YOSIYA wali ni myaka ya kuvyalwa 8 lino watandike ukuteeka umu wene wa mitundu iili ya Izlaeli. Uzye vwile umuntu uwa myaka 8 angaya umwene? Fwandi ali cino pa kutandika, aikolo yamwavwanga ukuteeka.

Lino Yosiya wateesile pa myaka 7, watandike ukulonda Yeova. Wakolanyanga aene asuma aaliko mpiti wakwe Davidi, Yosafati na Hezekiya. Lyene kwali icintu cimwi cikome cino wacisile ala atatala wafisya ni myaka ya kuvyalwa 20.

Pa myaka iingi aina Izlaeli aingi yaacitanga sana iviipe. Yaapepanga tu leza twaufi. Nupya yafukamilanga utuluwi. Lyene Yosiya waiile na onsi yakwe nu kutandika ukufumya utuluwi tonsi utwali umu mpanga iiya. Mulimo uu wali ukome sana pano antu aingi yaapepanga tu leza twaufi. Lola Yosiya na antu yakwe vino yakutamola utuluwi.

Kufuma papo, Yosiya wasoolwile aonsi yatatu ukutungulula umulimo wa kuziifya ing’anda ya kupepelamo Yeova. Antu yaasangwile impiya nu kupeela aonsi kwene yaa pakuti yakale ivyalondekwanga pa kukuula. Lino yaaziifyanga ing’anda ya kupepelamo, simapepo mukalamba Hilikiya wazanyile icintu cimwi icicindame. Wazanyile ibuku lya masunde yano Yeova waneenyile Mose ukulemba mpiti sana. Pa myaka iingi yataamanyile na kuno lyali.

Lyene yaatwazile ibuku lilyo kuli Yosiya, nawe wayaneenyile ukuti yamuwelengele. Lino Yosiya uvwile amazwi yano yaawelenzilemo, wamanyile ukuti fwandi antu yataalondelanga masunde yakwe Yeova. Cintu cii camuwavile sana icakuti walepwile ivizwalo vyakwe; ali wiyo apa cikope icili apisika. Alino walanzile ati: ‘Yeova watusokela, pano ivikolwe vitu vitalondelanga amasunde aalembwa umwibuku lii.’

Lilyo kwene sile, Yosiya atuma simapepo mukalamba Hilikiya ukuti akuuzye vino Yeova wali nu kuyacita antu yaaya. Nawe Hilikiya waiile kuli kasesema mwanaci, Hulida nu kuya muuzya. Hulida wamuneenyile amazwi aafumile kuli Yeova ukuti akaneene Yosiya ati: ‘Yelusalemu na antu yonsi aaya mwenemo yalayafulula, pano yakaapepa tu leza twaufi, nupya insi yatizuulamo ivintu iviipe. Nomba pa mulandu wa kuti wemo we Yosiya ukacita ivisuma, antu yatalonoonwa, suka wemo nga waca wafwa.’