Etal ñan katak ko ilo bok in

Etal ñan laajrak in katak ko

 KÕMEL̦EL̦E KO JET

Ta in Raanin Ekajet eo an Anij?

Ta in Raanin Ekajet eo an Anij?

ÑE KWÕJ roñ naan in “Raanin Ekajet eo an Anij,” ta eo ejiktok ilo l̦õmn̦ak n̦e am̦? Eokwe ekkar ñan elõñ armej rej ba bwe Raanin Ekajet eo an Anij, ej jitõñl̦o̦k ñan iien en̦ me elõñ pilien armej ro rar mej im bar mour renaaj jutak im̦aan tũroon eo an Anij, im enaaj ekajete kajjojo iaaer. Ro rem̦m̦an renaaj etal im mour ilañ ak ro renana renaaj etal im bwil ilo kijeek eo ej urur ñan indeeo. Bõtab, elukkuun oktak men in jãn wãween an Baibõl̦ kõmel̦el̦e kõn Raanin Ekajet eo an Anij. Naanin Anij el̦ak kwal̦o̦k kõn Raanin Ekajet eo an Anij, ejjab ba bwe ej juon iien ekaamijak. Ilo m̦ool, ej kwal̦o̦k bwe ej juon iien ekam̦õn̦õn̦õ im ej juon iien ñan kõkããle lal̦ in bwe en juon pedetaij.

Rijjilõk Jon ear kwal̦o̦k kõn Raanin Ekajet eo an Anij ilo bokin Revelesõn 20:11, 12. Eoon in ej ba: “Iar lo tũroon el̦ap im mouj im Eo ej jijet ioon, jãn turin mejãn rar ko lal̦ im lañ, im jab bar lo jikier. Im iar lo ro remej, ro rel̦l̦ap im ro reddik rej jutak im̦aan tũroon eo, im rar kõpel̦l̦o̦k bok ko; im rar kõpel̦l̦o̦k bar juon bok, eo ej bokin mour; im rar ekajet ro remej jãn men ko em̦õj jeje ilo bok ko, ekkar ñan jerbal ko aer.” Wõn Riekajet in me eoon in ej kõnono kake?

Eokwe, Jeova Anij ej Riekajet eo eutiejtata. Bõtab, ewõr juon eo em̦õj an kappeiki bwe en bõk jerbal in ñan ekajete armej otemjej. Ilo bokin Jerbal 17:31 (UBS), rijjilõk Paul ear ba bwe em̦õj an Anij “kõjenolo̦k juon raan eo enaaj ekajete lal̦ in kõn jejjet im jim̦we, kõn juon armej em̦õj an kããlõte.” Riekajet in me Anij ear kããlõte ej Jijej Kũraij. (Jon 5:22) Ak kiiõ, ñããt eo enaaj jino Raanin Ekajet eo an Anij im enaaj ewi aetokan?

Bokin Revelesõn ej kwal̦o̦k bwe Raanin Ekajet eo an Anij enaaj ijjino ãlikin Armagedon ak tarin̦ae eo an Anij. Ilo iien in, naaj ko̦kkure aolep armej ro rejjab pokake Anij im  rej pãd ium̦win tõl eo an Setan. * (Lale kõmel̦el̦e eo itulal̦.) (Revelesõn 16:14, 16; 19:19–20:3) Ãlikin Armagedon, naaj kalbuuji Setan im enjel̦ ro an renana ium̦win 1,000 iiõ. Ilo naaj tõre en̦, ro uwaan 144,000 renaaj ekajet ippãn Kũraij im renaaj tõl “ãinwõt kiiñ ro ium̦win juon to̦ujin iiõ.” (Revelesõn 14:1-3; 20:1-4; Rom 8:17, UBS) Ekkar ñan eoon in, Raanin Ekajet eo an Anij eban wal̦o̦k ium̦win juon wõt raan. Aetokin iien ekajet in enaaj wal̦o̦k ium̦win 1,000 iiõ.

Ium̦win 1,000 iiõ, Jijej Kũraij enaaj “ekajete armej otemjej, ro rej mour wõt im ro remej.” (2 Timote 4:1, UBS) Rein “rej mour wõt” ej jitõñl̦o̦k ñan ‘jar eo el̦ap’ me renaaj el̦l̦ã im mour jãn Armagedon. (Revelesõn 7:9-17) Rijjilõk Jon ear bar lo “ro remej . . . rej jutak im̦aan tũroon eo” ñan bõk ekajet. Rein rej jitõñl̦o̦k ñan ro me Jijej ear kallim̦ur im ba, ñe ‘ro otemjej rej pãd ilo lõb ko, renaaj roñ ainikien [Kũraij], renaaj diwõjtok’ im renaaj bar mour. (Jon 5:28, 29; Jerbal 24:15, UBS) Ak kiiõ Jijej enaaj ekajete er ekkar ñan ta?

Ilo ettõn̦ak eo an Jon, ej wõnm̦aanl̦o̦k im ba bwe kar “kõpel̦l̦o̦k bok ko” im kar “ekajet ro remej jãn men ko em̦õj jeje ilo bok ko, ekkar ñan jerbal ko aer.” (Revelesõn 20:12) Men ko kar je ilo bok kein rejjab kwal̦o̦k kõn kõm̦m̦an ko kar m̦okta an armej ro ilo iien eo rar mour. Etke jejel̦ã men in? Kõnke Baibõl̦ ej ba: “Bwe eo ear mej em̦õj kowãnõk e jãn jerawiwi.” (Rom 6:7) Kõn men in, em̦õj an jako aolep bõd im jerawiwi ko an armej ro remej. Eñin unin ñe renaaj bar mour Jijej eban ekajete er ekkar ñan kõm̦m̦an ko aer kar m̦okta. Innem, bok kein remaroñ jitõñl̦o̦k ñan naanin tõl im kien ko rekããl me Anij enaaj kõn̦aan bwe jen l̦oori. Ro renaaj el̦l̦ã jãn Armagedon kab ro renaaj jerkak im mour, renaaj aikuj pokake kien ko an Anij ekoba kien ko rekããl me Jeova emaroñ nãj litoki ium̦win naaj 1,000 iiõ ko. Rein rej aikuj kõm̦m̦ane men in bwe ren maroñ mour indeeo. Kõn  men in, naaj ekajete kajjojo armej ekkar ñan jerbal ko rej kõm̦m̦ani ilowaan wõt naaj 1,000 iiõ ko. Eñin iien eo me ej Raanin Ekajet eo an Anij.

Raanin Ekajet eo an Anij enaaj kõpel̦l̦o̦k juon iien em̦m̦an ñan an pilien ro renaaj bar mour me rejjañin kar jel̦ã kõn ankilaan Anij, jino katak kõn kien ko an im pokaki. Mel̦el̦ein men in bwe enaaj wõr juon jerbalin katakin ekanooj l̦ap im enaaj wal̦o̦k ipel̦aakin lal̦ in. Aiseia 26:9 ej ba bwe armej ro “renaaj katak menin wãnõk” ak katak ñan aer mour ekkar ñan ankilaan Anij. Bõtab, ejjab aolep renaaj kõn̦aan kõm̦m̦ane men in. Aiseia 26:10 (UBS) ej ba: “Meñe kwõj jouj ñan ro renana, ak rejjãmin jel̦ã kõm̦m̦ani men ko rejim̦we. Jekdo̦o̦n ñe rej jokwe ilo ãnin, ãneen ruwãnõk, ak rej kõm̦m̦ani wõt men ko rebõd; rem̦akoko in kautiej” Jeova. Rein renana renaaj mej ñan indeeo ilowaan naaj 1,000 iiõ ak Raanin Ekajet eo an Anij.Aiseia 65:20, UBS.

Ilo jem̦l̦o̦kinl̦o̦k Raanin Ekajet eo an Anij, armej otemjej renaaj oktak im lukkuun weeppãn ãinwõt kar Adam im Iv ilo jinoin. (1 Korint 15:24-28) Ãlikin 1,000 iiõ, mãlejjoñ eo ãliktata enaaj wal̦o̦k. Anij enaaj karõl̦o̦k Setan jãn kalbuuj bwe en bar kajjioñ tõlpiloik armej ro. Eñin ej iien eo ãliktata Setan enaaj kajjioñ in m̦on̦e aolep armej. (Revelesõn 20:3, 7-10) Ro reban po ippãn Setan renaaj loe an jejjet kũtien kallim̦ur eo ilo Baibõl̦ me ej ba: “Ro rem̦m̦an renaaj jolõt ãneo, im jokwe ilowaan ñan indeeo.” (Sam 37:29) Innem, alikkar bwe Raanin Ekajet eo an Anij enaaj bõktok jeraam̦m̦an ko ñan aolep armej ro rej tiljek ñan Anij!

^ par. 1 Ñan kal̦apl̦o̦k am̦ mel̦el̦e kõn Armagedon, jouj im lale Insight on the Scriptures, Volume 1, peij 594-595, 1037-1038, kajin Pãlle. Ri Kõnnaan ro an Jeova rar kõm̦m̦ane bok in.