Vino Baibo yalandapo

 Baibo ikalanda ukuti Leza akalonda antu “ukutaluka uku uzelele.” (1 Tesalonika 4:3) Izwi ilyaomviwa muli Baibo ilyakuti “uzelele” mwaya ukucita ucende, ukulaalana kwa yonsi yatupu na anaci yatupu, alino nu kupanga icupo ukwa yantu aatatwalana.

•  U mulanduci uno Leza akalondela ukuti umonsi na mama yatwalane ndi cakuti yakulonda ukupanga icupo nanti ukwikala pamwi?

•  Uzye ukwikala pamwi na wino mutatwalana nawe pakuti mulole ndi cakuti mulaya ni nsansa umu cupo kwaya sile ningo?

•  Uzye atwalane yangakomya uli icupo cao?

 U mulanduci uno Leza akalondela ukuti umonsi na mama yatwalane ndi cakuti yakulonda ukupanga icupo nanti ukwikala pamwi?

•   ● Leza uwatantike ukuti kuye icupo. Wacisile vii lino watwalizye umonsi nu mwanaci akatandikilako. (Utandiko 2:22-24) Atalondanga ukuti umonsi na mama yaikala pamwi ukwaula ukutwalana.

•   ● Leza wamanya ivingazipila antunze. Wapekinye ukuti icupo catwalilila ukuyako amanda pee pakuti umonsi na mama yangatwalilila ukuya ni nsansa nu kulenga amu lupwa yonsi ukuya acingililwe. Lekini tulangilile. Wakwe vino akampani akakapanga iviya kangamunena vino mulinzile ukucita pakuti mupanga icintu cimwi ningo, ali vino na masunde yano Leza akatunena pakuti mulupwa muye insansa yangatwazwa. Yonsi aakalondela masunde yakwe Leza yakayazwa.—Ezaya 48:17, 18.

•   Umu kupanga icupo ukwaula ukutwalana mukafuma iviipe. Wakwe, kukaya ukukwata inda iyaula ukwenekela, indwala izikaambukila, alino nu kulacula umu melenganyo.

•   Leza wapeezile umonsi na mama isyuko ilya kukwata ana ukupitila umu kupanga icupo. Leza akalola ukuti umi wacindama sana, nupya akalola ukuti isyuko lino wapeela antunze ilya kukwata ana uwila usuma sana. Leza akalonda twalola ukuti uwila uu wacindama ukupitila umu kulondela amasunde aakalanda pa cupo.—Aebele 13:4.

 Uzye ukwikala pamwi na wino mutatwalana nawe pakuti mulole ndi cakuti mulaya ni nsansa umu cupo kwaya sile ningo?

 Pakuti mu cupo mukaye insansa, cisilondekwa ukuti mutale mwikale pamwi na umwi pa ciputulwa ca nsita imwi. Lelo, umu cupo mukaya insansa ndi cakuti atwalane yakuombesya ukufikilizya vino yalayana nu kuombela pamwi pa kucimvya intazi. a Cupo cikakomya vino atwalane yalayana.—Mateo 19:6.

 Uzye atwalane yangakomya uli icupo cao?

 Kutaaya icupo icamalilika. Nomba, atwalane yangalenga icupo cao ukuya ni nsansa ndi cakuti yakulondela ukusunda ukwaya muli Baibo. Vimwi vino mungacita aevi:

•   Mwakolezya sana vino ya winu yakulondekwa ukucila vino mukulonda.—1 Kolinto 7:3-5; Filipi 2:3, 4.

•   Mwatemwana sana nu kucindikana.—Efeso 5:25, 33.

•   Mwasoolola amazwi yakulanda.—Mapinda 12:18.

•   Mwateeka umwenzo nupya mwaelela zuwa.—Kolose 3:13, 14.