Skip to content

Muye pa utantiko wa vilimo

Vino Ipepo—Lingamwavwa

Vino Ipepo—Lingamwavwa

Lino mutaatala mwatandika ukuomba umulimo uli onsi, limwi mungayuzya muti, ‘Uzye umulimo kwene uu ulangavwa uli?’ Nomba uzye na pipepo kwene, munguzya iuzyo lii? Kwene limwi cingaya sile ningo ukuuzya. Pano swensi tukalonda ukumanya ndi cakuti ipepo lingatwavwa. Na Yobo kwene walondanga ukumanya ndi cakuti Leza ‘anguvwa’ lino akupepa.—Yobo 9:16.

Twasambiliile umu vipande vyafumako ukuti, ipepo lyacindama sana. Icumi kwene, Leza akauvwa ipepo. Ndi cakuti tukupepa kuli Leza ukulingana na vino akalonda, aluvwa ipepo litu. Nupya Leza kwene aakatukomelezya ukuti twapalama kuli aaliwe. (Yakobo 4:8) Uzye lyene i vyani vino tungenekela ndi cakuti tukupepa lyonsi kuli Leza? Katusambilile pali vimwi-vimwi ivingacitika ndi tukupepa lyonsi.

Tulaya nu mutende.

Uzye ndi cakuti intazi zyamucitikila, mukasakamala sana? Baibo ikatukomelezya ukuti ndi twasakamala sana, twapepa “nsita zyonsi” nu “kupapata Leza.” (1 Tesalonika 5:17; Filipi 4:6, Cimambwe New Testament) Baibo ikatunena ukuti, ndi cakuti tukupepa kuli Leza, ‘alatupeela mutende uno kusi umuntu nanti wenga angaumanyikisya. Mutende kwene uu, ulatungulula umi witu ni myelenganyizizye itu.’ (Filipi 4:7) Tungaya nu mutende ndi cakuti tukunena Tata witu uwa kwiyulu vyonsi ivili ku mwenzo. Nupya vikwene aali vino watunena ukuti twalanda vyonsi ivili ku mwenzo. Pali Masamu 55:22 pakaati: “Uwatuula masakamiko yako kuli Yawe, nawe amakuwakanga.”

“Uwatuula masakamiko yako kuli Yawe [Yeova], nawe amakuwakanga.” —Masamu 55:22

Antu aingi sana umu nsi yazana umutende kwene uu uno Leza akapeela. Umwanaci umwi Hee Ran, uwa ku South Korea, walanzile ati: “Ndi cakuti napepela apa wavya uno nkweti, nkayangukilwa sana nupya nkaya na maka akusipikizya uwavya uwo.” Na muze a Cecilia, uwa ku Philippines, walanzile ukuti: “Nkasakamala sana apa yana yano nakwata na pali vino ya mayo yalwala pano ndakai yatandika nu kungilila. Lelo ipepo lyangavwa sana ukucefyanyako amasakamika. Namanya ukuti Yeova aakulangavwa ukuyasunga.”

Mungakomeleziwa lino muli ni ntazi.

Uzye namwe mwakwata sana uwavya ukalamba uukamusakamika? Mungateeka umwenzo ndi mwapepa kuli Leza wino “ali ntulo ya kutekeziwa konsi.” Baibo ikati, “akatwazwa mu ntazi zitu zyonsi.” (2 Kolinto 1:3, 4) Apa nsita imwi lino Yesu wali nu ulanda ‘wafukime apepa.’ Uzye umumanya icacitike? ‘Umungeli walolike kunoli ukufuma kwiyulu amukomelezya.’ (Luka 22:41, 43) Namuze a Neemiya wino antu aipe yacuzizye sana, aalondanga ukumulesya umulimo wakuombela Leza. Lelo wapefile ati: “We Leza, ule unkomye.” Ivyacitike vyalanzile apaswe ukuti umu cumi Leza wamwavwile ukuya umusipe nupya waomvile ningo umulimo uwa. (Neemiya 6:9-16) Reginald, uwa ku Ghana, walanzile vino ipepo lyamwavwile watile: “Ndi napepa maka-maka umu nsita ino ivintu vyativitala, nkauvwa kwati nanena umuntu umwi wino akweti amaka akungavwa nupya wino akunkomelezya ukuti ntaasakamala.” I cumicumi, Leza angatusansamusya ndi tukupepa kuli aliwe.

Tungakwata amano afuma kuli Leza.

Ivintu vimwi vino tukapingulapo ukucita, vingatuzipila capamwi na antu yanji nanti foo. Uzye tungacita uli pakuti twapingulapo ningo apa vintu? Baibo ikati: “Ndi umwi uwa munomuli ulilwa amano, wene alinzile kulenga Leza, nga nawe alamupeela, pano Leza akapeela kuli yonsi kwaula kasoozi.” (Yakobo 1:5) Ndi cakuti twalenga Leza ukuti atupeele amano, angaomvya umupasi wakwe uwa muzilo ukututungulula pakuti tupingulepo ningo pali vino tukulonda ukucita. Nupya, tufwile ukulenga Leza ukuti atupeele umupasi kwene uwo, pano Yesu watukomelezya ukuti ‘So uwa mwiyulu alalusya kupeela umupasi wa muzilo kuli yao akamulenga!’—Luka 11:13.

“Natwaliliile ukupepa kuli Yeova lyonsi pakuti angavwe ukupingula ningo pali vino naali nu kucita.”—Kwabena, wa ku Ghana

Nanti sile a Yesu, waweni ukuti cacindama sana ukupepa kuli Isi pakuti amwazwe lino akupingula apa vintu vimwi ivicindame. Baibo ikatunena ukuti lino Yesu walondanga ukusoolola aonsi 12 ukuti yaye atumwa yakwe, ‘wapefile kuli Leza’ usiku onsi.—Luka 6:12.

Na ndakai kwene, antu aingi sana yasininkizya ukuti Leza aka-asuka mapepo yano yakapepa kuli aliwe ukuti ayavwe ukupingula ningo apa vintu. Regina, uwa ku Philippines, walanzile apa ntanzi zino wakweti; lino iya wafwile, incito yasizile nupya aaliwe watandike ukusakamala ulupwa, kuisakamala umweneco alino nu kusakamala ana. Uzye lyene i cani camwavwile ukupingulapo ningo? Umwineco walanzile ukuti, “Lyonsi nkapepa kuli Yeova pakuti angavwa.” Na muze a Kwabena, uwa ku Ghana, walanzile umulandu uno akapepela kuli Leza ukuti amwazwa, walanzile ati, “Incito yamakuule ino naombanga nu kufola impiya izingi, yasizile.” Walanzile vino wacisile ati, “Natwaliliile ukupepa kuli Yeova lyonsi pakuti angavwe ukupingula ningo pali vino naali nu kucita. Nupya naaya nu luzango sana, pano Yeova wangavwa ukusoolola ningo incito iikansiila insita iya kusambilila pali Leza alino nu kuomba imilimo yuze.” Namwe kwene ndi mukulonda ukupingula ningo apa vintu, mwapepa kuli Leza nupya alamwazwa ukupingulapo ningo pa vintu ivingamwazwa ukutwalilila ukuya cuza wakwe.

Twalanda sile apa vintu vimwi-vimwi vino ipepo lingamwazwa. (Mungalola na vyuze mu kambokosi akakuti “ Vino Ipepo Lingamwavwa.”) Nomba pakuti ipepo limwazwe ningo, mufwile inkoleelo ukumanya Leza na vino akalonda. Ndi cakuti avino mukulonda, mukwai tukumukomelezya ukuti mukalande na ya Nte Yakwe Yeova pakuti yakamwazwe ukusambilila Baibo. * Ndi mwacita vivyo, ale mwatandika ukupalama kuli Leza wino “akauvwa amapepo.”—Masamu 65:2.

^ par. 14 Pakuti mumanyilepo na vyuze, mukalande na ya Nte Yakwe Yeova aaya kuno mwikala nanti mukayule webusaiti itu iya www.jw.org.