1. Anij ej ke roñjake aolep jar ko?

Jeova ekõn̦aan bwe jabdewõt kain armej en ruwaakl̦o̦k ñan e ikijjeen jar. (Sam 65:2) Bõtab, ejjab aolep jar Anij ej roñjaki. Ñan waanjoñak, el̦aññe enana an juon em̦m̦aan kõm̦m̦an ñan lio ippãn, Anij eban roñjake jar ko an. (1 Piter 3:7, UBS) Bareinwõt, ke Ri Israel ro rar kõm̦m̦ani men ko renana, Anij ear m̦akoko in roñjaki jar ko aer. Mekarta, Anij emaroñ roñjake jar ko an ro rar kõm̦m̦ani bõd ko rel̦l̦ap el̦aññe em̦ool aer ajl̦o̦k kõn bõd ko aer. Jej aikuj keememej bwe jar ej juon jeraam̦m̦an jãn Jeova.Riit Aiseia 1:15; 55:7.

2. Ewi wãween jej aikuj jar?

Jar ej juon iaan wãween ko jej kabuñ ñan Anij. Eñin unin jej aikuj jar ñan Jeova wõt, Ri Kõm̦anm̦an eo ad. (Matu 4:10; 6:9) Kõnke jejjab weeppãn, jej aikuj jar ilo etan Jijej kõnke ear mej kõn jerawiwi ko ad. (Jon 14:6) Jeova ejjab kõn̦aan bwe jen ãliji jar ko ad ak jar jãn juon bok. Ekõn̦aan bwe jen jar jãn bũruod.Riit Matu 6:7; Pilippai 4:6, 7.

Ri Kõm̦anm̦an eo ad emaroñ roñ jar ko ad meñe ilo iien ko me ejjel̦o̦k ainikien ad jar. (1 Samuel 1:12, 13) Ekõn̦aan bwe jen jar iien otemjej, ãinwõt ilo jibboñ, jota, iien m̦õñã im ñe jej iioon apañ ko.Riit Sam 55:22, UBS; Matu 15:36.

3. Etke Kũrjin ro rem̦ool rej aikuj kweilo̦k ippãn doon?

Ejjab pidodo ñan ruwaakl̦o̦k ñan ippãn Anij kõnke jej mour ibwiljin armej ro me edik aer tõmak ilo Anij. Rej kajjirere kake kallim̦ur eo an Anij bwe enaaj wõr aenõm̦m̦an ilo lal̦ in. (2 Timote 3:1, 4, UBS; 2 Piter 3:3, 13) Kõn men in, jej aikuj kobal̦o̦k ippãn ri tõmak ro m̦õttad bwe jen kakajoor doon.Riit Hibru 10:24, 25, UBS.

 Ñe kwõj jem̦jerãik ro rej epaake Anij, men in enaaj jipañ eok ñan ruwaakl̦o̦k ñan Anij. Ñe kwõj kobal̦o̦k ilo iien kweilo̦k ko an Ri Kõnnaan ro an Jeova, kwõmaroñ bõk jipañ kõnke kwõj pãd ibwiljin ro me ekajoor tõmak ko aer.Riit Rom 1:11, 12, UBS.

4. Ta ko kwõj aikuj kõm̦m̦ani bwe kwõn ruwaakl̦o̦k ñan Anij?

Ñe kwõj kõl̦mãnl̦o̦kjen̦ kõn men ko kwõj katak kaki jãn Baibõl̦ eo, men in enaaj karuwaakl̦o̦k eok ñan Jeova. Em̦m̦an bwe jen l̦õmn̦ak kõn jerbal ko an, naan in tõl ko an im kallim̦ur ko an. Lukkuun kõl̦mãnl̦o̦kjen̦ ñe kwõj jar ñan Jeova. Men in enaaj kal̦apl̦o̦k am̦ kam̦m̦oolol Jeova kõn joñan an mãlõtlõt im kõn joñan an yokwe armej.Riit Joshua 1:8; Sam 1:1-3.

Ñe kwõj lõke im tõmak Anij, kwõnaaj epaake e. Bõtab, tõmak ej juon men me kwõj aikuj kakajoore iien otemjej bwe en jab jako. Wãween eo kwõmaroñ kakajoorl̦o̦k tõmak eo am̦, ej ilo am̦ kõl̦mãnl̦o̦kjen̦ iien otemjej kõn unin am̦ tõmaki men ko kwõj katak jãn Baibõl̦ eo.Riit Matu 4:4; Hibru 11:1, 6.

5. Ewi wãween Anij emaroñ jipañ kõj ñe jej ruwaakl̦o̦k ñan E?

El̦ap an Jeova yokwe ro rej yokwe e. Ej kõjparok er jãn jabdewõt men me remaroñ ko̦kkure tõmak eo aer ilo E im tõmak eo aer kõn kallim̦ur eo an ikijjeen mour indeeo. (Sam 91:1, 2, 7-10) Ej kakkõl kõj kõn men ko me renaaj ko̦kkure ãjmour eo ad im kõm̦m̦an bwe jen jab m̦õn̦õn̦õ. Jeova ej katakin kõj bwe jen m̦õn̦õn̦õ ilo mour ko ad.Riit Sam 73:27, 28; Jemes 4:4, 8.