LINO Yesu wapozizye ya kaleenga yaili aali impafu, wayile afika uku kamuzi kamwi akaali apiipi na Yelusalemu. Lyene waneenyile aasambi yaili ati: ‘Yangini umu muzi, mumaya-mukazane punda umunyepwe. Muye mukamusapule nu kumuleta kuno.’

Lino yaaile yaleeta punda wiyo, Yesu wakwezile penepo. Avino watandike nu kuya uku Yelusalemu. Lino wafisile apiipi nu musumba, iumba lya yantu lizile uku kumukomaanya. Antu aingi yaazuzile amakoti yao nu kwanza pa museo. Yauze nayo yaatemile utumisambo twa tuncindu. Natokwene yaatwisile apa museo, alino yatandika ukupunda yakuti: ‘Leza apolelele umwene aakwizila umwiziina lyakwe Yeova!’

Mpiti, ndi yaasoolola umwene umu Izlaeli, wakwelanga pali punda atandika ukwingila umu Yelusalemu pakuti antu yamumanye ukuti ali mwene umupya. Vivikwene ali vino na Yesu wacisile. Na antu yano ukulola paa, yakulangizya ukuti Yesu ali mwene wino yakulonda. Nomba, asi antu yonsi aalondanga ukuti Yesu aye umwene. Tungasininkizya vii ndi twalola ivyacitikiile Yesu lino waile uku Ng’anda ya kupepelamo.

Apa ng’anda ya kupepelapo, Yesu wapozizye impafu na alemale. Lino ana yaaweni vino Yesu wacisile, yaatandike ukumulumbanya ala yakupunda. Nomba cii calenzile yasimapepo ukusoka, yaneena Yesu yati: ‘Uzye watu-uvwa vino ana yaa yakulanda?’

Yesu waswike ati: ‘Ee, inuvwa. Uzye mutaawelenga muli Baibo apakaati: “Leza alasambilizya ana anoono ukulumbanya?”’ Lyene, ana yaatwaliliile ukulumbanya umwene wino Leza wasoolola.

Nafwe tulinzile ukuya wa yana kwene yaaya, uzye asi avivyo? Nafwe kwene antu yamwi yangatulesya ukulanda pa wene wakwe Leza. Nomba tulinzile ukutwalilila ukuneena antu pa visuma vino Yesu alacitila antunze.

Yesu ataali nu kutandika ukuteeka lino wali pano nsi. Uzye vwile a lilaci lino alatandika ukuteeka? Asambi yakwe Yesu yaalondanga ukumanya lino wali nu kutandika ukuteeka. Tuli nu kusambilila umu cipande cikonsilepo..