•  Yamwalimu yamwi yatala

•  Ivingakwazwa ukuzizimizya

•  Vino ungalanzyanya na ya mwalimu

•  Vino Auzo Yakalanda

 Yamwalimu yamwi yatala

 Yakasukulu aingi yakakwata ya mwalimu aakaloleka ukuti yaya nu lufyengo nupya aataya ni cikuuku

•   Luis aali ni myakaya 21, walanzile ati: “Twakweti mwalimu umwi uwaomvyanga sana amazwi aipe alino nu kusaalula sana yakasukulu. Pa mulandu wakuti mwalimu wii wali umupipi nu kuleka ukuomba, limwi ali cino atasakamalilanga ukuti yali nu kumuzinga incito.”

•   Melanie aali ni myaka 25, akaiusha vino yamwalimu yamucuzyanga sana ukucila vino yacuzyanga yakasukulu yauze. Watiile: “Mwalimu walandanga ukuti wancuzyanga sana pa mulandu wakuti ntali umu mipepele ino ashala yalimo. Walanzile nu ukuti wangazwanga ukuipekanya kuli vino yali nu kulancuzya nga nakula.”

 Ndi cakuti wakwata yamwalimu atale, kuli vimwi vino ungacita pakuti ivintu vitakutalila sana lino uli ukusukulu. Ungezya ukucita vii ivyalondelelapo.

 Ivingakwazwa ukuzizimizya

•   Uwacita vino yamwalimu yako yakulonda. Vino yamwalimu yakaenekela ukuti yakasukulu yacita vikapusanapusana. Uwaezya na maka ukumanya vino yamwalimu yako yakulonda ukuti uwacita, nupya uwaezya ukucita vivyo kwene.

   Cisinte ca muli Baibo: “Umuntu wa mano akakutika nu kusambilila ivingi.”—Mapinda 1:5.

   Christopher watiile: “Nilwike ukuti ndinzile ukulacita vino yamwalimu yane yakulonda, fwandi natandike ukwezya na maka ukucita ivintu ukulingana na vino yakulonda. Cii calenzile ukuti nauvwana nayo.”

•   Uwaya nu mucinzi. Uwaezya ukuomvya amazwi asuma lino ukulanda na ya mwalimu. Nupya utaasukana nayo, nanti icakuti ukulola ukuti icilinga ukucita vivyo. Uwaiusha ukuti yakakulola ukuti wewe kasukulu sile, mutalingine nayo.

   Cisinte ca muli Baibo: “Lekini amazwi inu yaye asuma, acemekwe nu musilya, pakuti mwamanya ivya kwasuka ningo umuntu ali wensi.”—Kolose 4:6.

   Ciara watiile: “Ilingi yakasukulu yasicindika yamwalimu ukulingana na vino cilinzile ukuya, fwandi ndi cakuti wemo ukwezya na maka ukuya nu mucinzi kuli aliyo cingalenga ukuti yatakucuzya sana.”

•   Uwalangulukilako. Yamwalimu nayo kwene antu sile. Cii cikusenula ukuti nayo kwene yakwata ivikayacuzya alino na masakamika wakwe vino caya uku yantu yonsi. Fwandi, utalinzile sile ukusondwelela ukuti yamwalimu yako yataya ni cikuuku nanti ukuti yamwalimu yako yakupata.

   Cisinte camuli Baibo: “Swensi tukaluvyanya imiku iingi.”—Yakobo 3:2.

   Alexis watiile: “Yamwalimu yakaomba umulimo ukome sana. Ntamanyile nga ningakwanisha ukwazwa yakasukulu yonsi ukuya ni miyele isuma alino nu kulayasambilizya. Fwandi lyonsi nelenganya ukuti ndinzile ukuya kasukulu umusuma pakuti nangupazizye yamwalimu yane umulimo, pakuti yatasakamala sana.”

•    Uwanenako avyazi yako. Avyazi yako yakalonda ukuti ivintu vyakuzipila lino uli ukusukulu, nupya vino yangakuneena vingakwazwa ukumanya ivya kuvwana na yamwalimu atale.

   Cisinte ca muli Baibo: “Mapange yakavulunganyiziwa nga pasi ukulanzyanya.”—Mapinda 15:22.

   Olivia watiile: “Avyazi yako yapita umu ntazi izingi sana ukucila zino wemo wapitamo. Fwandi ndi cakuti ukuyuvwila, ivintu vingakuzipila.”

 Vino ungalanzyanya na ya mwalimu

 Insita zimwi, cingalondekwa ukuti ulande na yamwalimu yano ukulola ukuti musiuvwana nayo. Ndi cakuti cikukutalila ukulanda nayo, ulinzile ukwiusha ukuti mutakuya umu kupazyanya lelo mukuya sile umu kulanzyanya. Ungazana ukuti cakwangukila sana nupya cakwazwa ukulauvwana nayo.

 Cisinte ca muli Baibo: “Lekini twaezya ukucita ivintu ivikaleta umutende.”—Loma 14:19.

 Juliana watiile: “Ndi cakuti cikuloleka ukuti yamwalimu yako yasi ni cikuuku kuli wewe, ungayuzya ndi cakuti kuli vimwi vino watucita ivyativilenga ukuti yasoke. Vino yakwasuka vingakwazwa ukumanya muno ulinzile ukusenuka.”

 Benjamin watiile: “Cingazipa ukulanzyanya na yamwalimu pali vino ukuyuvwa ale watuteekela nupya muli sile mweili, lino mutatala mwatandika ukusambilila nanti pacisila cakuti mwinuka. Limwi yangakuvwikisha nu kucindika inzila ino waomvya pa kulanda nayo.”

 VINO VYACITIKILE UMWI

 Maria watiile: “Ntacitanga ningo umu vya kusukulu, nupya yamwalimu yane yatangazwanga umu nzila ili yonsi. Nalondanga ukuleka isukulu, pano yamwalimu yaa yalenzile ivintu vintalile sana umu umi.

 “Nayile kuli yamwalimu yauze ukuti yampandeko mano. Yanenyile iyati: ‘Yamwalimu aakakufunda yatakumanya ningo, nupya nawe kwene utayamanya ningo. Ulinzile ukuyalondolwela intazi ino ukweti. Ungazana ukuti wazwa na yakasukulu yauzo yano cikatalila ukulanda na ya mwalimu.’

 “Ntalondanga ukucita vii! Nomba nelenginye pali vino yanenyile nupya nilwike ukuti vyali sile ningo. Pakuti ivintu visenuke, nalondekwanga ukucitapo vimwi.

 “Fwandi, uwanda uwalondelilepo nayile kuli ya mwalimu nu kuyalondolwela umu mucinzi ukuti natemilwe vino yatusambilizyanga nupya nalondonga ukulauvwikisha. Nomba cantalilanga nupya ntamanyile vino nalinzile ukucita. Yanenyileko vimwi ivyakucita ivingangazwa nupya yanenyile nu kuti yangangazwako nga twinuka nanti ukuomvya e-mail.

 “Nazungwike sana! Vino nalanzyanyizye nayo, calenzile ukuti twauvwana nayo nupya natandike ukuipakaizya isukulu.”

 Vino ungacita: Ndi cakuti cikukutalila ukuvwana na yamwalimu, uwalola ukuti ishuko lya kukwazwa ukusambilila imiyele ino ingaca ikwazwe nga wakula. Katie aali ni myaka 22 watiile: “Na pacisila cakuti wamala isukulu, ulaomba na antu yano yakwata amaka ya utunguluzi aataya ni cikuuku. Ndi cakuti ukukwanisha ukuomba na yamwalimu atale, ale ulakwanisha ukuomba na antu atale lino ulakula.”