Skip to content

BAIBO IKAAVWA ANTU UKUSENUKA

Natandika Ukuvwana na ya Tata Lyene

Natandika Ukuvwana na ya Tata Lyene
  • UMWAKA UNO YAVILWE: 1954

  • KUNO YAVYALILWE: Philippines

  • VINO UMI WALI: Yatiile ukuvwana na ya isi ali sana nu unkalwe

VINO NAALI

Antu aingi yakatandalila icipoma icamanyikwa sana icayela umupipi ni tauni lya Pagsanjan ilya mu Philippines. Kuku akuno ya tata ya Nardo Leron yakuliile umu upina. Lino yaweni vino amu uteeko, ya kapokola alino na apa ncito pano yaombelanga yali sana na mafisakanwa, izile iyaya asoke sana.

Avyazi yane yaombesyanga sana pakuti yakuzye ana yao 8. Fwandi insita ikulu yayanga umu myamba umu kusakamala ivilimwa. Ilingi tatalenzi Rodelio nani twaisakamalanga nupya insita izingi twayanga sile ni nzala. Nanti icakuti twali ance, tutakwatanga ni nsita ya kucina. Lino cila mwana wafisya imyaka 7 watandikanga ukuomba umwi famu ilikulu, muno kwayanga ukusenda iviya ivinyome ivya makokonati ukupita umu myamba itale ukwika umu tuzila utunono. Ndi cakuti iciviya icinyomesya yatupatikizyanga ukucikweta.

Ya tata yatuumanga sana, nomba tuvwanga sana uyi ndi cakuti twalola yakuuma ya mayo. Twezyanga ukuyalesya nomba twafilwanga. Rodelio nani twazumilizyanyizye umu nkama ukukoma ya tata ndi twakula. Ala nalondesyanga ukukwata ya tata atutemilwe.

Pa mulandu wakuti nuvwanga sana uyi nu kusoka pa mulandu nu unkalwe wakwe ya tata, nafumile pa ng’anda lino nali ni myaka 14. Pa nsita imwi nikazileko umu miseo nupya natandike ukuomvya impwanyi. Lyene natandike ukuomba nu wato, ukutwala antu aizanga umu kutandala uku cipoma.

Lino papisile imyaka inono, natandike ukusambilila pa yunivesiti umu Manila. Nomba pa mulandu wakuti naswililanga uku Pagsanjan umu kuombako pa mpela ya mulungu nakwatanga insita inono iyakuwelenga. Umi wane watazile nupya utakweti ni ncito, nupya ukuomvya impwanyi kutacefyangako masakamika yane. Natandike ukuomvya imilembo iyakundenga ukuya umukanzuke ili wakwe kokeni, na heroin. Ukuomvya imilembo ii ikavulunganya uwongo kwalenganga nacita uzelele. Nali nene mupina, nafyengwanga, nupya naculanga sana. Napasile sana amu uteeko nupya nalolanga kwati aliyo yalenganga ivintu vii ukucitika. Nuzizye Leza ukuti: “U mulandu ci uno umi wayela vii?” Nomba ntazananga amasuko uku mipepele ino nalondelezyangako. Naomvyanga imilembo pakuti ntaloleka ukuti nasakamalanga sana.

Umu 1972 asambi ya mu Philippines yapanzile kaliumba akaakatukilanga uteeko. Ningilemo umu kaliumba konga nupya nizile inja sana umunkalwe. Antu aingi yayalemile, nupya lino papisile imyezi, kwafumile isunde lyakuti asilika aliyo yamacingililanga impanga asi ya kapokola foo.

Natandike ukwikala umu miseo nupya, nomba pa nsita ii yene nali sana ni ntete ku amu uteeko pa mulandu wakuti nali pali ya cipondoka. Pakuti nakwata impiya zya kukalila imilembo, natandike ukwiya lyene pa cisila natandike ukukazya umwili wane uku yakankala na yano yafumanga uku mpanga zyuze. Ntasakamile ndi cakuti nali nu kuya nu umi nanti ukufwa.

Pa nsita iyo ala ya mayo nu mutowane umulumendo yatandika ukusambilila Baibo na ya Nte Yakwe Yeova. Ya tata yasosile sana nupya yosile impapulo izyalandanga pali Baibo. Nomba yonsi yoili yazizimizye nupya yawatiziwe.

Uwanda umwi, Nte wavwanzile na ya tata pali vino Baibo yalaya pa vilacitika uku nkoleelo lino kulaya umulinganya umu nsi yonsi. (Masamu 72:12-14) Ulayo wafisile sana ya tata pa mwenzo icakuti yapingwilepo ukutandika ukulondelezya aineco. Muli Baibo yatazanyile sile malayo yakwe Leza lelo yazanyile na vino Leza akalonda ya iya na ya isi ukucita. (Efeso 5:28; 6:4) Patalengile yene pamwi na atowane yauze izile iyaya ya Nte. Pa mulandu wakuti nikalanga ukutali ntamanyile vyonsi vii.

VINO BAIBO YANGAVWILE UKUSENUKA

Umu 1978, naile uku Australia. Nomba nanti icakuti umu mpanga ii mwali umutende ni mpiya, ntakweti umutende mu mwenzo. Natwalilile ukumwa uwengwa nu kuomvya imilembo ikavulunganya uwongo. Lino papisile insita umu mwaka kwene uwa, ya Nte Yakwe Yeova yantandalile. Natemilwe sana vino yandanzile muli Baibo pali vino insi ilaya iya mutende, nomba nuvwanga intete ukuvwana sana nayo.

Patalengile naswilile uku Philippines pa milungu sile inono. Aina yane yanenyile ukuti ya tata yaombesyanga pa kuti yaye antu umusuma, nomba umwenzo wane wali sana usoke icakuti nezyanga na maka pakuti sile tutalolana nayo.

Umutowane umukazyana wandondolwelile ukuomvya Baibo umulandu uno antu yaculilanga na cino kutayelile umulinganya. Nazungwike sana ukulola kakazyana akatamanyile ni vingi umu umi kasuka amasuko uku mauzyo yano nakweti. Lino ntatala naswilila, ya tata yampeezile ibuku lyakuti Mungikala Umu Paladaise Pano Nsi Amanda Pe (You Can Live Forever in Paradise on Earth). * Yatiile: “Ute ukupitana ukulonda amasuko ku mauzyo yano wakwata nu kulonda ukukwata umutende umu nzila iipe, ili wa kuomvya imilembo ikavulunganya uwongo. Ibuku lii lilakwazwa ukuzana vino ukalonda.” Yanenyile ukuyalonda ya Nte Yakwe Yeova ndi naswilila uku Australia.

Ibuku lii lyalembwa na ya Nte Yakwe Yeova nomba yata ukupulinta.

Nacisile vino ya tata yanenyile nupya naile inzana Ing’anda ya Wene Yakwe ya Nte Yakwe Yeova iyali umupipi na kuno nikalilanga umu Brisbane. Nazumiile ukutandika ukusambilila Baibo. Amausesemo aya muli Baibo wakwe yaya aya muli Danieli icipande 7 na muli Ezaya icipande 9 yandanzile ukuti uteeko wakwe Leza muno mutalaya mafisakanwa ulateeka uku nkoleelo. Nasambilile ukuti tulaipakizya ivintu ivisuma umu Paladaise pano nsi. Nalondanga ukuti Leza antemwe, nomba nilwike ukuti nalondekwanga ukusenula imyelenganyizizye yane, ukuta ukuomvya imilembo nu kumwa uwengwa alino nu kuta imikalile ino nikalilangamo. Twapatukiine nu mukazyana wino nikalanga nawe, nupya natiile ukucita ivintu ivyantesile uzya. Lino utailo wane wayanga ukukomelako muli Yeova, napefile ukuti angazwe ukusenuka nu mu vintu vyuze.

Panono panono nilwike ukuti vino nasambililanga vingasenula umi wane. Baibo ikati ndi cakuti tukuombesya ‘tungazwala umi upya.’ (Kolose 3:9, 10) Lino nezyanga ukucita ivintu vii, nilwike ukuti vino nuvwile pali vino ya tata yatandike ukusenula imiyele yao vingaya ivisinka. Mu cifulo ca kuyasokela nu kuyapata, nalondanga ukupanga umutende nayo. Lyene nayelile ya tata uluse nu kuta ukuyapata vino nayapasile ukufuma uku wance wane.

UKUSENUKA KWANGAVWA SANA

Lino nali umulumendo, ilingi nalondelanga yauze umu kucita ivintu iviipe. Vino Baibo ikatucelula i vya cumi pano ali vino vyancitikile, ukucina na antu aipe kwalenzile nacita ivintu iviipe. (1 Kolinto 15:33) Nomba paa nakwata ivyuza ivyakutailwa muli ya Nte Yakwe Yeova, nupya yangazwa ukuya umuntu umusuma. Lyene nupya pa antu kwene yayo apano nazanyile na mamane umusuma cuze, Loretta. Tukasambilizya capamwi yauze vino Baibo ingayazwa.

Tukuliila pamwi na mamane ni vyuza

Naya sana ni nsansa pakulola vino Baibo yaazwilizye ya tata ukuya vino ntatazile nelenganyepo ukuti yangaya, izile iyatemwa sana ya mayo, kuicefya nupya yali sana nu mutende. Lino twakomanyile pa cisila lino nawatiziwa naya Inte Yakwe Yeova umu 1987 ya tata yankumbatiile pa muku wakutandikilapo umu umi wane.

Pa myaka 35 ya tata yatwalilile ukuombela pamwi na ya mayo ukunenako yauze pa upalilo uno Baibo ikalandapo. Yatandike ukuombesya nu kusakamala antu icakuti yamanyikwe ukuti yakaazwilizya sana antu. Umu myaka iyo, nasambilile ukutandika ukuyacindika nu kuyatemwa. Nali sana ni cilumba pa kumanyikwa ukuti nene mwanao. Yafwile umu 2016 nomba nkatemwa sana ndi nelenganya ukuti yene pamwi nani twasenwike sana lino twalondelanga vino Baibo ikasambilizya. Nsiuvwa ukuti napata ya tata nanti apanono. Nupya nkataizya sana Tata wane uwa uwa kwi yulu Yeova Leza wino watulaya ukufumyapo ivintu vyonsi ivikalenga indupwa ukucula nu kuwaika umu nsi yonsi.

^ pala. 20 Lyapanzilwe ni Nte Zyakwe Yeova, nomba ndakai yaata ukupulinta.