Skip to content

Muye pa utantiko wa vilimo

Mauzyo Yano Aakawelenga Yakauzya

Mauzyo Yano Aakawelenga Yakauzya

Umutumwa Paulo walemvile ukuti Yeova “atalazumilizya kuti mweziwe kuluta pali vino mungaposya.” (1 Kol. 10:13) Uzye cii cikupiliula ukuti Yeova akamanyila limwi mezyo yano tungasipikizya nu kusoolola ukuti ali yano tukapitemo?

Lekini tulole icalenga antu yaelenganya vivyo. Umwina umwi wino umwanakwe waikulike uzizye ati: ‘Uzye Yeova wamanyiile limwi ukuti nemo nu wane tulasipikizya ngi cakuti umwana witu waikulika? Uzye cii cacitika pa mulandu wakuti Leza wasininkizye ukuti tungasipikizya?’ Uzye paa pali iciliconsi icingalenga tuzumile ukuti Yeova akaleta ivya musango uu mu wikazi witu?

Ukwelenganya sana pa mazwi yakwe Paulo aaya pali 1 kolinto 10:13 kukalenga tusondwelele ukuti: Kutaya umulandu uli onsi uwa mu Malembelo ungalenga tuzumile ukuti Yeova akamanyila limwi vino tungasipikizya nu kusoololapo vimwi pali vivyo kwene kuti vituponele. Lekini tusambilile pa milandu 4 ingalenga tusondwelele vivyo.

Icakutandikilapo, Yeova wapeela antunze untungwa wakuisoolwela. Akalonda ukuti twaisoolwela sweineco vino tulinzile ukwikala. (Malan. 30:19, 20; Yoswa 24:15) Nga twasoolola ningo, lyene Yeova angatwazwa. (Mapi. 16:9) Lelo, ngi cakuti tutasoolwile ningo, ala ivipe vilatucitikila. (Gala. 6:7) Ndi cakuti Yeova akatusoolwela amezyo aalinzile ukutuponela, uzye nga watupeela untungwa wa kuisoolwela?

Cakwe ciili, Yeova asitucingilila kuli vyonsi vino ‘vikaponela umuntu ali wensi.’ (Kasa. 9:11) Amazanzo aipisye, limwi yangacitika pa mulandu wa kuti tuli pa ncende ni nsita ivisi ningo. Yesu walanzile pa uzanzo uwacitike uwalenzile antu 18 yafwe lino ilinga lyawile, nupya walanzile nu kuti vyonsi ivyacitike paapa kutaali ukulonda kwakwe Leza. (Luka 13:1-5) Uzye fwandi cingayamo mano ukwelenganya ukuti Leza wasoolwela limwi aalinzile ukupusuka alino na aalinzile ukufwa ndi cakuti ivintu ivikaicitikila sile vineco vyacitika?

Cakwe citatu, swensi kwene wenga na wenga twakwata insambu zya kulangizya ucisinka uno twakwata kuli Yeova. Iusyini vino Satana watwisike ucisinka wakwe yayo yonsi akaombela Yeova, lino walanzile ukuti tutange tutwalilile ukuya acisinka kuli Yeova ngi cakuti twaya na mezyo. (Yobo 1:9-11; 2:4; Umbw. 12:10) Ngi cakuti Yeova watucingililanga lyonsi sile lino twakwata intazi pa mulandu wakuti akulola ukuti  tutange tukwanisye ukusipikizya, uzye nga ataalenzile Satana acizyepo ukulanda ukuti tukaombela Yeova pa mulandu wa kuti akatupeela vimwi?

Cakwe 4, asi lyonsi lino Yeova akamanyila limwi vino vilatucitikila. Amelenganyo yakuti Leza akasoolwela limwi amezyo aalinzile ukutuponela yakalanga ukuti akamanya vyonsi ivilatucitikila uku nkoleelo. Lelo imyelenganyizizye iyo isi ya mu Malembelo. Leza angamanya ivilacitika uku nkoleelo. (Eza. 46:10) Lelo Baibo ikalanga ukuti lino ciza kuli vino vilatucitikila ku nkoleelo ivinono sile vino akasoololapo ukumanya. (Utan. 18:20, 21; 22:12) Nga akulonda ukumanya vimwi akakwata umwakupeelela pano wacindika uuntungwa uno watupeela uwa kuisoolwela. Uzye asi ali vino tungenekela kuli Leza aakalola ukuti untungwa uno watupeela wacindama nupya akaomvya amaka yakwe ningo?—Malan. 32:4; 2 Kol. 3:17.

Uzye lyene tungacita uli pa kuti tuvwikisye amazwi yakwe Paulo aakuti: “Leza . . . atalazumilizya kuti mweziwe kuluta pali vino mungaposya”? Paulo paa walondolwile vino Yeova akacita lino twaya na mezyo, asi lino tutatala twakwata mezyo. * Amazwi yaa yano umutumwa walanzile, yakalenga tusininkizye ukuti asi mulandu na mezyo angatuzana umu umi, Yeova alatwazwa ngi cakuti twamutaila. (Masa. 55:22) Amazwi yaa akutekezya yano Paulo walanzile yakalanda pa visinka viili.

Icakutandikilapo, amezyo yano tukakwata ayano ‘yakacitikila na antu yauze.’ Fwandi amezyo yano tukakwata ayano na antunze yonsi yakakwata. Tutange tuvilwe ukuzizimizya amezyo yaayo ngi cakuti twataila sana muli Leza. (1 Pet. 5:8, 9) Lino Paulo walanzile mazwi aaya pali 1 Kolinto 10:13, walozizye ku mezyo yano Aina Izlaeli yali nayo umu lwanga. (1 Kol. 10:6-11) Pataali uwezyo uli onsi uno Aina Izlaeli aali nu utailo yali nu kufilwa ukucimvya. Imiku 4 Paulo walanzile ukuti ‘yamwi muno yaali’ yatuvwilile. Ni caifile icakuti, Aina Izlaeli yamwi yatandike ukucita ivintu ivipe pa mulandu wakuti yafizilwe ukusintilila pali Leza.

Cakwe ciili, “Leza uwakutailwa.” Ivyalembwa ivyalondolola pali vino Leza waombanga na antu yakwe vikalangilila ukuti akalangizya ukutemwa kwakwe kuli “yano yamutemwa nupya yakayela amalamulo yakwe.” (Malan. 7:9) Nupya ivyalembwa vii vikalanga ukuti lyonsi Leza akafikilizya vino walaya. (Yoswa 23:14) Ukwelenganya pali ucisinka uno walangizyanga umu manda yaaya, kungalenga yayo amutemwa nu kumutaila, ukutaila ukuti alafikilizya amalayo yaili yano walaya ukulozya uku mezyo yano yakakwata: (1) Atalazumilizya uwezyo uli onsi ukutwalilila icakuti yafilwe nu kusipikizya, na (2) ‘wene alayalanga inzila yakuleukila matunko’ yaayo.

Yeova “akatwazwa mu ntazi zitu zyonsi”

Uzye Yeova akalanga uli aataila muli aliwe inzila ya kuleukilamo amatunko? Ukuya kwene nga akulonda angafumyapo amezyo paapo kwene sile. Nomba iusyini amazwi ya mutumwa Paulo aakuti: “Wene [Yeova] alamulanga inzila yakuleukila matunko pa kumupeela maka akuti muposye.” Fwandi insita izingi akatulanga sile ‘inzila ino tungaleukilamo’ matunko ukupitila umu kutupeela ivikulondekwa ivingatwazwa ukusipikizya amezyo yaayo. Loliniko inzila zimwi zino Yeova akaomvya pa kutulanga inzila ya kuleukilamo:

  • “Akatwazwa mu ntazi zitu zyonsi.” (2 Kol. 1:3, 4) Angateekezya amelenganyo itu, imyenzo itu, alino nu kututekezya muli vino tukuyuvwa, ukuomvya Izwi lyakwe, umupasi wa muzilo, alino ni vyeo vyuze vino akatupekanyizizya ukupitila umu muomvi mutailwe nupya uwa mano.—Mate. 24:45; Yoa. 14:16; Loma 15:4.

  • Insita zimwi angatucingilila ukuomvya umupasi wa muzilo. (Yoa. 14:26) Lino twaya na mezyo, umupasi wa muzilo ungatwazwa ukwiusya amazwi yamwi amuli Baibo ni visinte ivingatwazwa ukupingula ningo vino tumacita.

  • Angalenga angeli ukutwazwa.—Ayeb. 1:14.

  • Angatwazwa ukupitila muli yakapepa yanji yayo angalenga tukomeleziwe sana ku mazwi yao ni vicitwa.—Kolo. 4:11.

I vyani lyene vino tukusambililako ku upiliulo wa mazwi yakwe Paulo aaya pali 1 Kolinto 10:13? Yeova asisoolola amezyo aalinzile ukutuponela. Lelo lino twakwata amezyo umu umi witu, tulinzile ukusininkizya ukuti: Ndi cakuti twataila sana Yeova wene atalazumilizya ukuti amezyo yaayo yatutitikizye icakuti tufilwe nu kusipikizya; lyonsi alatulanga inzila ino tungaleukilamo pa kuti tusipikizye amezyo yaayo. Ala tukazanga sana ukumanya amazwi yaa akutekezya!

^ par. 2 Izwi lya Cigliki ilikasenula ukuti “itunko” limwi lingapiliula nu kuti “uwezyo uungaponela umwi.”