Aakwizizyanya aingi yakasoololapo ukutandika ukwikakala pamwi lino yatatala yatwalana. Yamwi yakaelenganya ukuti ukucita vii kungayazwa ukulola ndi cakuti iyalinga ukutwalana nupya cingalenga cikayangupalile ukwikala ningo umu cupo cao. Uzye caya sile ningo ukwikala pamwi lino mutatala mwatwalana?

Umu cipande cii tumaasuka mauzyo yaa

•  I vyani vino Baibo yalandapo?

•  Uzye ukwikala pamwi ukungamwazwa ukuipekanya ukwikala umu cupo?

•  Uzye ukwikala pamwi kungamwazwa ukusunga impiya?

•  Uzye ukwikala pamwi ukungamwazwa ukukanatwalana nu muntu aasi ningo?

•  Uzye kuli inzila yuze isuma ingamwazwa?

 I vyani vino Baibo yalandapo?

•   Baibo yakanya ukupanga icupo lino mutatala mwatwalana. Yalanda ukuti, tulinzile “kutaluka uku uzelele.” (1 Tesalonika 4:3; 1 Kolinto 6:18) Nanti sile ayano yakwikala pamwi lino yakwizizyanya, nayo kwene yatalinzile ukupanga icupo, nanti icakuti yakwelenganya ukuti yalatwalana uku nkoleelo. a Amasunde aya muli Baibo yakacingilila yano yakwizizyanya ukuti yatakwata inda lino yatatala yatwalana nanti ukukwata intazi zyuze izikafuma umu kwikala pamwi lino mutatala mwatwalana.

•   Leza ali wino wisileko ukutwalana. Lino wisileko atwalane yakutandikilapo, walanzile ukuti: “Umonsi alasha isi na nyina nu kuilundanya uku muci wakwe, nupya yoili yalaya umwili onga.” (Utandiko 2:24) Ndi cakuti iya nanti umuci akwika sile mano kuli wino watwalana nawe, umu lupwa mungaya ukutemwa nu mutende.

 Uzye ukwikala pamwi ukungamwazwa ukuipekanya ukutwalana?

 Yamwi yakaasuka ukuti ee. Yakaelenganya ukuti aakwizizyanya yangasambilila ivya kwikala umu cupo ndi cakuti yakuombela pamwi imilimo ya pa ng’nda nu kulola imiyeele ino cila muntu wakwata. Nomba icintu icicindame icingalenga atwalane ukutwalilila ukuya ni nsansa umu cupo cao, u kutwalilila ukutemwana nu kucindikana.

 Uzye yano yakwizizyanya yangacita uli pakuti yasambilile ivya kutwalilila ukutemwana lino vintu vili sile ningo na lino vyatala? Ukutandika ukwikala pamwi lino mutatala mwatwalana asi ali kuno kungalenga muce muye ni nsansa umu cupo cinu, pano pa nsita yii ale cila muntu akwelenganya ukuti atakwata untungwa uwa kusha umuze. Lelo, amu cupo yakatwalilila ukuya ni nsansa ndi cakuti iyaitemelwa ukutwalilila ukutemwana nu kucindikana alino nu kuombela pamwi pa kumala intazi.

 Icisinka icicindame: Ndi cakuti yano yatatala yatwalana yatandika ukwikala pamwi, yangazana ukuti yatandika ukuipekanya ukupaalukana umu cifulo ca kuipekanya ukutwalana.

 Cisinte ca muli Baibo: “Consi cino umuntu akukomela, acino alazombola.”— Galatiya 6:7.

 Uzye ukwikala pamwi kungamwazwa ukusunga impiya?

 Yamwi yakaasuka ukuti ee. Ukulingana na vino ya Pew Research Center yalondelizye umu United States, cazanikwe ukuti antu 4 pa yantu 10 yano yatandikanga ukwikala pamwi, yelenganyanga ukuti ukucita vivyo kungayazwa ukusunga impiya. Nomba, aingi pa yantu yaa izile iyazana ukuti yatatala yalinga ukutwalana pano yatakweti impiya izya kuomvya.

 Ukutandika ukwikala pamwi lino mutatala mwatwalana kungaleta intazi, sana sana uku mwanaci. Wakwe, ndi cakuti aakwikala pamwi yasoololapo ukukanatwalana, ilingi umwanaci ali wino akashala akusunga ana yano iyakwata.

 Icisinka icicindame: Umu kutandika ukwikala pamwi lino mutatala mwatwalana mwaya intazi izingi ukucila nu usuma uno ungayamo.

 Cisinte ca muli Baibo: “Ne Yeova, nene Leza wako,Aakakusambilizya ivyakuti vyakuzipila.”—Ezaya 48:17.

 Uzye ukwikala pamwi ukungamwazwa ukukanatwalana nu muntu aasi ningo?

 Yamwi yakaasuka ukuti ee. Nomba, ibuku lyakuti Fighting for Your Marriage lyalanda ukuti, “antu aakatandika ukwikala pamwi lino yatatala yatwalana yasiiluka ukuti cilayatalila ukupalukana.” U mulandu ci uno cingayatalila? Yamwi pa cisila cakuti yatandika ukwikala pamwi yangazana ukuti yatalinzile ukutwalana. Nomba pa mulandu ni vintu wakwe, vitekwa vino yakasungila pamwi, ing’anda ino yasonkelela pamwi, nanti inda ino umwanaci wakwata ukwaula ukwenekela, yakasoololapo sile ukutwalilila ukukwikala pamwi vivyo kwene pano ale yelezyanya mpiti. Ibuku lyakuti Fighting for Your Marriage lyalanda nu ukuti, “antu yano iyalinga ukupalukana yangasoololapo ukutwalana vivyo kwene pa mulandu sile uwakuti yelezya ukwikala pamwi.”

 Icisinka icicindame: Mu cifulo icakuti ukwikala pamwi kumwazwe ukupingula ningo pa vintu, limwi kungalenga ukuti cimutalile ukuta ukwizizyanya nu muntu wino mutatemilwe.

 Cisinte ca muli Baibo: “Umucenjele akalola uzanzo nu kufisama, Lelo aatamanya cimwi akatwalilila ukupita nupya ivintu vikamwipila”—Mapinda 22:3.

 Uzye kuli inzila yuze isuma ingamwazwa?

 Mungataluka ukuntazi izikaiza pa mulandu nu kwikala pamwi lino mutatala mwatwalana nupya mungaca mukwate icupo icisuma. I cani icingamwavwa ukucita vivyo? U kulondela ivisinte vya muli Baiboo ivikalanda pa cupo. Mwakwatako insita iya kumanyana nu muntu wino mukwizizyanya nawe lino mutatala mwatwalana. Cingazipa ukusolola ukutwalana nu muntu wino mwakolana muli vino mwacindika alino na muli vino mwazumilamo, ukucila ukwika mano kuli vino akaloleka

 Muli Baibo mwaya ukupanda mano ukungamwazwa ukumanya ivyakucita pakuti muce muye ni nsansa umu cupo cinu. b Wakwe, muli Baibo mwaya ivisinte ivingamwazwa . . .

•   ukutaluka ukukana ya uwa cisinka

•   ukuya iya nanti umuci umusuma

•   ukumanya ndi cakuti umuntu wino mukwizizyanya nawe atalinga ukutwalana nawe nanti foo

 Pakuti mumanyilepo na vyuze pa malyasi yaa, lolini pa ciputulwa icakuti “Icupo nu Lupwa” pa jw.org.

 Cisinte ca muli Baibo: “Amalembo yonsi yafuma kuli Leza nupya yakaomviwa ku kusambilizya.”—2 Timoti 3:16.