LINO, Antoine Skalecki wali umulumendo, wayanga ni mfalasi konsi kuno ali. Wasendanga mafito yakwimba ukufuma umu maini ama mita 500 ukuya pansi ala ali ni mfalasi. Ya isi yakwe Antoine yacisike lino umusili walepwike ala yakaomba pa maini kwene paapo, icalenzile kuti ulupwa lusoolole Antoine ukutwalilila ukuomba umu maini. Pa nsita imwi, kwasile sile panono ukuti Antoine afwe.

Iviombelo vino aina Poland yaomvyanga umu maini, na maini umu cifulo ca Dechy, apiipi nu musumba wa Sin-le-Noble, kuno umwina Antoine Skalecki waombanga

Antoine wali pa yana aingi aavyalilwe uku France pakasi kakwe 1920 na 1930 uku yavyazi afumile uku Poland. U mulandu ci uno aina Poland yailiile uku France? Lino impanga ya Poland yaposile untungwa pa cisila ca nkondo ya mu nsi yonsi iyakutandikilapo, antu izile yavula sana umu Poland. Ku mpanga iya France kwene antu yacepiileko pano aonsi ukucila pali 1 milyoni yafwile umu nkondo kwene iiya, nupya kwalondekwanga aonsi aingi akuombela umu maini ukuti yaimba mafito. Lyene, amuuteeko wa ku France nu ku Poland yalanzyanyizye nu kulemba icipangano umu 1919 pakuti aina Poland yamwi yangakuukila uku France ukukuombela umu maini. Lino umwaka wakwe 1931 wafisile, aina Poland aakukiile uku France, izile iyaya 507,800, nupya aingi pa ina Poland ikalanga umu vifulo ivyayelile ukupiipi na mamaini aayelile uku katutu ka mpanga ya France.

Aina Poland yaali akome sana uku milimo, nupya yatwazile intambi zyao uku France, ukwikako sile ni mipepele yao. Antoine lyene ali ni myaka 90, nupya akaiusya vino sikulu wakwe walondololanga malembelo. Walanzile ati: “Kuuku Joseph walondololanga ningo Malembelo ya Muzilo ukulingana na vino wasambilile kuli isi.” Lyonsi pa Mulungu, indupwa zya ina Poland aaombanga umu maini yazwalanga ningo sana pa kuya uku macalici, wakwe vino yacitanga lino yaali uku Poland, nomba cii calenganga ukuti aina France yamwi yaasoka sana.

Aina Poland aingi izile yakomaana na Asambi ya Baibo umuku wakutandikilapo uku cifulo cino yakaama ukuti Nord-Pas-de-Calais, aatandike ukusimikila umu cifulo ciici ukufuma umu 1904. Lino umwaka wakwe 1915 wafisile, Lupungu Lwa Mulinzi lwatandike ukupulintwa umu citundu ca ciPolish cila mwezi, nupya umu 1925 magazini wino ndakai akaamwa ukuti Loleni! watandike ukuyako umu lulimi kwene luulu. Indupwa izingi zyatemilwe sana Amalembelo aazanwanga muli ya magazini kwene yaaya, alino nu mwi buku limwi (The Harp of God) ilyaliko umu ciPolish.

Ulupwa lwakwe Antoine lwizile lumanya ukuti kwali Asambi ya Baibo, ukupitila muli ya nyinalume yakwe Antoine, aazanyilwe apa ukongano umuku wa  kutandikilapo umu 1924. Umu mwaka kwene uuwa, Asambi ya Baibo yakweti ukulongana kukalamba uku cifulo cino yakaama ukuti Bruay-en-Artois, umu lulimi lwa ciPolish. Pataapisile nu mwezi, umwimilizi wi Ofesi Likalamba lyakwe ya Nte Joseph F. Rutherford, wizile alanda ilyasi umu musumba kwene uuwa, nupya kwazanyilwe antu 2,000 aizile umu kuuvwa ilyasi. Lino umwina Rutherford waweni ukuti aavuzile pa kulongana kuuku yali aina Poland, wayanenyile ati: “Yeova wamuleesile uku France pakuti musambilile icumi. Lyene mwemo na ana inu mulinzile ukwazwa aina France! Ya kasimikila aakuomba umulimo wa kusimikila yacili yakulondekwa sana, nupya Yeova umwineco alaleenga ukuti kuye ya kasimikila yaayo.”

Nupya viivikwene avino Yeova wacisile! Aina Poland yali akome sana umu mulimo wa kusimikila wakwe vino yaombesyanga umu maini! I cumicumi, yamwi yaaswilile nu kumwao uku Poland ukuya umu kusimikila antu icumi cino yaasambiliile. Pali yaayo aswiliile uku Poland ukuya salanganya ilandwe lisuma, paali Teofil Piaskowski, Szczepan Kosiak, na Jan Zabuda.

Nomba aina Poland aingi yasiile uku France nupya yatwalilile ukuombela pamwi na ina na ya nkazi aku France umu mulimo wa kusimikila. Apa ukongano wa mu 1926 umu musumba uno yakaama ukuti Sin-le-Noble, kwazanyilwe antu 1,000 aalongine umu lulimi lwa ciPolish, alino 300 yalongine umu ciFrench. Muli 1929 Yearbook, mwali amazwi aalangililanga ukuti umu mwaka kwene uuwa, “aina Poland 332 yawatiziwe.” Lino inkondo ya mu nsi yonsi yakwe ciili itali itandike, ivilongano 32 apa vilongano 84 ivya mu France vyaomvyanga ululimi lwa ciPolish.

Aina na ya nkazi aku Poland yali uku France yakuya uku ukongano wa citungu. Pali motoka pali mazwi akuti “Inte Zyakwe Yeova”

Umu 1947 ya Nte Yakwe Yeova aingi yazumiile vino uteeko wa ku Poland walanzile ukuti aina Poland yaswilile ukumwao. Na lino aina aku Poland yaswilile ukumwao, ukuombesya kwao kwatwaliliile ukuloleka umu mpanga ya France, pano ya Kasimikila yasiile yavulilako umu mwaka kwene uuwa. Nupya pakasi ka mwaka wakwe 1948 na 1950, ya kasimikila izile yavula sana mu France. Pakuti ya kasimikila kwene yaayo yasambiliziwe ningo, iofesi lya musambo ilya ku France lyasoolwile angalizi aakatandalila ivilongano aakutandikilako umu 1948. Pa ina 5 aasoolwilwe, 4 yaali aina Poland, nupya umwina wenga pali yaayo wakweti izina lyakuti Antoine Skalecki.

Ya Nte aingi umu France na ndakai kwene yakwata amazina ya ku Poland kulikuti imiiko ya vikolwe vyao, ivyaombesyanga sana umu maini nu mu mulimo wa kusimikila. Na ndakai kwene antu aingi afuma uku mpanga zyuze yacili yakusambilila icumi uku France. Nanti icakuti aina afuma uku mpanga zyuze ukwiza uku France yangasoololapo ukuswilila uku mwao nanti ukutwalilila ukwikala, yacili yakakolanya aina Poland aatandikiilepo ukuya uku France.—Ivyacitiike mpiti umu France.