Skip to content

U Mulandu ci Uno Kwayela Aina Klistu Aingi Lelo Azumila Ivipusanepusane?

U Mulandu ci Uno Kwayela Aina Klistu Aingi Lelo Azumila Ivipusanepusane?

Vino Baibo yalandapo

Antu yaomvya imisambilizizye yakwe Yesu Klistu nu kupanga imipepele ya “Wina Klistu” ipusanepusane. Nomba Baibo ikalangilila ukuti kwaya sile ukupepa kwa Ina Klistu ukwa cumi konga sile. Elenganyini sile pa milandu itatu iyalenga kuye ukusondwelela kuko.

  1. Yesu watiile wasambilizyanga “icumi” na Ina Klistu akutandikilako yamanga imipepele yao ukuti “icumi.” (Yoane 8:32; 2 Petulo 2:2; 2 Yoane 4; 3 Yoane 3) Mazwi yaa yakalangilila ukuti yayo akasambilizya ivisambilizyo vyuze ivyapusana na vino Yesu wasambilizyanga asi mipepele ya cumi iya Ina Klistu.

  2. Baibo ikasambilizya ukuti Aina Klistu yalinzile ‘ukuzumilizyanya muli vyonsi vino yalanda.’ (1 Kolinto 1:10) Nomba, imipepele iingi iya Wina Klistu yapusana muli vino yakasambilizya kulingana na vino Aina Klistu yalinzile ukusambilizya. Imipepele iyo asi ya cumi.—1 Petulo 2:21.

  3. Yesu wasoowile ukuti aingi yalaitunga ukuti Aina Klistu lelo yalavilwa ukulondela masunde yakwe nu kuti amusango uwo alayakana. (Mateo 7:21-23; Luka 6:46) Antu yamwi yalayapozya kuli ya simapepo akaonona imipepee ya cumi pa mulandu wa kulonda sile impiya. (Mateo 7:15) Lelo, antu yauze yene yangatemwa imipepele iyo pa mulandu sile uwa kuti yalayanena vino yakulonda ukuvwa ukucila ukuvwa icumi ca muli Baibo.—2 Timoti 4:3, 4.

Umu cilangililo ca ngano na kalolo cino Yesu walanzile, wasoowile ukuti kulaya ukufutuka ukukalamba (usangu) uku kupepa kwa cumi. (Mateo 13:24-30, 36-43) Pa myaka ingi ukupepa kwa cumi nu kupepa kwa ufi kutamanyikwanga ningo. Wakwe vivi kwene vino Yesu wasoowile, lino atumwa yafwile kwizile ikuya sana asangu. (Milimo 20:29, 30) Nanti icakuti ivisambilizyo vya yasangu vyapusanapusana, imipepele ipusanepusane iyapangwa ino yakakolanya uku Ina Klistu yonsi “yasya inzila ya cumi.”—2 Timoti 2:18.

Yesu nupya walanzile ukuti upusano uwaya pa kupepa kwa cumi nu kupepa kwa ufi ulamanyikwa ningo sana. Icintu cico cacitika umu nsita itu, iya ‘manda ya mpelelekezyo ya nsi.’—Mateo 13:30, 39.