LOLA vino Yoswa akucita. Akulanda akuti: ‘We lanzi, imilila!’ Ni lanzi limilila. Ilanzi ilimilila papakwene uwanda onsi. Yeova aliwe waleenzile ukuti icintu cii cicitike! Nomba, leka tulole umulandu uno Yoswa walondelanga ukuti ilanzi litwalilile ukuwala.

Lino aene yasano (5) amu mpanga ya Kenani yaatandike ukulwisya aina Gibyoni, aina Gibyoni yaatumile umonsi umwi ukuyaneena Yoswa ukuti ayazwilizye. Umonsi kwene wiyo waile-alanda ati: ‘Wize zuwa-zuwa utwazwe. Wize ututuule! Aene yonsi amu mpanga ii yakutulwisya swe yaomvi inu.’

Papo kwene sile, Yoswa na onsi yakwe yonsi aulwi iyakatuka. Iyapita usiku onsi. Lino yaafisile kuli Gibyoni, asilika ya ene alwisyanga Gibyoni yuvwile intete nu kutandika ukupuuka. Lyene Yeova waleenzile amawe ya mvula ukupona ukufuma ukwiyulu, nupya amawe yaayo yaakomile asilika aingi ukucila na yano aonsi yakwe Yoswa aulwi yuumoozile.

Yoswa waweni ukuti ilanzi lyasya liwe. Pamafiita, nupya asilika ya ene kwene yaaya aipe yamautuka. Acino, Yoswa wapefile kuli Yeova nu kulanda ukuti: ‘We lanzi, imilila!’ Lyene lino ilanzi lyatwaliliile ukuwala, aina Izlaeli yaacimvizye ulwi.

Umu Kenani mwali aene aipe aingi na yauze aapasile antu yakwe Leza. Pakuti Yoswa na asilika yakwe yacimvye aene 31 amu mpanga ya Kenani, cayasendiile imyaka mutanda (6). Lino yacimvizye, Yoswa watandiike ukwankanya impanga ya Kenani uku mitundu ya ina Izlaeli iitaakweti incende.

Paapisile imyaka ingi, na Yoswa wizile afwa ala ali ni myaka ya kuvyalwa 110. Lyonsi lino Yoswa na onsi yano waombanga nayo umu utunguluzi yaali aumi, antu yuvwilanga Yeova. Lino aonsi kwene yaa asuma yaafwile, antu yaatandike ukucita iviipe nu kuiletelela. Ndi yaaya sana ni ntazi, alino yalondanga sana ukuti Leza ayazwe.