Skip to content

Cikapiliula Cani Ukuvyalwa Iila Lyakwe Ciili?

Cikapiliula Cani Ukuvyalwa Iila Lyakwe Ciili?

Vino Baibo yalandapo

Mazwi yakuti ‘kuvyalwa iila lyakwe ciili’ yakalozya uku kutandika cipya cipya ucuza wakwe Leza nu muntu uwatavyalwa iila lyakwe ciili. (Yoane 3:3, 7) Leza akatoola antu avyalwa iila lyakwe ciili ukuya ana yakwe. (Loma 8:15, 16; Galatiya 4:5; 1 Yoane 3:1) Avino cikaya na kuli yano akakala, nayo kwene yakasenuka nu kuya umu lupwa lwakwe Leza.—2 Kolinto 6:18.

U mulandu ci uno umuntu akavyalilwa iila lyakwe ciili?

Yesu walanzile ukuti: “umuntu ndi atavilwe iila lyakwe ciili atangalola Uwene wakwe Leza.” (Yoane 3:3) Fwandi ukuvyalwa iila lyakwe ciili kukapekanyizizya umuntu uku kuteeka pamwi na Klistu umu Wene wakwe Leza. Uwene uu ukateekela ukwi yulu, fwandi Baibo ikalondola “umi upya” ukuti ukapeela upyanyi uno “wasungilwa ukwi yulu.’ (1 Petulo 1:3, 4) Yayo aakavyalwa iila lyakwe ciili yakapeelwa usininkizyo wakuti yalateeka “pamwi” na Klistu.—2 Timoti 2:12; 2 Kolinto 1:21, 22.

Cikaya uli pakuti umuntu avyalwe iila lyakwe ciili?

Lino Yesu walanzile api lyasi lii, walanzile ukuti yonsi akavyalwa iila lyakwe ciili yalinzile ‘ukuvyalwa ku manzi nu ku mupasi wa muzilo.’ (Yoane 3:5) Mazwi yaa yakalozya uku kuwatiziwa na manzi alino lyene nu kuwatiziwa nu mupasi wa muzilo.—Milimo 1:5; 2:1-4.

Yesu ali wino watandikilepo ukuvyalwa iili lyakwe ciili. Wawatiziwe umu Luzi Lwa Yodani, lyene pa cisila Leza wamupasile (nanti wamuwatiizye) nu mupasi wa muzilo. Yesu waviilwe iila lyakwe ciili wa mwana wakwe Leza nu upalilo wakuti alaswilila ukwi yulu. (Mako 1:9-11) Leza wafikilizye upalilo uu lino watuutulwile Yesu nu mwili wa mupasi.—Milimo 13:33.

Yauze akavyalwa iila lyakwe ciili nayo yakawatiziwa na manzi lino yatatala yapokelela umupasi wa muzilo. * (Milimo 2:38, 41) Lyene yakakwata upalilo wa kuya nu umi ukwi yulu, uno Leza alafikilizya lino alayatuutulula.—1 Kolinto 15:42-49.

Ivya ufi pa kuvyalwa iila lyakwe ciili

Ufi: Umuntu alinzile ukuvyalwa liili pakuti akapusuke nanti ukuya Umwina Klistu.

Icisinka: Impolelwa yakwe Klistu yapususya antu akavyalwa iila lyakwe ciili ukuya ya kateeka yauze na Klistu ukwi yulu alino na antu alateekwa umu Wene wakwe Leza pano nsi. (1 Yoane 2:1, 2; Umbwilo 5:9, 10) Iumba lilyo lyakwe ciili ilya Ina Klistu lyakwata isyuko lya kwikala amanda pe umu Paladaise pano nsi.—Masamu 37:29; Mateo 6:9, 10; Umbwilo 21:1-5.

Ufi: Umuntu angaisoolwela ukuvyalwa iila lyakwe ciili.

Icisinka: Isyuko lya kuya ya cuza yakwe Leza nu kwizapusuka lyapeelwa uku yantu yonsi. (1 Timoti 2:3, 4; Yakobo 4:8) Nomba Leza akasoolola yayo angavyalwa iila lyakwe ciili nanti ukuyapaka nu mupasi wa muzilo. (Loma 9:16) Amazwi yakuti ‘kuvyalwa iila lyakwe ciili’ yangapiliula nu kuti “ukuvyalwa ukufuma ukwi yulu” cikulangilila ukuti yonsi aakavyalwa iila lyakwe ciili yakafuma “ukwi yulu” nanti kuli Leza.—Yoane 3:3.

^ pala. 9 Yano icintu ca musango uwo cacitikile a Koneli na yano wali nayo.—Milimo 10:44-48.