo aelõñ eo erro ej jipañ ie ilo iien ko rej iioon apañ? Eokwe erro ar jar im akwel̦ap ñan Jeova bwe en kõkajoor erro ñan kijenmej wõt. (Pil. 4:13) Louis ej ba: “Kõm̦ro ar lo an Jeova kar uwaake jar ko am̦ro im ear letok ‘aenõm̦m̦an eo ej itok jãne.’ Im kõm̦ro ar l̦õmn̦ak wõt kõn men ko rej kalañlõñ kõm̦ro ilo am̦ro jipañ ilo jerbalin kwal̦o̦k naan. Bareinwõt, ro m̦õttam rar jejetok ilo lõta im ilo e-mail ñan rõjañ kõm̦ro bwe kõm̦ro en jab ebbeer.”—Pil. 4:6, 7; 2 Ko. 4:7, UBS.

Jeova ear lukkuun kõjeraam̦m̦an Louis im Perrine kõn aerro kar kijenmej. Louis ej ba, “Ilo Oktoba 2014 eo, kõm̦ro ar pãd ilo Jikuul̦in Baibõl̦ eo ñan Rippãlele Ro ilo France. * (Lale kõmel̦el̦e eo itulal̦.) Men in ear ãinwõt juon menin letok jãn Jeova im kõm̦ro ban mel̦o̦kl̦o̦ke.” Ilo iien eo erro ej kadiwõjl̦o̦k, erro ar m̦õn̦õn̦õ ke rar jitõñ erro ñan etal im bar jipañ ilo Madagascar.

“ENAAJ LUKKUUN UTIEJ BŨRUEMJEL KÕN KOM̦RO!”

Nadine im Didier

Didier im Nadine, ruo rippãlele jãn France, rar em̦m̦akũt ñan Madagascar ilo 2010 eo im ilo iien in kar 50 jim̦a aerro iiõ. Didier ej ba: “Kõm̦ro ar bainier ke kõm̦ro ar likao im jiroñ, im tokãlik ear wõr 3 nejũm̦ro ajri. Ke ajri ro nejũm̦ro rar rũtto, kõm̦ro ar lale ñe kõm̦ro maroñ em̦m̦akũt im jipañ ilo bar juon aelõñ.” Nadine ej ba: “Ilo m̦ool iar lukkuun inepata ñe kõm̦ro naaj ettol̦o̦k jãn ajri ro nejũm̦ro, ak erjel ar jiroñtok kõm̦ro im ba: ‘El̦aññe kom̦ro naaj em̦m̦akũt ñan bar juon aelõñ im jipañ ilo jerbalin kwal̦o̦k naan, enaaj lukkuun utiej bũruemjel kõn kom̦ro!’ Naan kein aer rar kõm̦akũt kõm̦ro ñan em̦m̦akũt. Jekdo̦o̦n ñe kiiõ kõm̦ro lukkuun ettol̦o̦k jãn ro nejũm̦ro, ak kõm̦ro ej lukkuun m̦õn̦õn̦õ bwe jãn iien ñan iien kõm̦ro maroñ bwebwenato ippãer.”

Ear jab pidodo ñan an kar Didier im Nadine katak kajin Malagasy. Nadine ej ettõñdikdik im ba, “Em̦õj am̦ro mootl̦o̦k jãn iiõ ko ke kõm̦ro ar likao im jiroñ.” Innem ta eo ear jipañ erro ñan katak kajin in? Ilo jinoin, erro ar kobal̦o̦k ippãn eklejia eo ej kõnono kajin eo aer, French. Tokãlik, ke erro ar pojak in katak kajin Malagasy, erro ar em̦m̦akũt ñan bar juon eklejia me ej kõnono kajin in. Nadine ej ba: “Elõñ armej kõmij iioon er rekõn̦aan katak Baibõl̦. Ekkã aer kam̦m̦oolol kõm kõn am kar lol̦o̦k er. Ilo jinoin, iar l̦õmn̦ak bwe ij ettõn̦ak. Elukkuun em̦m̦an ippa kwal̦o̦k naan ijin. Ilo jibboñ, ñe ij ruj im jerkak, ekkã aõ ba ñan ña make, ‘Ej baj em̦m̦an ke ij itõn kwal̦o̦k naan rainin!’”

Didier ej ettõñdikdik ke ej ememejtok iien eo ear jino katak kajin Malagasy. Ej ba, “Iar jutak ijo im̦aan im kõm̦m̦ane juon katak ilo juon iien kweilo̦k, ak iar jab mel̦el̦e ñan jidik aolep uwaak ko an rukweilo̦k ro. Men eo de eo iar maroñ ba ej ‘Kom̦m̦ool.’ Ãlikin aõ kar kam̦m̦oolole juon jeid im jatid kõrã kõn uwaak eo an, ro rar jijet ilo jea ko itulikin kõrã in rar jeknõl̦ tok ñan ña im kaalikkar bwe ejjab jim̦we uwaak eo an. Innem iar m̦õkaj im kũr bar juon em̦m̦aan jeid im jatid im ear kwal̦o̦k uwaak eo ejim̦we, ak ilo m̦ool iar jab bar lukkuun jel̦ã el̦aññe ear jim̦we uwaak eo an.”

 EAR M̦ÕN̦ÕN̦Õ IN EM̦M̦AKŨT KE RAR KAJJITÕK IPPÃN

Ilo juon kweilo̦k el̦ap ilo 2005 eo, Thierry im kõrã eo pãleen etan Nadia, rar alwõje tieta eo kõn Timote etan “Pursue Goals That Honor God.” Tieta in ear tõpar bũrueerro im kal̦apl̦o̦k aerro kõn̦aan jipañ ilo juon jikin me el̦ap aer aikuji rukwal̦o̦k ro ie. Thierry ej ba: “Ke ej jem̦l̦o̦k tieta eo im kõmij kapokpok wõt, iar atõrakl̦o̦k ippãn kõrã eo pãleõ im kajjitõk, ‘Kõjro enaaj etal ñan ia?’ Nadia ear ba bwe eñin bar men eo ear l̦õmn̦ak kake.” Ejjabto tokãlik, erro ar jino kõm̦m̦ani men ko me renaaj jipañ erro ñan tõpare mejãnkajjik eo aerro. Nadia ej ba, “Jidik kõn jidik, kõm̦ro ar kaietl̦o̦k m̦weiemro, im joñan aer kar iiet, aolep m̦weiuk rar maroñ kon̦ ilowaan wõt 4 kõbañ!”

Ituanmiiñ: Nadia im Marie-Madeleine; Ituanmoon̦: Thierry

Ilo 2006 eo, erro ar em̦m̦akũt ñan Madagascar im jino jãn iien eo erro ar pãd ijin, el̦ap aerro lo m̦õn̦õn̦õ ilo jerbalin kwal̦o̦k naan. Nadia ej ba, “El̦ap an armej ro kõmij iioon er kalañlõñ kõm.”

Bõtab 6 iiõ ko tokãlik, ear wal̦o̦k juon aerro utam̦we. Lel̦l̦ap eo jinen Nadia etan Marie-Madeleine me ear jokwe ilo France, ear okjak im bwilo̦k pein im itaak bõran. Ãlikin an kar Thierry im Nadia kõnono ippãn taktõ eo an Marie-Madeleine, erro ar kajjitõk ippãn lel̦l̦ap in jineerro ñe ekõn̦aan etal im jokwe ippãerro ilo Madagascar. Meñe kar 80 an iiõ ilo iien in, ak ear m̦õn̦õn̦õ in em̦m̦akũt bwe en jokwe ippãerro. Ta l̦õmn̦ak eo an kõn an jokwe ilo bar juon aelõñ? Marie-Madeleine ej ba: “Ewõr jet iien epen kõnke ij aikuj kal̦apl̦o̦k aõ imminene kõn wãween mour ilo ijin, ak ij kile bwe ewõr tokjãn aõ pãd ilo eklejia eo, meñe edik joñan maroñ e aõ. Im el̦ap aõ m̦õn̦õn̦õ bwe iar em̦m̦akũttok kõnke ilo wãween in, ajri ro nejũ ren maroñ wõnm̦aanl̦o̦k wõt im lo tõprak ilo aerro jipañ ilo jerbalin kwal̦o̦k naan eo ijin.”

“IAR KILE AN JEOVA JIPAÑ EÕ”

Riana ej kõm̦m̦ane juon katak ilo kajin Tandroy

Riana, juon jeid im jatid likao 20 jim̦a an iiõ, ear dik im rũttol̦o̦k ilo Alaotra Mangoro, juon jikin me ewãmourur im ej pãd iturear ilo Madagascar. Ke ear jikuul̦, ear em̦m̦an kũreet ko an, im ear kõn̦aan jibadek jikuul̦ ko reutiejl̦o̦k. Bõtab ãlikin an kar katak Baibõl̦, ear kiiõ oktak l̦õmn̦ak eo an. Ej ba: “Iar kate eõ bwe en m̦õkajl̦o̦k aõ kadiwõjl̦o̦k jãn jikuul̦, kõn men in iar kallim̦ur ñan Jeova bwe ñe inaaj pass ilo iien aõ final exam, inaaj jino bainier.” Ãlikin an kar Riana kadiwõjl̦o̦k, ear kajejjete kallim̦ur eo an. Ta eo ear kõm̦m̦ane? Ear em̦m̦akũt im jokwe ippãn juon jeid im jatid likao me ej bar bainier, im jinoe juon an part-time jerbal, innem ear jino an bainier. Ej ba, “Pepe in aõ ej pepe eo em̦m̦antata iar kõm̦m̦ane.”

Bõtab armej ro nukũn Riana rar jab mel̦el̦e etke ear jab jibadek juon jerbal eutiej. Riana ej ba: “L̦al̦l̦ap eo jema, l̦eo jatin jema, im lel̦l̦ap eo edikl̦o̦k jãn jinen jema rar aolep rõjañ eõ bwe in jibadek jikuul̦ ko reutiejl̦o̦k. Bõtab iar jab kõn̦aan bõjrak jãn aõ bainier jekdo̦o̦n ta.” Ejjabto tokãlik, Riana ear kõn̦aan jipañ ilo jikin ko me el̦ap aer aikuji rukwal̦o̦k naan ro ie. Ta eo ear kõm̦m̦an bwe en kõn̦aan kõm̦m̦ane men in? Ej ba: “Jet rũko̦o̦t rar del̦o̦ñe jikin jokwe ko ammim im rar ko̦o̦ti elõñ iaan men ko m̦weiõ. Men in me ear wal̦o̦k ear kõm̦m̦an aõ l̦õmn̦ak kõn naan ko an Jesus ke ear ba bwe jen koorl̦o̦k ñan kõj ‘m̦weiuk ko ilañ.’ Kõn men in, iar jek ilo bũruõ bwe inaaj kal̦apl̦o̦k aõ kate eõ ñan koorl̦o̦k men ko me raorõk ippãn Jeova.” (Matu 6:19, 20) Innem Riana ear em̦m̦akũt ñan juon iaan jikin ko rej pãd iturõk ilo Madagascar, jikin kein el̦ap aer m̦õrã im rej pãd 800 m̦ail̦ ettol̦o̦k jãn ijo ear jokwe ie m̦okta. Erkein jikin ko armejin Antandroy ro rej jokwe ie. Ak etke Riana ear em̦m̦akũtl̦o̦k ñan ijin?

Juon allõñ m̦okta jãn iien eo kar ko̦o̦ti men ko m̦weien Riana, em̦õj an kar jino katak Baibõl̦ ippãn ruo em̦m̦aan in Antandroy. Ear katak jet naan ilo kajin eo aer im ear jino l̦õmn̦ak kõn elõñ iaan armejin Antandroy ro me rejjañin roñ ennaan eo kõn Aelõñ eo. Ej ba, “Iar jar ñan Jeova ñan jipañ eõ bwe in maroñ em̦m̦akũt ñan jikin ko armej ro ie rej kõnono kajin Tandroy.”

Ke Riana ear em̦m̦akũtl̦o̦k, ear jelm̦ae juon apañ. Ta apañ in? Ear jab maroñ ellolo an jerbal. Juon em̦m̦aan ear ba ñane: “Etke kwaar em̦m̦akũttok ñan ijin? Armejin ijin rej etal ñan ijo kwaar itok jãne ñan kappok aer jerbal!” Ruo wiik tokãlik, Riana ear etal jãn jikin in bwe en pãd ilo juon kweilo̦k el̦ap, ak ear lukkuun maat an jããn im ear jaje ta eo en kõm̦m̦ane. Ilo raan eo ãliktata ilo kweilo̦k el̦ap eo, juon jeid im jatid em̦m̦aan ear likũt juon men ilo bõjo̦ in kopã eo an Riana. Em̦m̦aan in ear lel̦o̦k an jããn, joñan an l̦ap, Riana ear maroñ kõjerbale ñan an jepl̦aak ñan Antandroy im jino juon peejnej in wiakake yogurt. Riana ej ba: “Iar kile an Jeova jipañ eõ ilo iien eo ejejjet. Kiiõ iar maroñ wõnm̦aanl̦o̦k wõt im jipañ ro rejjañin jel̦ã kõn Jeova!” Bareinwõt, eklejia eo ijo rar lukkuun aikuj jipañ. Riana ej bar ba: “Kar karõk bwe aolep l̦o̦kin ruo wiik, in kõm̦m̦an public talk ijo im̦aan. Jeova ear lukkuun katakin im kammineneik eõ ikijjeen doulul in an.”  Rainin, Riana ej wõnm̦aanl̦o̦k wõt ilo an kwal̦o̦k naan ñan elõñ iaan armej ro rej kõnono kajin Tandroy me rekõn̦aan katak kõn Jeova.

ANIJ EJ LEL̦O̦K JINÕKJEEJ ÑAN RO REJ KAPPUKOT E

Jeova ej kaalikkar bwe enaaj “lel̦o̦k jinõkjeej ñan ro rej kappukot E.” (Hi. 11:6) Ñe jej kate kõj ñan anjo̦ ioon apañ ko ad bwe jen maroñ kal̦apl̦o̦k ijo kun̦aad ilo jerbalin kwal̦o̦k naan, jenaaj loe an Jeova kõjeraam̦m̦an kõj. L̦õmn̦ak m̦õk kõn jiroñ eo etan Sylviana, eo kar kwal̦o̦k kake ilo jinoin katak in. Ear l̦õmn̦ak bwe ejjab maroñ jipañ ilo jikin ko me el̦ap aer aikuj rukwal̦o̦k naan ro ie. Etke ear bõk l̦õmn̦ak in? Ej ba: “Ne eo neõ ituanmiiñ ekadul̦o̦k 3 jimattan inij jãn ne eo ituanmoon̦. Kõn men in, ñe ij etetal ij ajukubkub im em̦õkaj aõ m̦õk.”

Sylviana (tuanmiiñ) im Sylvie Ann (tuanmoon̦) ippãn Doratine ilo raan eo ear peptaij

Meñe ãindein, ak ilo 2014 eo Sylviana ear kobal̦o̦k ippãn juon jiroñ etan Sylvie Ann jãn eklejia eo an me ej bar bainier, im erro ar em̦m̦akũtl̦o̦k ñan juon bukwõn jidikdik me ej pãd 53 m̦ail̦ ettol̦o̦k jãn jikin eo erro ar jokwe ie. Meñe elõñ men ko rar kapañe Sylviana, ak ear maroñ katõprake mejãnkajjik eo an. Im tokjãn men in, kar lukkuun kõjeraam̦m̦ane! Sylviana ej ba, “Ãlikin wõt juon iiõ jãn ke iar jino jipañ ilo ijin me iar em̦m̦akũttok ñane, jiroñ eo iar katak Baibõl̦ ippãn etan Doratine me ewõr nejin ajri, ear peptaij ilo juon iaan kweilo̦k ko ammim rel̦l̦ap.”

“INAAJ JIPAÑ EOK”

Naan ko an armej rein jaar etali ilo katak in rej kaalikkar bwe ñe jej kate kõj ñan anjo̦ ioon apañ ko ad bwe jen kal̦apl̦o̦k ijo kun̦aad ilo jerbalin kwal̦o̦k naan, jenaaj make lo an m̦ool kallim̦ur eo an Jeova ñan rũkarejar ro an ke ear ba: “Inaaj kõkajoor [kom̦], aet, Inaaj jipañ [kom̦].” (Ais. 41:10) Tokjãn men in, jenaaj kile ad epaakel̦o̦k Jeova. Bareinwõt, ñe jej m̦õn̦õn̦õ in em̦m̦akũt ñan jipañ ijoko jet, jekdo̦o̦n ñe ej juon jikin ilowaan wõt aelõñ eo ad ak ñan bar juon aelõñ, men in ej kõpooj kõj ñan jerbal ko jej pojakin naaj kõm̦m̦ani ium̦win Aelõñ eo ilo jukjukun pãd eo ekããl. Didier, eo kar kwal̦o̦k kake ilo katak in, ear ba, “ñe jej jipañ ilo jikin ko me el̦ap aer aikuj rukwal̦o̦k naan ro, eñin ej juon wãween em̦m̦an jemaroñ kammineneik kõj ñan ilju im jekl̦aj!” Jej kõjatdikdik bwe ejjabto jãn kiiõ, enaaj lõñl̦o̦k ro renaaj m̦õn̦õn̦õ in jino bõk kamminene in!

^ par. 4 Rein rar itok im jipañ rej jãn Canada, Czech Republic, France, Jãmne, Guadeloupe, Luxembourg, New Caledonia, Sweden, Switzerland, United Kingdom, im Amedka.

^ par. 8 Jikuul̦ eo ñan Rukwal̦o̦k Naan ro an Aelõñ Eo em̦õj an bõk jikin Jikuul̦in Baibõl̦ eo ñan Rippãlele Ro. Ro rej kwal̦o̦k naan full-time ilo bar juon aelõñ im rej l̦oore naanin tõl im laajrak ko an jikuul̦ in, remaroñ kanne aer peba ñe rekõn̦aan pãd ilo jikuul̦ in ilo aelõñ eo aer. Ak remaroñ kanne aer peba bwe ren etal ñan bar juon aelõñ me renaaj kõm̦m̦ane jikuul̦ in ilo kajin eo aer.