Mucipande cii tumalanda pali vii ivyalondelelapo

•  U mulandu ci uno cacindamila ukulanzyanya ale mukulolana?

•  Vino ungatandika ukulanzyanya

•  Vino Auzo Yakalanda

 U mulandu ci uno cacindamila ukulanzyanya ale mukulolana?

 Antu yamwi yakalanda ukuti ukulanzyanya ale mukulolana kwatala nupya kukauvwisha intete, kutaya wa kulembelana mameseji.

 Anna watiile: “Catala sana ukulanzyanya nu muntu ale mukulolana, pano utanga usenula vino watulanda nanti ukufuuta.”

 Jean nawe watiile: “Kukaya ukwiko sana mano ndi cakuti ukulemba meseji, nomba nga ukulanda na umwi citatala ukuluvyanya. Lyonsi lino nkulonda ukulanda vimwi, umu mwenzo nkainena ukuti ‘Si ntaluvyanya!’”

 Nomba nanti ciye vivyo, pa nsita imwi umu umi ale ulalondekwa ukusambilila ivya kulanzyanya na antu. Wakwe, ulalondekwa ukusambilila ivya kulanzyanya na antu pakuti upange ivyuza, kukwata incito nu kutwalilila ukuomba incito iyo, nanti pa kutandika ukwizizyanya na umwi ndi cakuti waipekanya.

 Icisuma icakuti, ukulanda nu muntu ale mukulolana kutalinzile kwakuvwisha intete. Ungasambilila ivya kulanda na antu nanti icakuti wakwata insonyi.

 Neal watiile: “Insita zimwi swensi kwene tukalanda ivisi ningo nupya tukauvwa insonyi. Fwandi utalinzile ukulola ukuti wamalilika.”

 Vino ungatandika ukulanzyanya

•   Wauzya mauzyo. Waelenganya pi lyasi lino antu yangatemwa ukuvwa, nupya uwaezya ukutandika ukulanzyanya nayo pi lyasi kwene lilyo. Limwi unguzya ukuti:

   “Uzye wakwata ya kalume yako yamwi nanti ya kaci yako?”

   “I ncito ci ino ukaomba?”

   “Uzye uvwile ukuti . . . ?”

   Nupya, cingazipa ndi cakuti walanda pali vimwi vino vyamucitikila mwensi nanti vimwi vino mwensi mukaipakizya ukucita. Wakwe, ndi cakuti mwasambililanga pi sukulu ililimwi nanti mukaomba incito ilimwi, unguzya mauzyo pali vivyo kwene vino mwakolanamo.

   Maritza watiile: “Unguzya mauzyo pali vino ungatemwa ukumanya.”

   Vino utalinzile ukucita: Utalinzile ukuuzya sana mauzyo kwati ukulondelezya vimwi. Nupya, utauzya mauzyo aangalenga umuntu auvwe insonyi. Amauzyo wakwe ilyakuti “I vyani ivikukucuzya umu umi?” nanti ilyakuti “U mulandu ci uno ukazwalila vyakwe bulu lyonsi kwene?” yangalenga umuntu auvwe insonyi. Iuzyo lyakwe ciili lyene lingalenga umuntu auvwe kwati ukumupeela imilandu!

   Pakuti citaloleka kwati ukulondelezya vimwi, ndi cakuti umuntu wasuka iuzyo lino iwamuzya, nawe uwalandapo vimwi pi iuzyo kwene lilyo. Ukucita vii kungalenga ukuti mwalanzyanya, ukucila sile ukulauzya umuzo mauzyo.

   Cisinte ca muli Baibo: “Melenganyo ya mu mwenzo wa muntu yaaya wa cisima ca manzi cizike, lelo umuntu aakailuka aakatapa manzi yayo.”—Mapinda 20:5.

•   Uwaya kakutika musuma. Ungatwalilila ukulanzyanya ningo nu muntu ndi cakuti ukukutikisha ukucila ukwika sile mano uku kulanda.

   Tamara watiile: “Lyonsi lino nkulanzyanya na umwi, nkaezya na maka ukumanyako vimwi ivipya pali aliwe. Lyene, nkatwalilila ukwiusha vino umuntu wiyo waneena nupya nkaelenganya pi iuzyo lino ningaca imuuzye nga twalolana nupya.”

   Vino utalinzile ukucita: Utasakamala pali vino umalanda pa cisila cakuti umuntu wasuka iuzyo lino waliuzya. Ndi cakuti ukukutikisha, ungamanya ivya kulanda ukulingana na vino umuntu wasuka.

   Cisinte ca muli Baibo: “Umuntu wensi alinzile ukuya aakauvwa zuwa, umuteekele pa kulanda.”—Yakobo 1:19.

•    Walanga ukuti watuwika mano uku muntu wino mukulanda nawe. Ulaipakizya ukulanzyanya ndi cakuti ukwika mano uku muntu wino mukulanda nawe.

   Marie watiile: “Ndi cakuti ukuleka yauze yakuyuvwa ukuti utuwika mano kuli vino yakulanda, ungaipakizya ukulanzyanya nayo. Nanti icakuti insita zimwi ivya kulanda vikutala ivisila.”

   Vino utalinzile ukucita: Utauzya iuzyo ilingalenga umuntu auvwe insonyi. Wakwe, citanga ciye ningo ukulanda ukuti “Ikoti lii ilisuma. Uzye waikalile nanti yamwi yakukaliile sile?”

   Cisinte ca muli Baibo: “Mutalonda sile ivingamuzipila, lelo mwalonda ni vingazipila yauze.”—Filipi 2:4.

 Ungacita uli pakuti usondwelele ningo ukulanzyanya? Umulumendo uwizina ilyakuti Jordan walanzile ati: “Uwaezya ukushalikizya na mazwi asuma. Wakwe, limwi ungalanda ukuti ‘Naipakizya ukulanzyanya nawe’ nanti ukuti ‘Uombe ningo,’ amazwi ya musango uu yangalenga ukuti muce mukwate pa kutandikila ukulanzyanya nu muntu nga mwalolana nawe nupya.”