Skip to content

Muye pa utantiko wa vilimo

 LYASI LYAKUTANDIKILAKO | MWAMANYAPO VYANI PA NTE ZYAKWE YEOVA?

Uzye Impiya Izika-avwilizya Umulimo Witu Zikafuma Kwi?

Uzye Impiya Izika-avwilizya Umulimo Witu Zikafuma Kwi?

Cila mwaka tukapulinta nu kutwalila antu amaBaibo aingi cuze ni mpapulo izikalanda pali Baibo izingi. Tukakuula nu kuziifya amaofesi ni viombelo ivikaomviwa ukukupulintila impapulo umu nsi yonsi. Nupya ivilongano ivingi cuze vikakomaana umu vifulo vyakupepelamo ivika-amwa ukuti Mang’anda ya Wene. Nga fwandi impiya izyakucitila vii vyonsi zikafuma kwi?

Umusangulo wa kuitemelwa, uuka-azwilizya umulimo witu. (2 Kolinto 9:7) Umu 1879, magazini yakwe ciili ino twatangi: “‘Zion’s Watch Tower’ [ndakai tukaati Lupungu Lwa Mulinzi] yalanzilepo ukuti, twataila ukuti YEOVA aali kaazwa witu, tutalatala tulengelezye ulupiya nanti kupaapata antu kuti yatupeeleko.” I cumi kwene tutaatala twalengelezyapo impiya.

Tukatuma umusangulo ukwiofesi litu mukulungatika, nanti ukusumbila umu kambokosi akaaya umu Ng’anda ya Wene. Nomba tusipeela icikumi nanti ukutuula umutuulo, ukupisyamo imbale, nupya tusilipilisya pa mulimo uno tukaomba nanti ukukazya impapulo zino tukapeela. Nakupya kusi akatufolesya pa mulimo uno tukaomba uwa kusimikila, ukukosoola lino tukulongana nanti sile ukukuula umwa kulonganila. Pano Yesu walanzile ati: “Mwapelwa amaka yakucita vii uwila, caleka namwe kwene kacitilini antu uwila.” (Mateo 10:8) Aomvi yonsi akaombela umu maofesi anono na akalamba yako ya Nte Yakwe Yeova, yasifola kumwi na yaaya kwene aaya umwi Umba Likatungulula Ilya Nte Zyakwe Yeova.

“Impiya izikaomviwa umu milimo ino ya Nte Yakwe Yeova yakaomba, i misangulo yakuitemelwa, umuntu wensi akapeela ‘umusangulo’ ukulingana na pano akwatiile.”—I vyalanzile Icilye Cikalamba cakuti European Court of Human Rights mu 2011

Impiya kwene izikasangulwa, i zikaomviwa nu mukwazwilizya atiyaponelwa nu uzanzo. Aina Klistu akutandikilako, nayo kwene yazwilizyangako umu mulimo wa kusakamala aali umu uzanzo. (Loma 15:26) Na ndakai kwene tuka-azwilizya yaayo atiyaponelwa nu uzanzo ukuyakulila amang’anda yao alino nu kuziifya ivikulwa umwakupepela nupya tukayatwalila ivyakulya, ivyakuzwala ni milembo.