ACANCE YAKAUZYA UKUTI
U Mulandu ci Uno Avyazi Yane Yasilonda Ukuti Nacita Ivingalenga Inje ni Nsansa?
Tuti auzo yakwama ukuti ukazanwe uku kuzevya kumwi pa mpela ya mulungu. Lyene uzya avyazi ndi cakuti yangakuzumilizya ukuti ukazanweko, nomba yakana ukukuzumilizya.” Lelo utazungwike. Pano nu umuku uwafumako yakukanyizye.
Umu cipande cii tumalanda pali vii ivyalondelelapo
U mulandu ci uno avyazi yane lyonsi yasinzumilizizya ukucita vino nkulonda?
Ningacita uli pakuti avyazi yane yanzumilizya ukucita vino nkulonda?
U mulandu ci uno avyazi yane lyonsi yasinzumilizizya ukuti incite vino nkulonda?
Ndi cakuti lyonsi avyazi yako yasikukuzumilizya ukucita vino ukulonda, ungaelenganya ukuti yasilonda ukuti uwaya ni nsansa.
Vikwene ali vino umukazyana umwi uwacance uwizina ilyakuti Marie wayuvwile lino yamukaliile foni pa muku wa kutandikilako. Watiile: “Yatata yampezile masunde aingi ukulozya uku maapu yano nalinzile ukulaomvya, antu yano nalinzile ukulalanda nayo, alino ni insita ino nalinzile ukulaleka ukulanda na antu yayo. Nomba, anji yene yacitanga ivili vyonsi vino yakulonda!”
Vino ulinzile ukwelenganyapo: Uzye ya isi yakwe Marie yatalondanga ukuti aya ni nsansa? I vyani limwi vyasakamikanga ya isi?
Ivimbamba vya mu museo vikapoka untungwa wa kusimuzya sana motoka, nomba vingalenga ukuti uicingilile uku ntazi. Vikwene ali vino na masunde ya yavyazi yaya
Ungezya ukucita vii: Elenganya ukuti wewe muvyazi, lyene wakalila umwanako foni. I vyani vino ungasakamala ukuti limwi ivingacitikila umwanako? A masunde ci yano ungamupeela pakuti umucingilile uku ntazi zizyo? Uzye ungacita uli ndi cakuti umwanako wakuneena ukuti usikulonda aya ni nsansa?
Tanya watiile: “Lyonsi yatata yaneenanga ukuti ‘elenganya ukuti wewe uli muvyazi.’ Ukucita vii kwangazwanga ukumanya umulandu uno yampelelanga masunde alino nu ukulola vino masunde yano yampelanga yayanga acindame. Nga nakweti ana, nani kwene ningalonda ukuti ana yane yalondela masunde yano yatata yakampeela.”
Ningacita uli pakuti avyazi yane yanzumilizya ukucita vino nkulonda?
Richard watiile: “Ukupazyanya kutanga kukwazwe iciliconsi, kungalenga sile ukuti mutonte mwensi kwene pamwi na avyazi yako. Ndi cakuti ukupaazya avyazi yako, yangaelenganya ukuti utatala wakula nupya utalinzile ukukwata untungwa.”
Ivy watiile: “Lyonsi kwene avyazi yane yakakwata umulandu usuma uno yakumpelela isunde limwi. Yasilonda ukuti ntaya ni nsansa; lelo yakalonda ukuti nacita ivisuma ivya kundetela insansa, vino ivitanga vindendetele intazi uku nkoleelo.”
Cisinte ca muli Baibo: “Umuwelewele akafumya icipyu cakwe consilelo uwa mano akatwalilila ukuya umuteekele.”—Mapinda 29:11.
Marie watiile: “Ukumbali, nezyanga ukutama masunde yano yatata yampeezile pa miomvezye yakwe foni. Nezyanga ukulembela anji mameseji umu nkama usiku nanti ukudauniloda maapu yano yatata yankanyizye. Nomba yasukanga iyamanya vino nkucita, nupya yakomezyangako masunde pano lyene yalekanga ukuntaila. Ukucita vino avyazi yako yakukanya ukumbali kutaya ningo.”
Melinda watiile: “Ulinzile ukuya umuteekele. Cingasenda insita pakuti avyazi yako yangupazye masunde, nomba ndi cakuti yalola ukulondela masunde yano yakupeela, cingalenga ukuti yakupeeleko untungwa.”
Cisinte ca muli Baibo: “Mwauvwila avyazi inu muli vyonsi.”—Kolose 3:20.
Natalie watiile: “Ukupatikizya ukuti vimwi vicitike kutanga kulenge ukuti ivintu vikuzipile nanti ukulenga ukuti ukwate vino ukulonda.”
Vino ungacita: Uwalanzyanya na avyazi yako pa nsita ino yatapamviwe. Utalinzile ukulanzyanya nayo lino yawela sile uku ncito nanti lino iyapamviwa ni vintu vyuze.
Cisinte ca muli B aibo: “Uwacindika tata wako na mayo wako.”—Efeso 6:2
Limwi Mungatemwa Ukulolako na Vii
ACANCE YAKAUZYA
Uzye Ningalanzyanya Uli na Avyazi Yane pa Masunde Yano Yampeela?
Sambilila ivya kulanda ku yavyazi yako mu mucinzi nupya ulazunguka ukulola ivisuma ivilacitika ndi wacita vivyo.
MAVIDYO YAKWE TUKADOLI TWAKULENGA
Ningacita Uli Pakuti Nkwate sana Untungwa?
Limwi ungaelenganya ukuti ufwile ukulasungwa wa muntu uwikolo, lelo avyazi yako yatakuzumilizya. Ungacita uli pakuti yakutaile?
ACANCE YAKAUZYA
Ningacita Uli Pakuti Avyazi Yane Yantaile?
Ivintu vitatu vino ungacita ivingakwazwa pakuti uye sana nu untungwa.
