Skip to content

IVINGAAZWA ULUPWA

Vino Mungazwa Umwana Winu Ukuomba Ningo Uku Sukulu

Vino Mungazwa Umwana Winu Ukuomba Ningo Uku Sukulu

Umwana winu asiloleka ukuti atatemwa isukulu, nupya asilonda ukuwelenga nu kulemba omuweki. I vyani vingamucitikila? Angaapona nupya imiyele yakwe ingipilako. Mungacita uli pakuti mwazwe umwana winu ukuomba ningo uku sukulu?

  • Vino mulinzile ukumanya

  • Vino mungacita

Vino mulinzile ukumanya

Mupatikizya ukalenga sile intazi ukukulilako. Ukupatikizya umwana winu kungamulenga asakamikwa sana lino ali uku sukulu na lino ali pa ng’anda. Pakuti acefyeko intazi, angaasomba, ukufisa ndi wapona, ukusaina ivya ufi pali lipoti fomu nanti sile ukulofwa uku sukulu. Intazi ilakulilako sile.

Ivilambu vingalenga umwana ukwika sile mano ku vilambu kwene. Isi uwi zina lyakuti Andrew watiile: “Pakuti tukomelezye umwana witu umukazyana, twezyanga ukumupeela ivilambu ndi wapasa ningo, nomba cico calenganga sile aika mano pa vilambu. Ndi cakuti wapona, uvwanga uyi ukuti atamapokelela icilambu, ukucila ukuvwa uyi ukuti watapona.”

Ukupeela ya mwalimu umulandu kutange kwazwe umwaninu. Umwana winu angasondwelela ukuti pakuti umuntu apase atalinzile ukuombesya. Nawe kwene angatandika ukupeela yauze imilandu ndi cakuti wapona nu kwenekela yauze ukumumalila intazi. Umukwipimpazya sile umwana winu angafilwa ukusambilila icintu icicindame kuli kuti ukumanya ukuti aliwe wataluvyanya.

Vino mungacita

Mwalesya ukusoka. Ndi cakuti mwasoka mulinzile ukutantika insita yuze iyakulanzyanya nu mwaninu pali vino akuomba uku sukulu. Isi uwizina lyakuti Brett watiile, “Uwane nani tukalanzyanya ningo na ana ndi cakuti ituteeka umwenzo nupya tuli ni cikuuku.

Cisinte ca muli Baibo: “Muntu wensi alinzile kuuvwa zuwa, lelo atekele kulanda nu kusoka.”—Yakobo 1:19.

Mwanyini icikulenga intazi. Ivikalenga umuntu ukupona u kumucuzya uku sukulu, ukusenula senula masukulu, ukusakamala umulandu na masindano, intazi zya mu lupwa, ukuvilwa ukulala, ukukanatantika ningo insita, alino nu kukanaikako sana mano. Mutalinzile ukwelenganya sile ukuti umwaninu icikopo.

Cisinte ca muli Baibo: “Wiyo akasakamala ukuvwa isunde, alazana isyuko.”—Mapinda 16:20.

Mwacita ivintu ivingalenga ana ukutemwa ukusambilila. Mwatantika insita ya kuzana omuweki ni ya kuwelenga. Mukapekanye incende kuno umwaninu angikala pa kuzana omuweki kuno kusi ivya kupumvyanya (ukwikako sile na TV na foni). Mwapaatula omuweki umu viputulwa pakuti mwazwe umwaninu ukwikako amano. Hector, isi uwa ku German watiile, “ndi cakuti kuli masindano anono tukapitulukamo panono cila wanda ukucila ukulolela lino insita yasila.”

Cisinte ca muli Baibo: “Icintu consi cakwata insita ya ciko.”—Kasambilizya 3:1.

Mwayakomelezya ukusambilila. Ndi cakuti umwana akumanya usuma wi sukulu ndakai, cilamwazwa ukulondesya ukusambilila. Insamusi zingamwazwa ukumanya ivya kuomvya ningo impiya.

Cisinte ca muli Baibo: “Uwalonda amano, uwalonda nu kwiluka. . . . Temwa amano.”—Mapinda 4:5, 8.

Vino mungacita: Mwaazwa umwaninu ukuzana omuweki, nomba mutalinzile ukumuzanila. Ya Andrew yalanzile ukuti, umwana witu umukazyana wasintilile pali sweswe ukumuzanila amasuko ndi akweti omuweki nupya atezyanga nako ukulonda masuko.” Mwasambilizya umwaninu ukumanya ivya kuzana omuweki umwineco.