Skip to content

Uzye Baibo Ikasambilizya Ukuti Insi Yapapatana?

Uzye Baibo Ikasambilizya Ukuti Insi Yapapatana?

Vino Baibo yalandapo

Awe, Baibo isisambilizya ukuti insi yapapatana. * Baibo asi buku lyakwe sayansi. Nupya pa nsita iliyonga kwene Baibo isipazyanya na sayansi. Vino Baibo ikalanda vyalungama, i vya cumi nupya i vya manda pe.’—Masamu 111:8.

  • Uzye Baibo ikapiliula cani nga yati “ntunga zyonsi ziini izya nsi.”

  • Nga pali vino Ciwa wezizye Yesu?

Uzye Baibo ikapiliula cani nga yati “ntunga zyonsi zini izya nsi.”

Mazwi yakuti “ntunga zyonsi zini izya nsi” na akuti “kuno insi yapelela” aomviwa muli Baibo yasisenula viivi kwene vino yalembwa, wakwe ukupiliula ukuti insi yakwata intunga zini nanti ukuti kwaya kuno yapelela. (Ezaya 11:12; Yobo 37:3) Lelo, amazwi yayo imvwango sile izikalozya ku nsi yonsi. Baibo ikaomvya intunga 4 zyakwe kampasi mu nzila iliimwi kwene.—Luka 13:29.

Izwi lya Ciyebulai ilyasenulwa ukuti “intunga” nanti ‘impela’ likaloleka kwati i mvwango sile iyafuma ukwi izwi lyakuti “amapapiko.” Ibuku limwi (The International Standard Bible Encyclopedia) likati “pa mulandu wakuti amapapiko ya cunyi yakaomba ku kuvimba utwana, [izwi lii ilya Ciyebulai] likaomviwa ku kulondolola impela ya cintu icili consi cikonzoloke.” Ibuku ilililimwi kwene likalanda nu kuti pali Yobo 37:3 na pali Ezaya 11:12 izwi lii likapiliula mutengo, mupaka, nanti impela ya mpanga iyaya pano nsi.” *

Nga pali vino Ciwa wezizye Yesu?

Ciwa pa kwezya Yesu, “wamusenzil papela ya mwamba utali cuze, amulanga mawene amu nsi yonsi nu lulumbi lwakweyo.” (Mateo 4:8) Yamwi yakati amazwi yaa amuli Baibo yakalangilila ukuti insi yonsi ikalolekela pa ntunga yonga pa mulandu wakuti insi yapapatana. Nomba, umwamba utali cuze uwalumbulwa paa cikaloleka kwati wali uwakwelenganya sile utali umwamba wa cumi cumi. Lolini mulandu uno mazwi yaa yayela acumi.

  • Kutaaya umwamba wa cumi cumi umu nsi uno umuntu angakwelapo nu kulola amawene yonsi pano yapela.

  • Ciwa atalanzile sile Yesu amawene yonsi amu nsi lelo wamulanzile nu “lulumbi lwakweyo.” Vyonsi vivyo umuntu atanga avilolele apatali sana, fwandi cikaloleka kwati Ciwa waomvizye icilolwa pa kulanga Yesu ivintu vivyo vyonsi. Cii tungacikolanya kuli vino muntu akaomvya pulojekita na TV pa kulangizya ivikope vya ncende izingi sana izyaya pano nsi.

  • Ilyasi kwene lii ilyalembwa na pali Luka 4:5 likalanda ukuti “lyene Ciwa amukwezya pa mwamba papela, alino amulanga mawene yonsi amu nsi mu kasita kanono,” icitanga cicitike ku kulola kwitu ukwa untunze. Cii cikalangilila ukuti lino Ciwa wezizye Yesu waomvizye inzila yuze asi milolele ya untunze.

^ pala. 3 Baibo ikalanda pali Leza ukuti ‘wikala pa cilimba cakwe ica wene, cico icayela apapela ya nsi iulungane.’ (Ezaya 40:22) Aasambilile sana yamwi yakati izwi lyakuti ‘iulungane’ lingapiliula nu kuti iciulungwa, nanti cakuti asi yonsi aasambilile akazumila cisinka cico. Usi mulandu na vivyo vyonsi, Baibo yene isisambilizyapo ukuti insi yapapatana.

^ pala. 8 Ilipitulukwemo, Volume 2, ifwa 4..