Epidodo ke ñan pokake jem̦am̦ im jinem̦ aolep iien?Jet iien epen. Kwõjel̦ã ke bwe Jijej ear pokake Jeova im bar jemãn im jinen?Waanjoñak eo an Jijej emaroñ jipañ eok bwe kwõn pokake jem̦am̦ im jinem̦ jekdo̦o̦n ñe epen. Jen kiiõ katak kõn men in.

M̦okta jãn an kar Jijej itok ñan lal̦ in, ear pãd ilañ ippãn Jemãn, Jeova. Ear bar wõr jemãn im jinen Jijej ijin ioon lal̦, etaer in Josep im Meri. Elemen bwe Josep im Meri ren maroñ kar nejier Jijej?

Eokwe, Jeova ear kõm̦m̦ane juon men ekabwilõñlõñ. Ear ukote Jijej bwe en erom juon niñniñ ilowaan lo̦jien Meri bwe en l̦otak im mour ilo lal̦. Niñniñ ko rej eddekl̦o̦k ilo aer pãd lo̦jien jineer, ejjel̦o̦k oktak jãn Jijej ke ear pãd ilo lo̦jien Meri. Im ke ear jejjet ratimjuon allõñ in an Meri bõro̦ro, ear kõl̦take Jijej. Kõn men in, Meri im Josep rar erom jemãn im jinen Jijej.

Ke ear 12 an Jijej iiõ, ear kõm̦m̦ane juon men me ear kwal̦o̦k an lukkuun yokwe Jemãn, Jeova. Ear kõm̦m̦ane men in ilo iien eo me e im baam̦le eo an rar etal ñan Jerusalem bwe ren kabuñ ñan Jeova. Im ilo iien eo rej ro̦o̦l, Josep im Meri rejjab loe Jijej. Kwõjel̦ã ke Jijej ear pãd ia?

Etke Jijej ear pãd ilo tampel̦ eo?

Josep im Meri rar m̦õkaj in bar ro̦o̦l ñan Jerusalem im rar pukote Jijej aolep jikin. El̦ap aerro inepata kõnke erro ejjab loe. Ke ear mootl̦o̦k jilu raan, rej kab loe Jijej ilo tampel̦ eo ak jikin kabuñ eo. Etke Jijej ear pãd ilo tampel̦ eo?Bwe en katak kõn Jemãn, Jeova. El̦ap an Jijej yokwe Jeova im ekõn̦aan katak kilen kam̦õn̦õn̦õik e. Jekdo̦o̦n ñe ear rũttol̦o̦k im juon likao, ak aolep iien Jijej ear pokake Jeova. Jijej ear pokake wõt meñe ear pen ñan e, im jekdo̦o̦n ñe ear aikuj eñtaan. Ak Jijej ear ke bar pokake Josep im Meri?Baibõl̦ ej ba bwe ear pokake.

Ta eo kwõmaroñ katak jãn Jijej?Kwõmaroñ katak bwe jej aikuj pokake jemãd im jined jekdo̦o̦n ñe jet iien epen. Kwõnaaj ke pokake?

RIITI ILO BAIBÕL̦ EO AM̦