Etal ñan katak ko ilo bok in

Etal ñan secondary menu

Etal ñan laajrak in katak ko

Ri Kõnnaan ro an Jeova

Kajin M̦ajel̦

Ta eo Baibõl̦ Ej Lukkuun Katakin Kõj?

 KATAK 18

Am̦ Jem̦jerãik Anij Ej Itok jãn Am̦ Peptaij

Am̦ Jem̦jerãik Anij Ej Itok jãn Am̦ Peptaij
  • Ewi wãween an juon armej peptaij bwe en erom Kũrjin?

  • Ta ko kwõj aikuj kõm̦m̦ani m̦okta jãn am̦ maroñ peptaij?

  • Ewi wãween an juon armej ajel̦o̦k mour eo an ñan Anij?

  • Ta un eo elukkuun aorõk unin am̦ peptaij?

1. Etke juon ruutiej in Itiopia ear kõn̦aan peptaij?

ILO iien ko etto, juon Kũrjin etan Pilip ear kõmel̦el̦eik juon ruutiej in Itiopia im kam̦ool ñane bwe Jijej ej Messaia eo kar kallim̦ur kake. Men ko em̦m̦aan in ear roñ jãn Jeje ko, rar tõpar bũruon im ear kõn̦aan l̦oori. Ke ear lo juon l̦we, ear ba ñan Pilip, ‘Ta eo ej bõbraik eõ bwe in jab peptaij?’ Naan kein an RiItiopia in rar kaalikkar bwe ear kõn̦aan peptaij!Jerbal 8:26-36.

2. Etke peptaij ej juon men eaorõk im kwõj aikuj lukkuun l̦õmn̦ak kake?

2 El̦aññe kwaar niknik ilo am̦ katak ippãn Ri Kõnnaan ro an Jeova jãn kar jinoin bok in, bõlen kwe bareinwõt kwõj kajjitõk im ba: ‘Ta eo ej bõbraik bwe in jab peptaij?’ Em̦õj am̦ kar katak kõn kallim̦ur eo ilo Baibõl̦ bwe juon iien armej ro renaaj mour indeeo ilo Pedetaij ijin ioon lal̦. (Luk 23:43; Revelesõn 21:3, 4) Kwaar bar katak im jel̦ã kõn m̦ool eo kõn ro remej im kõjatdikdik eo bwe  rein renaaj bar mour. (Ekklisiastis 9:5; Jon 5:28, 29) Bõlen em̦õj am̦ jino kobal̦o̦k ippãn Ri Kõnnaan ro an Jeova ilo iien kweilo̦k ko aer im kile bwe rej kabuñ ñan Anij ilo wãween eo ej kabuñbũruon. (Jon 13:35) Im bõlen em̦õj am̦ jino ejaake juon kõtaan epaak ippãn Jeova Anij. Eñin ej men eo eaorõktata.

3. (1) Ta eo Jijej ear jiroñ rũkal̦oor ro an bwe ren kõm̦m̦ane? (2) Ewi wãween an juon aikuj peptaij?

3 Ewi wãween am̦ kwal̦o̦k bwe kokõn̦aan jerbal ñan Anij? Jijej ear jiroñ rũkal̦oor ro an im ba: “Kom̦win ilo̦k, im kõm̦m̦an riaelõñ ko otemjej bwe ren rũkal̦oora, im peptaij er.” (Matu 28:19) Jijej ear likũt juon joñak ñan kõj ilo an kar peptaij ilo dãn. Im eñin men eo jej l̦oore kõn kilen peptaij. Ke Jijej ear peptaij, rar jab utdikdiki kõn dãn im rar jab peptaiji ilo aer kar lutõkl̦o̦k dãn n̦a ioon bõran. (Matu 3:16) Naan in “peptaij” ej itok jãn juon naanin Grik im ej mel̦el̦ein “tulo̦k ak jakol̦o̦k ium̦win dãn.” Innem eñin wãween an Kũrjin ro peptaij. Rej katulo̦k aolepen ãnbwinnin armej eo ej peptaij bwe en jakol̦o̦k ium̦win dãn.

4. Ñe juon ej peptaij ilo dãn, ta eo men in ej kaalikkare?

4 Aolep ro me rekõn̦aan ejaake juon jem̦jerã ippãn Jeova Anij rej aikuj peptaij ilo dãn. Ñe kwõj peptaij, kwõj kwal̦o̦k im̦aan mejãn armej ro bwe kokõn̦aan jerbal ñan Anij. Am̦ peptaij ej kaalikkar ke kwõm̦õn̦õn̦õ in kõm̦anm̦an ankilaan Jeova. (Sam 40:7, 8) Bõtab, ewõr jet men ko kwõj aikuj kõm̦m̦ani m̦okta bwe kwõn maroñ peptaij.

JEL̦Ã KÕN ANIJ IM TÕMAK

5. (1) Ta men eo m̦oktata kwõj aikuj kõm̦m̦ane bwe kwõn maroñ peptaij? (2) Etke eaorõk ñan am̦ pãd ilo iien kweilo̦k ko an Ri Kõnnaan ro an Jeova?

5 Men eo m̦oktata juon ej aikuj kõm̦m̦ane bwe en  maroñ peptaij, ej jel̦ã kõn Jeova Anij im Jijej Kũraij. (Riit Jon 17:3.) Im em̦õj am̦ jino kadede kõm̦m̦ane men in ikijjeen am̦ ekkeini am̦ katak Baibõl̦. Bõtab ebar ewõr men ko jet kwõj aikuj katak im jel̦ã kaki. Baibõl̦ ej rõjañ Kũrjin ro bwe ren “obrak kõn jel̦ã ankilaan [Anij].” (Kolosse 1:9) Am̦ kobal̦o̦k ilo iien kweilo̦k ko an Ri Kõnnaan ro an Jeova, enaaj jipañ eok ñan jel̦ã im mel̦el̦e kõn ankilaan Anij. Im elukkuun aorõk bwe kwõn pãd ilo kweilo̦k kein. (Hibru 10:24, 25) Ñe kwõnaaj keini am̦ pãd ilo kweilo̦k ko, men in enaaj jipañ eok bwe en l̦apl̦o̦k am̦ jel̦ã kõn Anij.

Bwe kwõn maroñ peptaij, kwõj aikuj bõk jel̦ãl̦o̦kjen̦ eo em̦ool jãn Naanin Anij

6. Ewi joñan am̦ aikuj jel̦ã kõn Baibõl̦ bwe kwõn maroñ peptaij?

6 Kwõj aikuj ke jel̦ã aolep katak ko jãn Baibõl̦ bwe kwõn maroñ peptaij? Kwõjjab aikuj. Kwõj keememej ke ruutiej in Itiopia eo? Ewõr jet men ko ekar bwe an jel̦ã im mel̦el̦e kaki jãn Jeje ko. Bõtab ekar bar wõr jet eoon ko em̦m̦aan in ear jab lukkuun mel̦el̦e kaki im ear aikuj jipañ bwe juon en kõmel̦el̦eiki. (Jerbal 8:30, 31) Ãindeinl̦o̦k wõt, ej wõr wõt men ko kwõnaaj aikuj katak  kaki. Ilo m̦ool, eban bõjrak am̦ katak kõn Anij. (Ekklisiastis 3:11) Bõtab, m̦okta jãn am̦ peptaij, ewõr jet katak ko jãn Baibõl̦ me rekanooj aorõk im kwõj aikuj mel̦el̦e kaki im tõmaki. (Hibru 5:12) Jet iaan men kein, ej m̦ool eo kõn ro remej im aorõkin ãt eo etan Anij kab Aelõñ ak kien eo an.

7. Ilo am̦ katak Baibõl̦, ewi wãween an men in maroñ jipañ eok?

7 Bõtab, ebwe wõt ke ñan am̦ jel̦ã kõn Anij? Ejabwe kõnke “el̦aññe ejjel̦o̦k tõmak, armej reban kabuñbũruon [Anij].” (Hibru 11:6) Baibõl̦ ej ba bwe ke jet armej ilo Korint rar roñ ennaan eo em̦m̦an jãn rũkal̦oor ro an Jijej, armej rein rar “tõmak im peptaij.” (Jerbal 18:8) Ilo ejja wãween in wõt, am̦ katak Baibõl̦ enaaj jipañ eok bwe kwõn tõmak bwe Baibõl̦ eo ej itok jãn Anij. Im ilo am̦ katak Baibõl̦, enaaj jipañ eok bwe kwõn tõmaki kallim̦ur ko an Anij im bareinwõt tõmak bwe kwõmaroñ bõk lo̦mo̦o̦r ikijjeen katok in mour eo an Jijej.Joshua 23:14; Jerbal 4:12, UBS; 2 Timote 3:16, 17.

KWAL̦O̦K ÑAN RO JET KATAK KO REM̦OOL JÃN BAIBÕL̦

8. Ta eo enaaj kõm̦akũt eok bwe kwõn kwal̦o̦k ñan ro jet kõn men ko kwõj katak kaki?

8 Ilo an naaj kajoorl̦o̦k tõmak n̦e am̦, enaaj itok wõt bwe kwõn kõn̦aan kwal̦o̦k kõn men ko kwõj katak kaki ñan ro jet. (Jeremaia 20:9) Tõmak n̦e am̦ enaaj kõm̦akũt im kaperan eok bwe kwõn kwal̦o̦k ñan ro jet kõn Anij im karõk ko an.Riit 2 Korint 4:13.

Tõmak eo am̦ enaaj kõm̦akũt eok bwe kwõn kwal̦o̦k ñan ro jet kõn men ko em̦õj am̦ katak im jel̦ã kaki

9, 10. (1) Wõn ro kwõmaroñ jino bwebwenato ippãer kõn katak ko rem̦ool jãn Baibõl̦ eo? (2) Ta eo kwõj aikuj kõm̦m̦ane el̦aññe kokõn̦aan bõk kun̦aam̦ ilo jerbalin kwal̦o̦k naan eo an Ri Kõnnaan ro an Jeova?

9 Kwõmaroñ jino am̦ bwebwenato kõn katak ko rem̦ool jãn Baibõl̦ ñan ro nukum̦, ro m̦õttam̦, ro rũturum̦,  im rijerbal ro m̦õttam̦. Bõtab, eaorõk bwe kwõn kwal̦o̦k jouj ñe kwõj kõm̦m̦ane men in. Ãlikin jidik iien, bõlen kwõnaaj kõn̦aan bõk kun̦aam̦ ilo jerbalin kwal̦o̦k naan eo an Ri Kõnnaan ro an Jeova. Ñe kwõnaaj kile bwe kwõpojak, kwõmaroñ kwal̦o̦k kõn̦aan in am̦ ñan armej eo me ej katak Baibõl̦ ippam̦. El̦aññe ej kile bwe kwõpojak in kwal̦o̦k naan, eokwe naaj kõm̦m̦an karõk bwe komiro en jijet ippãn ruo iaan em̦m̦aan ro me rej lale eklejia eo.

10 Men in enaaj kõm̦m̦an bwe kwõn jel̦ãl̦o̦k kajjien em̦m̦aan ro me rej lale eklejia eo. Er eo rej lale im jabõte jiip ko an Anij. (Jerbal 20:28, UBS; 1 Piter 5:2, 3) Ewõr jet men ko em̦m̦aan rein renaaj etali. Renaaj lale el̦aññe kwõmel̦el̦e kõn jet iaan katak ko raorõk jãn Baibõl̦ eo. Renaaj bar lale el̦aññe kwõj mour ekkar ñan naanin kakapilõklõk ko jãn Baibõl̦, im ñe elukkuun m̦ool am̦ kõn̦aan erom juon iaan Ri Kõnnaan ro an Jeova. El̦aññe rej kile bwe kwõj kõm̦m̦ani men kein, eokwe renaaj kaalikkar waj bwe kwõmaroñ bõk kun̦aam ilo jerbalin kwal̦o̦k naan im bwe kwõj kiiõ juon rukwal̦o̦k naan eo ejjañin peptaij.

11. Ta oktak ko juon armej ej aikuj kõm̦m̦ani bwe en maroñ bõk kun̦aan ilo jerbalin kwal̦o̦k naan?

11 Bõtab, bõlen ewõr jet men ko em̦m̦aan ro rej lale eklejia eo renaaj kile bwe kwõj aikuj kõm̦m̦an oktak ie m̦okta jãn am̦ maroñ bõk kun̦aam̦ ilo jerbalin kwal̦o̦k naan. Men in ej bar kitibuj am̦ bõjrak jãn jabdewõt men ko kwokõn kõm̦m̦ani ilo ittino. Kõn men in, m̦okta jãn am̦ kajjitõk bwe kwõn erom juon rukwal̦o̦k naan eo me ejjañin peptaij, kwõj aikuj bõjrak jãn am̦ kõm̦m̦ani jerawiwi ko rel̦l̦ap. Jet iaan men kein ej l̦õñ, kadek, kõbaatat, im kõjerbal uno ko rekajoor (drug) me  rej kõm̦m̦an an juon ae.Riit 1 Korint 6:9, 10; Galetia 5:19-21.

UKEL̦O̦K IM OKTAK

12. Etke kwõj aikuj ukel̦o̦k?

12 Ebar wõr men ko jet kwõj aikuj kõm̦m̦ani m̦okta jãn am̦ maroñ peptaij. Rijjilõk Piter ear ba: “Kom̦win ukel̦o̦k ippemi, im bar oktak, bwe en jeorl̦o̦k jerawiwi ko ami.” (Jerbal 3:19) Ñe juon armej ej ukel̦o̦k, ej mel̦el̦ein bwe elukkuun bũrom̦õj im ajl̦o̦k kõn men ko renana ear kõm̦m̦ani. Aolep ro rekõn̦aan peptaij, ekoba ro em̦m̦an m̦wilier, rej aikuj ukel̦o̦k. Ak etke ro em̦m̦an m̦wilier rej aikuj bar ukel̦o̦k? Kõnke aolep armej rej rijjerawiwi im rej aikuji an Anij jeorl̦o̦k aer bõd. (Rom 3:23; 5:12) M̦okta jãn am̦ kar jino katak Baibõl̦, kwaar jab jel̦ã kõn ankilaan Anij. Eñin unin kwaar jab maroñ kõm̦m̦ani men ko rej kabuñbũruon. Kõn men in, ej juon menin aikuj ñan am̦ ukel̦o̦k.

13. Ewi wãween an juon armej kõm̦m̦an oktak ilo mour eo an?

13 Ãlikin an juon ukel̦o̦k, ej aikuj oktak jãn wãween kar mour eo an. Mel̦el̦ein bwe ejjab aikuj bar ro̦o̦llikl̦o̦k ñan men ko ekõn kõm̦m̦ani m̦okta. Ejabwe ñan am̦ baj ajl̦o̦k ak bũrom̦õj wõt kõn men ko renana im kwaar kõm̦m̦ani kar m̦okta. Kwõj aikuj bõjrak jãn wãween kar mour eo am̦ im jek ilo bũruom̦ bwe jãn kiiõ m̦aanl̦o̦k, kwõnaaj kate eok ñan kõm̦m̦ani wõt men ko rejim̦we. Innem m̦okta jãn am̦ peptaij, kwõj aikuj ukel̦o̦k im kõm̦m̦an oktak.

AJEL̦O̦K MOUR EO AM̦

14. Bar ta eo juon eaorõk kwõj aikuj kõm̦m̦ane m̦okta jãn am̦ peptaij?

14 Ebar wõr juon men eaorõk kwõj aikuj kõm̦m̦ane m̦okta jãn am̦ peptaij. Kwõj aikuj ajel̦o̦k mour eo am̦ ñan Jeova Anij.

Em̦õj ke am̦ jar im ajel̦o̦k mour n̦e am̦ ñan Anij?

15, 16. (1) Ñe kwõj ajel̦o̦k mour n̦e am̦ ñan Anij, ta eo kwõj kallim̦ur bwe kwõnaaj kõm̦m̦ane? (2) Im ta eo ej kõm̦akũt juon armej bwe en ajel̦o̦k e make ñan Anij?

 15 Ñe kwõj jar jãn aolepen bũruom̦ im ajel̦o̦k eok make ñan Jeova Anij, kwõj kallim̦ur bwe kwõnaaj tiljek im jerbal ñane toon wõt am̦ mour. Ak taunin an juon armej kõn̦aan ajel̦o̦k aolepen mour eo an bwe en jerbal ñan Anij? Eokwe, jen lale juon waanjoñak. Ewõr juon likao ej kab jino an teit ippãn juon jiroñ. El̦ak jino jel̦ã kajjien jiroñ eo, ej loe wãween ko rem̦m̦an kõn e im el̦apl̦o̦k an jel̦a bũruon. Im el̦ak tol̦o̦k wõt an jel̦ã kajjien, ej kab baj l̦apl̦o̦k wõt an yokwe. Ejjabto tokãlik, ej kajjitõk ippãn jiroñ eo bwe en m̦areiki. Meñe likao in ejel̦ã bwe enaaj lõñl̦o̦k eddo ko an ñe enaaj m̦are, bõtab yokwe eo an ñan jiroñ in enaaj kõm̦akũti bwe en wõnm̦aanl̦o̦k wõt im m̦areiki.

16 Ñe kwõj jino am̦ jel̦ã kajjien Jeova im yokwe e, men in enaaj kõm̦akũt eok ñan karejar ñane. Ejjel̦o̦k juon enãj maroñ bõbraik eok jãn am̦ kamaatl̦o̦k aolepen am̦ im kabuñ ñane. Jabdewõt eo ekõn̦aan l̦oore Nejin Anij, Jijej Kũraij, ej aikuj ‘kaarmejjeteik e make.’ (Mark 8:34) Ñe jej kaarmejjeteik kõj make, jejjab kõtl̦o̦k bwe kõn̦aan im kõttõpar ko ad ren bõbrae kõj jen ad pokake Anij jãn aolepen bũruod. Innem, m̦okta jãn am̦ maroñ peptaij, kwõj aikuj lale bwe am̦ kõm̦anm̦an ankilaan Jeova Anij, en men eo eaorõktata ilo mour n̦e am̦.Riit 1 Piter 4:2, UBS.

JAB EKKÕL IM MIJAK

17. Etke jet armej rej ekkõl in ajel̦o̦k mour ko aer ñan Anij?

17 Jet armej rej ekkõl in ajel̦o̦k mour ko aer ñan Jeova kõnke buñtõn n̦e in ekanooj aorõk im ejjab juon men bajjek. Rejel̦ã bwe ñe em̦õj aer ajel̦o̦k mour ko aer ñan Anij im kiiõ juon Kũrjin, Anij enaaj kõtmãne bwe ren kõm̦m̦ani men ko rejim̦we iien otemjej. Kõn men in,  remaroñ mijak kõn aer naaj aikuj uwaak ñan Anij kõn kõm̦m̦an ko aer. Innem, rej l̦õmn̦ak bwe em̦m̦anl̦o̦k ñe rejjab ajel̦o̦k mour ko aer ñan Jeova kõn aer mijak ñe renaaj kõm̦m̦an bõd im kabũrom̦õje.

18. Ta eo emaroñ kõm̦akũt eok bwe kwõn ajel̦o̦k mour n̦e am̦ ñan Jeova?

18 Ilo am̦ naaj katak im jino yokwe Jeova, men in enaaj kõm̦akũt eok bwe kwõn ajel̦o̦k mour n̦e am̦ ñane im kate eok ñan kajejjet kallim̦ur in am̦. (Ekklisiastis 5:4, UBS) Ãlikin am̦ ajel̦o̦k mour n̦e am̦, kwõnaaj kate eok bwe kwõn “mour ekkar ñan kõn̦aan eo an Irooj, im kõm̦m̦ani men ko rej kabuñbũruon iien otemjej.” (Kolosse 1:10, UBS) Kõnke kwõj yokwe Anij, kwõban l̦õmn̦ak bwe ej juon men epen ñan mour ekkar ñan ankilaan ak kõn̦aan ko an. Ejjel̦o̦k pere bwe kwõnaaj errã ilo naan kein an rijjilõk Jon ke ear ba: “Eñin yokwe Anij, bwe jen kõjparok kien ko An; im kien ko An rejjab eddo.”1 Jon 5:3.

19. Etke kwõjjab aikuj mijak in ajel̦o̦k mour n̦e am̦ ñan Anij?

19 Kwõjjab aikuj weeppãn ak jim̦we aolep iien bwe kwõn maroñ ajel̦o̦k mour n̦e am̦ ñan Anij. Jeova ejel̦ã kõn joñan maroñ ko am̦, im eban kajjitõk bwe kwõn kõm̦m̦ani men ko me kwõjjab maroñi. (Sam 103:14) Anij ekõn̦aan bwe kwõn lo tõprak ilo am̦ kate eok ñan kõm̦m̦ani men ko rejim̦we, im enaaj rejetak im jipañ eok. (Riit Aiseia 41:10, UBS.) El̦aññe kwõnaaj lõke Jeova kõn aolepen bũruom̦, “enaaj kwal̦o̦k ñan eok ial̦ eo ejim̦we.”Jabõn Kõnnaan 3:5, 6, UBS.

PEPTAIJ EJ KALIKKAR BWE KWAAR AJEL̦O̦K MOUR N̦E AM̦

20. Ñe juon ej ajel̦o̦k mour eo an ñan Jeova, etke ej aikuj bar kaalikkare men in im̦aan mejãn ro jet?

20 Ilo am̦ naaj kõl̦mãnl̦o̦kjen̦ kõn men ko ej kab m̦õj  ad bwebwenato kaki, men in emaroñ jipañ eok bwe kwõn jar ñan Jeova im ajel̦o̦k mour n̦e am̦ ñane. Bareinwõt, aolep ro me relukkuun yokwe Anij rej aikuj kwal̦o̦k im̦aan mejãn armej ro bwe em̦õj aer ajel̦o̦k mour eo aer ñan Anij. Rej aikuj ‘kwal̦o̦k kõn lo̦ñier bwe ren bõk lo̦mo̦o̦r.’ (Rom 10:10, UBS) Ewi wãween?

Peptaij ej mel̦el̦ein bwe em̦õj am̦ ilo̦k jãn wãween mour eo am̦ kar m̦okta, im kiiõ kwõj mour im jerbal ñan Anij wõt

21, 22. Ewi wãween am̦ kaalikkar kõn tõmak n̦e am̦ im̦aan mejãn armej ro?

21 Kwõn kepaak juon iaan em̦m̦aan ro rej lale eklejia eo im ba ñane bwe kokõn̦aan peptaij. Enaaj kõm̦m̦an karõk bwe ruo iaan em̦m̦aan ro rej lale eklejia ren jijet ippam̦ im etale jet kajjitõk ko. Kajjitõk kein rej jet kajjitõk  ko raorõk kõn katak ko jãn Baibõl̦ eo. El̦aññe em̦m̦aan rein rej kile bwe kwõpojak, eokwe renaaj kaalikkar waj ñan kwe bwe kwõmaroñ peptaij ñe enaaj wõr kweilo̦k el̦ap. * (Lale kõmel̦el̦e eo itulal̦.) Ilo naaj kweilo̦k eo el̦ap, enaaj wal̦o̦k juon katak in peptaij. Eo enaaj kwal̦o̦k katak in enaaj kajjitõk ippãn ro rej pojak in peptaij bwe ren uwaake ruo kajjitõk. Aer uwaaki kajjitõk kein im̦aan  aolep rukweilo̦k ro, ej juon wãween rej “kwal̦o̦k” kõn tõmak eo aer.

22 Peptaij ej wãween eo me ej kaalikkar ñan armej ro bwe em̦õj am̦ ajel̦o̦k mour n̦e am̦ ñan Anij im kiiõ kwõj juon iaan Ri Kõnnaan ro an Jeova. Ro rej peptaij rej tulo̦k ak jakol̦o̦k ium̦win dãn ñan kaalikkar im̦aan mejãn armej ro bwe em̦õj aer ajel̦o̦k mour ko aer ñan Jeova.

MEL̦EL̦EIN AM̦ PEPTAIJ

23. Ta mel̦el̦ein an juon peptaij ilo etan Jemãn, Nejin, im jetõb kwõjarjar?

23 Jijej ear ba bwe rũkal̦oor ro an renaaj peptaij ilo etan Jemãn, Nejin, im jetõb kwõjarjar. (Matu 28:19) Ta mel̦el̦ein men in? Eokwe, ej mel̦el̦ein bwe armej eo me ej pojak in peptaij ej kile im kautiej maroñ eo an Jeova Anij im maroñ eo an Jijej Kũraij. (Sam 83:18; Matu 28:18) Ej bareinwõt kile wãween an Anij kõjerbal jetõb kwõjarjar ñan kajejjet men ko rej ekkar ñan ankilaan.Galetia 5:22, 23; 2 Piter 1:21, UBS.

24, 25. (1) Ñe juon ej peptaij, ta eo men in ej kaalikkare? (2) Ta kajjitõk eo jenaaj etale ilo katak eo tok juon?

24 Peptaij ejjab juon m̦anit bajjek. Ejjab baj mel̦el̦ein tulo̦k im jakol̦o̦k ium̦win dãn. Ilo m̦ool, peptaij ej kõkkar kõn juon men ekanooj in aorõk. Ilo am̦ peptaij im jakol̦o̦k ium̦win dãn, men in ej kaalikkar bwe armej eo kar m̦okta em̦õj an mej jãn kõm̦m̦an ko an m̦okta. Innem ilo am̦ wal̦o̦k lõñtak jãn dãn eo, men in ej kaalikkar bwe kwõj kiiõ mour kõn juon mour ekããl im kwõpojak ñan kõm̦anm̦an ankilaan Anij. Keememej bwe ke kwaar ajel̦o̦k mour n̦e am̦, kwaar ajel̦o̦k ñan Jeova Anij wõt. Kwaar jab ajel̦o̦k mour n̦e am̦ ñan jabdewõt armej, jerbal, ak doulul. Ñe kwõj ajel̦o̦k mour eo am̦ im  peptaij, kwõj jino juon jem̦jerã epaak ippãn Anij.Sam 25:14UBS.

25 Ñe juon ej peptaij, ejjab mel̦el̦ein bwe em̦õj an bõk lo̦mo̦o̦r kadede. Rijjilõk Paul ear je: “Kom̦win kate kom̦, kõn mijak im ekkõl, bwe kom̦win kab maroñ tõprak ami lo̦mo̦o̦r.” (Pilippai 2:12, UBS) Innem, peptaij ej baj buñtõn ne eo jinointata me enaaj tõll̦o̦k eok ñan am̦ bõk lo̦mo̦o̦r. Bwe kwõn maroñ bõk lo̦mo̦o̦r, kwõj aikuj “pãdwõt ilo yokwe eo an Anij.” (Jud 21, UBS) Ta mel̦el̦ein an Baibõl̦ ba jen pãdwõt ilo yokwe eo an Anij, im ta ko kwõj aikuj kõm̦m̦ani ñan “pãdwõt ilo yokwe eo an”? Jenaaj uwaake kajjitõk in ilo katak eo ãliktata ilo bok in.

^ par. 21 Iien peptaij ko ekkã aer wal̦o̦k ilo kweilo̦k ko rel̦l̦ap an Ri Kõnnaan ro an Jeova.