Mu cilolwa cino Ezekelo waweni, uzye umonsi uwakweti ivyakulembelako na onsi mutanda aali ni vyanzo yakaimililako cani?

Yakaimililako angeli akwi yulu avwilizyeko ukonona umusumba wa Yelusalemu nupya alazwilizyako ukonona insi ii iipe yakwe Satana pa Alamagedoni. Uu ulondolozi upya. U mulandu ci uno twalandila vivyo?

Lino umwaka wakwe 607 B.C.E. utali ufike, Yeova walangizye Ezekelo icilolwa ca vintu vyali nu kucitika umu Yelusalemu lino musumba utatala ononwa. Mu cilolwa cii, Ezekelo waweni ivintu ivingi ivipe ivyacitikanga umu Yelusalemu. Lyene waweni aonsi mutanda cila wenga wakweti “canzo.” Kwali nu monsi uwali pamwi nayo uwazwite “insalu zisuma izitelepe” nupya wakweti ni “vyakulembela.” (Ezekelo 8:6-12; 9:2, 3) Umonsi wii yamunenyile ukuya umu musumba kuti aye ‘akalembe icimanyililo pa mausyu ya antu yonsi aakuteta nu kulila pamulandu wa vintu vyawinyi vii vyonsi ivikucitika mu musumba uu.’ Lyene, aonsi mutanda ali ni vyanzo yayanenyile ukuya uku kukoma antu yonsi ali mu musumba atakweti ivimanyililo. (Ezekelo 9:4-7) I vyani vino tungasambilila uku cilolwa ci, nupya umonsi uwakweti ivyakulembelako aweni?

Ezekelo waweni icilolwa cii umu 612 B.C.E. Wali usesemo uwatandikilepo ukufikiliziwa lino papisile imyaka 5 pa cisila lino Yeova wazumilizye asilika aina Babiloni ukonona umusumba wa Yelusalemu. Vikwene avino Yeova waomvizye aina Babiloni pa kufulula antu yakwe atali ni cuvwila. (Yelemiya 25:9, 15-18) Nomba nga Ayuda yaya ali  aololoke atatemilwe ivintu vipe ivyacitikanga umu musumba, yene cali nu kuya uli? Yeova wayapuswisye.

Umu cilolwa ciici, Ezekelo atalemvile muntu aliwensi icimanyililo pa usyu nanti ukwazwilizyako ukonona umusumba. Lelo, Angeli aliyo yaombelanga uku kononwa kwa musumba wa Yelusalemu. Fwandi usesemo uu ukatulenga tumanye ivikacitika umwi yulu. Yeova wanenyile angeli ukutungulula ukononwa kwa antu aipe nu kusininkizya ukuti antu yonsi aololoke yapusuka. *

Usesemo uu ulafikiliziwa nupya uku nkoleelo. Twalandanga tukuti umonsi wiya uwakweti vyakulembelako wimililangako apakwe acili pano nsi. Nupya twalandanga nu kuti antu yalembwanga ivimanyililo ndi cakuti yuvwa nu kupokelela ilandwe lisuma lino tukasimikila. Nomba likwene sile camanyikwe ningo ukuti tulinzile ukusenuka muli vino twalondololanga usesemo uu. Twasambilila muli Mateo 25:31-33 ukuti Yesu aliwe alapingula antu. Alacita vivyo uku nkoleelo umu ucuzi ukulu cuze. Insita iyo, yonsi alapingulwa ukuti imfwele yalapusuka, lyene yayo alapingulwa ukuti imbuzi yalononwa.

Nomba, i vyani vino tukusambilila uku cilolwa cino Ezekelo waweni? Tukusambililako ivintu 5, ni vintu vivyo aevi:

  1.  Lino musumba wa Yelusalemu utatala ononwa, Ezekelo, pamwi na Yelemiya na Ezaya, yacelwile antu pa vintu ivyali nu kucitikila umusumba. Yali kwati aakalinda. Ndakai, Yeova akaomvya iumba ilinono ilya yapakwe ukusambilizya antu nu kuyacelula lino ucuzi ukulu cuze utatala watandika. Alino, antu yakwe Yeova yonsi, kuli kuti, amu ng’anda yakwe, nayo kwene yakaombako umulimo uu.—Mateo 24:45-47.

  2.  Ezekelo, atalemvile ivimanyililo pa mausyu ya antu alapusuka. Na ndakai kwene antu yakwe Yeova asi vino yakacita. Yene yakasimikila sile nu kucelula antu pali vino vilacitika uku nkoleelo. Angeli yakaazwilizyako ukuomba umulimo uu uwa mu nsi yonsi.—Umbwilo 14:6.

  3.  Antu apuswike umu nsita yakwe Ezekelo, yatalemvilwe ivimanyililo pa mausyu yao. Ndakai antu yonsi alapusuka uku nkoleelo yatalalembwa ivimanyililo mu cumi pa mausyu yao. I vyani vino antu yalinzile ukucita pakuti yakapusuke ucuzi ukulu cuze? Lino yuvwa ukucelula, yalinzile ukusambilila ukukolanya Klistu, nu kuipeela kuli Leza, nu kutungilila aina yakwe Klistu lino yakusimikila ilandwe lisuma. (Mateo 25:35-40) Umu ucuzi ukulu cuze, antu yaayo yalalembwa ivimanyililo, kuli kuti yalasololwa kuti yapusuke.

  4.   Umonsi uwakweti ivyakulembelako akaimililako Yesu. Umu ucuzi ukulu cuze, Yesu alalemba amwi umba likulu ivimanyililo lino yalapingulwa ukuti imfwele. Lyene yalakwata isyuko lya kwikala amanda pe pano nsi.—Mateo 25:34, 46. *

  5.  Ndakai aonsi yaya mutanda ali ni vyanzo yakaimililako, asilika ya mwi yulu akatungululwa na Yesu. Likwene sile yasya yonone inko zyonsi nu kufumyapo ivipe vyonsi.—Ezekelo 10:2, 6, 7; Umbwilo 19:11-21.

Vino twasambilila ku cilolwa cii vyatwazwa ukusininkizya ukuti fwandi Yeova atalonona antu alungame pali pamwi na aipe. (2 Petulo 2:9; 3:9) Nupya vyatwiusyako nu kuti mulimo wa kukosoola wacindama sana ndakai. Aliwensi afwile kuvwa kucelula kuu lino impela itatala iza.—Mateo 24:14.

^ par. 6 Pa yantu yayo apuswike, pali na Baluki (Kalemba wakwe Yelemiya), Ebedimeleki umwina Kusyi, nu mwina Lekabu, yatakweti ivimanyilo pa mausyu yao umu cumi. (Yelemiya 35:1-19; 39:15-18; 45:1-5) Vimanyililo vivi vya unkolanya vyalozyanga mukuti yali nu kupusuka.

^ par. 12 Apakwe aya ni cisinka yatalalondekwa ukulembwa ivimanyililo pa mausyu yao pakuti yakapusuke. Lelo yene yalikilwa ivimanyililo pa mausyu yao lino yafwa sile nanti lino ucuzi ukulu cuze utatala watandika.—Umbwilo 7:1, 3.