Etal ñan katak ko ilo bok in

Etal ñan secondary menu

Etal ñan laajrak in katak ko

Ri Kõnnaan ro an Jeova

Kajin M̦ajel̦

Wõn Ro Rej Kõm̦anm̦an Ankilaan Jeova Rainin?

 KATAK 13

Ta in Pioneer?

Ta in Pioneer?

Canada

Em̦ ñan em̦

Katak Baibõl̦ ippãn juon armej

Katak ippãn make

Naan in “pioneer” ilo Kajin Pãlle ej mel̦el̦ein juon eo me ej etal ñan jikin ko rekããl ak ej jinoe juon jerbal me ro jet rej wõnm̦aanl̦o̦k wõt im l̦oore. Jesus ear ãinwõt juon pioneer. Etke? Kõnke ear jinoe jerbal in kwal̦o̦k naan kõn Aelõñ eo. Anij ear jilkintok Jesus ñan lal̦ in bwe en kwal̦o̦k naan im kõm̦m̦an bwe armej otemjej ren maroñ bõk lo̦mo̦o̦r. (Matu 20:28, UBS) Rainin, rũkal̦oor ro an Jesus rej l̦oore joñak eo an im kate er joñan wõt aer maroñ ñan kõm̦m̦an ‘rũkal̦ooran.’ (Matu 28:19, 20) Jet iaaer rar maroñ kanne aer peba bwe ren maroñ pioneer.

Juon pioneer ej juon me ej kamaat iien ko an ñan jerbal in kwal̦o̦k naan. Aolep Ri Kõnnaan ro an Jeova rej kwal̦o̦k naan kõn ennaan eo em̦m̦an kõn Aelõñ eo an Anij. Bõtab, jet iaaer rar kõm̦m̦an oktak ko ilo mour ko aer bwe ren maroñ kõm̦m̦ane 70 awa kajjo allõñ ilo jerbal in kwal̦o̦k naan (regular pioneer). Bwe ren maroñ tõpare joñan awa in, elõñ iaaer rar aikuj kappok aer jerbal part-time. Kar bar kããlõt jet ri kwal̦o̦k naan ro ilo jikin ko me el̦ap aikuj jipañ ie bwe ren kõm̦m̦ane 130 awa ko ak l̦apl̦o̦k kajjojo allõñ ilo jerbal in kwal̦o̦k naan (special pioneer). Ri kwal̦o̦k naan rein rej jokwane wõt kõn men ko ewõr ippãer meñe emaroñ jab l̦ap, im el̦ap aer tõmak bwe Jeova enaaj kabwe aolep aikuj ko aer. (Matu 6:31-33; 1 Timote 6:6-8) Ak ta kõn ro me rejjab maroñ tõpare 70 ak 130 awa ko? Eokwe, remaroñ kanne aer peba ñan kõm̦m̦ane 30 ak 50 awa ilo juon allõñ, el̦aññe remaroñ (auxiliary pioneer).

Juon ej pioneer kõnke ej yokwe Anij im bar armej ro. Ãinwõt kar Jesus, kõmij kile bwe el̦ap an armej ro aikuj jel̦ã kõn Anij im kõn ankilaan. (Mark 6:34) Ewõr ippem mel̦el̦e ko jãn Baibõl̦ im remaroñ jipañ armej rein kiiõ, im jipañ er bwe ren tõmak bwe juon iien men otemjej renaaj em̦m̦an. Kõnke ri kwal̦o̦k naan rein rej yokwe armej ro otemjej, rekõn̦aan kõjerbale iien im maroñ ko aer ñan katakin armej rein bwe ren jel̦ã kõn ennaan eo em̦m̦an. (Matu 22:39; 1 Tessalonika 2:8) Ilo wãween in, enaaj kajoorl̦o̦k tõmak eo an ri kwal̦o̦k naan rein. Renaaj epaakel̦o̦k wõt Anij im enaaj l̦ap aer m̦õn̦õn̦õ ilo mour ko aer.​—Jerbal 20:35.

  • Kwõmaroñ ke kwal̦o̦k ta ko pioneer ro rej kõm̦m̦ani?

  • Etke jet ri kwal̦o̦k naan rej pioneer?