Skip to content

Uzye Uluwatizyo I Cani?

Uzye Uluwatizyo I Cani?

Vino Baibo yalandapo

Uluwatizyo lukalozya uku kutuwizya umuntu umu manzi nu kumufumya. * Cintu cico cikalondolola umulandu uno Yesu wawatiziwilwe umu luzi. (Mateo 3:13, 16) Vivyo kwene avino na mutungwi umwina Etiopia walenzile ukuti awatiziwe lino yafisile “apali amanzi.”—Milimo 8:36-40.

Vino uluwatizyo lukapiliula

Baibo ikakolanya uluwatizyo uku kuziika. (Loma 6:4; Kolose 2:12) Ukuwatiziwa umu manzi kukalangilila ukuti umuntu wafwa uku vintu vino wacitanga mpiti watandika umi upya uwa Wina Klistu uwakuipeela kuli Leza. Uluwatizyo ni vikacitika pakuti umuntu awatiziwe vyatantikwa na Leza pakuti umuntu aye na kampingu musanguluke uwemelela pa kutaila impolelwa yakwe Yesu Klistu. (1 Petulo 3:21) Fwandi, Yesu wasambilizye asambi yakwe ukuti yalinzile ukuwatiziwa.—Mateo 28:19, 20.

Uzye ukuwatiziwa umu manzi kukafula maifyo?

Awe. Baibo ikasambilizya ukuti tungaswefiwa ukufuma uku maifyo ukupitila sile umu wazi uno Yesu wazwisizye. (Loma 5:8, 9; 1 Yoane 1:7) Nomba pakuti impolelwa yakwe Yesu iyazwe umuntu, alinzile ukutaila Yesu nu kusenula imiyele yakwe ukutandika ukwikala ukulingana na vino Yesu wasambilizye alino nu kuwatiziwa.—Milimo 2:38; 3:19.

Uzye Baibo ikasambilizya ukuwatizya ana anono?

Awe foo. Pataya pano Baibo yalanda ukuti ana anono yalinzile ukuwatiziwa. Umu macalici yamwi yakapanga uwanda umwi uno yakawatizya umwana umunono (lino yamusansa nanti ukumwitila amanzi pa mutwe) nu kumwinika izina. Uku Ina Klistu kwene uluwatizyo u lwa muntu uwatakula anguvwa nu kuzumila ‘ilandwe lisuma ilya Wene Wakwe Leza.’ (Milimo 8:12) Vyalemenkana nu kuvwa Izwi Lyakwe Leza, ukulipokelela nu kulapila, nupya ivintu vivyo umwana umunono atange avicite.—Milimo 2:22, 38, 41.

Nupya, Baibo ikalangilila ukuti Leza akalola ana anono a Ina Klistu ukuti a muzilo, nanti yasanguluka kuli Yeova pa mulandu na ucisika wa yavyazi yao. (1 Kolinto 7:14) Ndi cakuti kwali ukuwatizya ana anono, ana yayo nga yatalondekwanga ukukwata umuntu uwaya ni miyele isuma ukuimilililako kuli Yeova. *

Ivya ufi pa luwatizyo lwa Ina Klistu

Ufi: Ukusansa nanti ukwitila manzi umuntu kwazumiliziwa pano icili cimwi nu kututuwika.

Icisinka: Amaluwatizyo yonsi alandwapo muli Baibo yonsi yali aakututuwika. Lino umusambi Filipo wawatizye mutungwi, ingile “umu manzi” pakuti amuwatizye. Pa cisila ‘yafumile umu manzi.’—Milimo 8:36-39. *

Ufi: Baibo ndi yalanda ukuti amu ng’anda yawatiziwe ala ikulozya kuli yonsi ukwikako na anono. Ikalanda pali kalinda wa ng’anda ya minyololo uwa ku Filipi ukuti: “wene pamwi na amu ng’anda yakwe yawatiziwa lilyo kwene.”—Milimo 16:31-34.

Icisinka: Ilyasi pali kalinda wa ng’anda ya minyololo likalanga ukuti yonsi awatiziwe yuvwikisye “izwi lya Mwene [Yeova]” nupya “yali nu luzango.” (Milimo 16:32, 34) Ivisinka vivyo vikalenga tusondwelele ukuti umwana umunono wensi uwali umu ng’anda yakwe kalinda atawatiziwe pano yatuvwikisye izwi lyakwe Yeova.

Ufi: Yesu wasambilizye ukuti ana anono yalinzile ukuwatiziwa lino walanzile ukuti Uwene u wa yana anono.—Mateo 19:13-15; Mako 10:13-16.

Icisinka: Yesu aatalandanga pa luwatizyo lino walanzile mazwi yayo. Nomba walandanga pali yayo ali nu kulinga ukwingila umu Wene Wakwe Leza ukuti yalondekwanga ukuya wa ana anono, kuli kuti ukuya aicefye nupya angazumila ukusambiliziwa.—Mateo 18:4; Luka 18:16, 17.

^ pala. 3 Izwi ilyasenulwa ukuti “uluwatizyo” lyafuma ukwi izwi ilakapiliula ukuti “ukututuwizya.” Lolini ibuku lyakuti Theological Dictionary of the New Testament, Volyumu I, ifwa 529.

^ pala. 10 Ukulingana ni buku lyakuti The International Standard Bible Encyclopedia, “mu Upangano Upya mutaya icisambilizyo ca kuwatizya ana anono.” Nupya lyalanzile nu kuti ukuwatizya ana anono kwakomile sana pa mulandu wa “kumanya ivya ufi nanti ukulumbilizya pali vino uluwatizyo lwaya” kuli kuti pa mulandu wa kumanya ukuti uluwatizyo lukafula maifyo.—Volyumu 1, mafwa 416-417.

^ pala. 13 Pa kamutwe kakuti “Uluwatizyo (muli Baibo),” Ibuku lyakuti New Catholic Encyclopedia lyalandapo ukuti: “Casininkiziwa ukuti uluwatizyo umu macalici akutandikilako yatutuwikanga pa kuwatizya.”—Volyumu 2, ifwa 59.