Amedka

Jikuul̦in Mijinede ak Giliad, ilo Patterson, New York

Panama

Jerbal eo ñan katakin ro jet kõn Jeova ej juon iaan wãween ko rel̦l̦aptata Ri Kõnnaan ro an Jeova rej kõm̦m̦ani. Ewõr jikuul̦ ko kar kõjenolo̦ki ñan rukwal̦o̦k naan ro rekijejeto im rej kõmaat iien ko aer ñan jerbalin kwal̦o̦k naan kõn Aelõñ eo. Wãween in ej jipañ er bwe ren maroñ lukkuun ‘kajejjet jerbal eo aer.’​—2 Timote 4:5.

Jikuul̦in Bainier. Ãlikin juon iiõ in an juon rekũl̦ar bainier pãd ilo jerbalin full-time kwal̦o̦k naan, emaroñ etal ñan jikuul̦in bainier eo. Jikuul̦ in ej kõm̦m̦an ium̦win 6 raan im ekkã wõt an pãd ilo Im̦õn Kweilo̦k eo. Unin jikuul̦ in ej ñan jipañ bainier ro bwe ren epaakel̦o̦k Jeova im bwe ren lo tõprak ilo jabdewõt wãween im kilen kwal̦o̦k naan ko, im bareinwõt bwe ren wõnm̦aanl̦o̦k wõt ilo aer tiljek im kõm̦m̦ane jerbal in.

Jikuul̦ eo ñan Rukwal̦o̦k Naan ro an Aelõñ Eo. Aetokan jikuul̦in ej 2 allõñ im kar kõm̦m̦ane ñan katakin bainier ro el̦ap aer jel̦ã im imminene kõn jerbalin kwal̦o̦k naan. Rein rej m̦õn̦õn̦õ in em̦m̦akũt jãn ijoko jikier bwe ren ilo̦k im jipañ ilo jikin ko el̦ap aikuj rukwal̦o̦k naan ie. Ej ãinwõt ñe rein rej ba, “Ña e; Kwõn jilkinl̦o̦k eõ” ilo aer kajjioñe Rukwal̦o̦k naan eo el̦aptata, Jesus Christ. (Aiseia 6:8; Jon 7:29) Aer em̦m̦akũt jãn ijo jikier ñan juon jikin ettol̦o̦k ej kitibuj aer aikuj jel̦ã ukoktak ñan wãween mour ilo jikin eo rej em̦m̦akũtl̦o̦k ñane. M̦anit eo, mejatoto eo, im m̦õñã ko remaroñ lukkuun oktak jãn men ko rar rũtto tak im imminene kaki. Im bareinwõt emaroñ menin aikuj ñan aer katak juon kajin ekããl. Jikuul̦ in ej jipañ em̦m̦aan im kõrã ro ejjañin wõr pãleer im bareinwõt rippãlele ro, me 23 l̦o̦k ñan 65 aer iiõ, bwe ren kate er ñan kwal̦o̦k yokwe, jouj, ettã bõro, im wãween ko jet rem̦m̦an an Anij. Men in enaaj jipañ er ilo aer jerbal ilo jikin eo kar jilkinl̦o̦k er ñane. Bareinwõt jikuul̦ in ej jipañ er ñan katak kõn kapeel ko me renaaj kõm̦m̦an bwe en l̦apl̦o̦k wõt an Jeova im doulul eo an kõjerbal er.

Jikuul̦in Mijinede ak Giliad. Ilo kajin Hibru, naan in “Giliad” ej mel̦el̦ein “Ejojin Kam̦ool.” Jãn iien eo jikuul̦in Giliad ear jino ilo 1943, elõñl̦o̦k jãn 8,000 ro rar kadiwõjl̦o̦k jãn jikuul̦ in kar jilkinl̦o̦k er bwe ren kwal̦o̦k naan im kam̦ool “ñan aolepen lal̦,” im el̦ap tõprak ko rein rar loi. (Jerbal 13:47, UBS) Ilo jinoin ke jet iaan rikadiwõjl̦o̦k rein rar etal ñan Peru, ekar ejjel̦o̦k eklejia ñan jidik ilo aelõñ in. Kiiõ elõñl̦o̦k 1,000 eklejia ko ie. Ke mijinede ro rar etal im jerbal ilo Jepaan, edikl̦o̦k jãn kar 10 Ri Kõnnaan ro an Jeova ilo aelõñ in. Kiiõ elõñl̦o̦k jãn 200,000 Ri Kõnnaan ro an Jeova ilo Jepaan. Ilo jikuul̦ in me 5 allõñ aetokan, rej lukkuun etale aolepen kobban naanin Anij. Wõn ro remaroñ etal ñan jikuul̦ in? Ej ro rej jipejel̦ bainier, ro rej mijinede ilo bar juon aelõñ, ro rej jerbal ilo ra ko, im ro rej itok itaak im lol̦o̦k eklejia ko. Rein remaroñ etal ñan jikuul̦ in me em̦wilal̦ im pen katak ko rej bũki. Wãween in ej kammineneik er ñan jipañ bwe jerbalin kwal̦o̦k naan eo ipel̦aakin lal̦ in en pen im kajoor wõt.

  • Ta unin kar kõm̦m̦ane Jikuul̦in Bainier eo?

  • Kar kõm̦m̦ane Jikuul̦ eo ñan Rukwal̦o̦k Naan ro an Aelõñ Eo ñan wõn ro?