1. U mulandu ci uno ukutwalana ningo kukaletela insansa?

Ilyasi lisuma likafuma kuli Yeova, Leza wa luzango, aakalonda kuti indupwa zyonsi zyaikala ningo. (1 Timoti 1:11) Aaliwe wapekinye kuti kuye utwazi. Utwazi wa mwi sunde ukalondeka sana pa kuti ulupwa luye nu luzango; pano icupo ca musango uwo cikaya icicingililwe ningo, umwakukuzizya ana.

Uzye Leza akalonda kuti utwazi uye uli? Akalonda kuti umonsi ndi watwala mama ala yalemana casila yatalatala yataane. Aina Klistu yonsi yalinzile ukukonka amasunde a kuno ikala pa kutwalana. (Luka 2:1, 4, 5) Yeova akalonda kuti iya nu muci yatemwana nu kuya acumi. (Ayebulai 13:4) Wapata ukutaana. (Malaki 2:16) Nomba wazumilizya Aina Klistu ukuti ndi umuci nanti iya wacita ucende, uwakwe angamuta nu kuyatwala muze, nanti kuyatwalwa kuli muze.—Welengini Mateo 19:3-6, 9.

2. Uzye iya nu umuci yalinzile ukulasungana uli?

Yeova waumvile aonsi na anaci pa kuti cila muntu ace aazwilizya umunze. (Utandiko 2:18) Iya ali mutwe wa lupwa; aaliwe alinzile ukukomapo sana pa kupeela ulupwa ivyakulya na vyunze vino yakalonda, alino nu kulayasambilizya pali Leza. Alinzile ukutemwa umuci kuluta na vino waitemwa. Ya iya yonsi na aci yalinzile ukutemwana nu kucindikana. Antu yonsi atwalana yatamalilika, fwandi iya nu umuci yalinzile ukulaelelana lino umuze waluvyanya. Ndi yacita vii, yalaikala ningo mu cupo.—Welengini Efeso 4:31, 32; 5:22-25, 33; 1 Petulo 3:7.

 3. Uzye umuntu nga atakwikala ningo mu cupo, alinzile ukuutuka uwakwe?

Ndi mwazana intazi mu cupo, mwemo mwaezya sile ukukomyako icitemwiko cinu. (1 Kolinto 13:4, 5) Izwi lyakwe Leza lisitunena ukuti nga twazana intazi zya mu cupo tufwile ukupalukana.—Welengini 1 Kolinto 7:10-13.

4. Mwe yana, uzye Leza akalonda kuti mwaikala uli?

Yeova akalonda kuti mwaikala ningo. Akamupandako na mano pa kuti mwe yalumendo na akazyana mwaipakizya uumi. Akalonda kuti mwaumvwila avyazi inu pano aliyo yamanya ivintu vingi. (Kolose 3:20) Nakapya, Yeova akalonda kuti mwamuombela nu kuvwila Umwanakwe pa kuti mwazanga cuze.—Welengini Kasambilizya 11:9–12:1; Mateo 19:13-15; 21:15, 16.

5. Mwe yavyazi, ivyani vino mulinzile ukucita pa kuti ana inu yaya ni nsansa?

Mulinzile ukuombesya pa kuti mwapeela ana inu ivyakulya, mwakwikala ni vyakuzwala. (1 Timoti 5:8) Nomba, nga mukulonda kuti ana inu yazanga sana, mufwile ukulayasambizya vino yangatemwa Leza nu kulakonka vino akuyasunda. (Efeso 6:4) Ndi yakulola vino mwemo mwatemwa Leza, nayo yalaacita vivyo kwene. Mwaomvya Baibolo pa kusunda ana; alino yalakula ningo.—Welengini Malango 6:4-7; Mapinda 22:6.

Ana yakatemwa sana nga mukuyakomelezya nu kulayataizya pali vino yakucita. Nomba ndi yaluvyanya, mufwile ukuyalungika nu kuyasunda ningo. Ndi mwayasambilizya umunzila iyo, yalasenka nu kumiyele iipe ino ingayonona. (Mapinda 22:15) Nomba lino mukusunda ana, mutacilamo ukukalipa.—Welengini Kolose 3:21.

Ya Nte Yakwe Yeova yakalemba mabuku iingi yano avyazi na ana yangaomvya pa kuti yamanye ivyakucita umu lupwa. Mabuku yayo yakalanda pa masunde ya muli Baibolo.—Welengini Masamu 19:7, 11.