Mupiipi ni indupwa zyonsi zyakwata masunde, wakwe insita yakuwelelapo pa ng’anda, utali wa nsita iyakuomvezyapo foni nanti vyuze ivikolineko alino na vino tulinzile ukucitila yauze.

 Uzye ungacita uli ndi cakuti utalondile isunde lya yavyazi yako? Utanga usenule ivyativicitika, nomba kuli vino ungacita pakuti ivintu vitipilako. Cipande cii cimakwazwa ukumanya kumanya vino ungacita vivyo.

•  Vino utalinzile ukucita

•  Inzila isuma ino ungaomvya

•  Vino auzo yakalanda

 Vino utalinzile ukucita

•   Ndi cakuti avyazi yako yatamanyile ukuti utalondile isunde, limwi ungeziwa ukufisa vino watucita.

•   Ndi cakuti yatamanyile ukuti utalondile isunde, limwi ungeziwa ukutandika ukuipokolola nanti ukupeela yauze mulandu.

 Pali vii pasi inzila isuma ino ungaomvya. U mulandu ci? Pano ndi cakuti ukufisa vino vyacitike nanti ukuipokolola pali vino wacisile ala cikulangilila sile ukuti utatala wakula umu mano. Nupya ukucita vii kungalenga avyazi yako yamanye ukuti utatala wakula sana.

 ‘Ukubepa asi ali nzila isuma iingaomba. Mukuya kwa nsita cisinka cikaiza cikumanyikwa, nupya ala ulafululwa sana kucila na pali vino cali nu kuya ndi cakuti ulanda icisinka pa kutandika.’—Diana

 Inzila isuma ino ungaomvya

•   Wazumila vino watucita. Baibo ikati: “Aakafisa imembu zyakwe atalaya ni nsansa.” (Mapinda 28:13) Avyazi yako yamanya ukuti utaamalilika. Lelo yakalonda ukuti uwaya uwa cisinka

   ‘Avyazi yako yangakwelela nga walanda icisinka. Ndi cakuti walanda icisinka avyazi yako yangakutaila sana.’—Olivia

•   Walenga uwelelo. Baibo ikati: “Lelo mwensi kwene mwaicefya ku yauzo.” (1 Petulo 5:5) Cikalondekwa ukuicefya pa kulanda ukuti munjeleleko ukwaula ukuipokolola.

   ‘Ndi cakuti umuntu umwi akuipokolola lyonsi lino waluvyanya, cikalenga auvwa insonyi. Nu mukushalikizya, yakata ukuvwa uyi lyonsi lino yaluvyanya.’—Heather

•    Wazumila ivimafumamo. Baibo ikati: “Mwauvwila ukusalapula.” (Mapinda 8:33) Utailizyanya nupya walondela ukusalapula kuli konsi kuno avyazi yangakusalapula.

   ‘Lyonsi lino ukuilizyanya pa kusalapula kuno yakusalapula, aali na vino ivintu vikaaya vikwipilako sile. Walonda inzila ino ungazumililamo ukusunda kuno iyakupeela, nupya utaika mano ku vintu vino yangakulesha ukucita.’—Jason

•   Wacita ivintu vingalenga avyazi yakutaile nupya. Baibo ikati: “Mwasambiliziwe ukuzuula untu wa mpiti, uukauvwana na vino mwacitanga mpiti.” (Efeso 4:22) Watwalilila ukucita ivisuma ivingalenga avyazi yako yakutaile nupya.

   ‘Ndi cakuti ukutwalilila ukupingulapo ningo pa vintu nu kulenga avyazi yako yailolele ukuti utalaswilizyapo pali vino wacisile, yangakutaila nupya.’—Karen

 VINO UNGACITA: Wacita ivicizile na pali vino iyakunena ukuti ucite pakuti yakutaile. Wakwe, lino ulalonda ukufumapo pa nga’nda umuku ulalondelelapo ukayamanyishe ukuti watuwafumapo nanti icakuti utakuya lengela kuno ukuya. Kucita vii kulalenga yamanye ukuti ukulondesha ukuti yakutaile nupya.