Skip to content

Muye pa utantiko wa vilimo

Uzye Naswe Tungacita Ivingazanzya Leza?

Uzye Naswe Tungacita Ivingazanzya Leza?

Uzye mwatala mwawelengapo malyasi akalanda pa yantu alumbulwa muli Baibo, alumbanyanga sana Leza? Uzye lino mwawelenzile malyasi yaayo mwelenginye ukuti mwemo mutanga mucite vino yaacisile? Limwi mungelenganya muti: ‘Nemo ntanga nkwanisye ukulumbanya Leza, pano asi lyonsi lino nkacita ivisuma.’

Yobo wali u muntu ‘uwaula umulandu nupya wacitanga ivisuma.’—Yobo 1:1

Baibo yalanda pali Yobo uwaliko mpiti, ukuti, “umuntu wii wali uwaula umulandu nupya aakacita ivisuma.” (Yobo 1:1) Loti nawe wali u muntu ‘uwacitanga vyawololoke.’ (2 Petulo 2:8) Nupya Baibo yalanda na pali Davidi ukuti, wene wacitanga ‘ivyazanzyanga’ Leza. (1 Yamwene 14:8) Nomba, lekini tulandeko apa yantu kwene yaa aalembwa muli Baibo. Tumamanya vino (1)  yaluvyanyizye, (2) vino tungasambilila kuli vino yacisile, alino na (3) vino swe yantunze tungacita pakuti twazanzya Leza.

NAYO KWENE YAALUVYANYANGA

“[Leza] watuuzile Loti umuntu uwacitanga ivyawololoke, wino wanyungulukanga pa vya winyi vino antu yankota yacitanga.”—2 Petulo 2:7

Yobo wene walolanga kwati aatafyengwa lino walwile indwala iipisye. Watandike ukwelenganya iviipe pali Leza, pano walolanga ukuti ataamusakamiile. (Yobo 920-22) Yobo wasininkizye sana ukuti wali uwakayele, icakuti antu yamwi yalolanga kwati akuitakizya ukuya uwakayele kucila Leza.—Yobo 32:1, 2; 35:1, 2.

Loti nawe uvwanga intete sana ukupingulapo apa cintu cimwi icali sile icangupale ukucita. Loti wali sana nu ulanda ukulola vino antu aali umu  Sodoma na Gomola yacitanga ivintu viipe ivyasosyanga Leza, calenzile nu kuti ‘cila wanda aanyunguluka’ umu mwenzo wakwe. (2 Petulo 2:8) Leza wapingwilepo ukonona yonsi acitanga iviipe kumwi ni misumba kwene iiya, lelo wapeezile Loti insita iyakuti afumemo nu lupwa lwakwe. Limwi mungelenganya ukuti Loti afwile aaliwe wali apa nkoleelo ukufuma umu musumba. Nomba icakuzungusya i cakuti, watandike ukusitooka. Lyene angeli yano Leza watumile a iizile yamucincizya ukuti afume umu musumba capamwi nu lupwa lwakwe.—Utandiko 19:15, 16.

Davidi ‘wali uwa cumi kuli Leza nu mwenzo wakwe onsi, nupya wacitanga sile ivyakuzanzya’ Leza.—1 Yamwene 14:8

Davidi nawe apa nsita imwi wacisile vino umwenzo wakwe walondanga, cakuti wasusile acita ucende na muka mwine. Ni caipisye i cakuti, Davidi wakomile umonsi uwatwazile mama wiyo, pakuti upulumusi uno wacisile utamanyikwa. (2 Samueli, cipande 11) Baibo ikaati, ‘Yeova atatemilwe icintu cino Davidi wacisile.’—2 Samueli 11:27.

Yobo, Loti na Davidi yonsi kwene yaluvyanyizyepo, nupya amaifyo yamwi yano yaacisile yaali aipisye. Lelo ndi vino mumasambilila, nanti yaluvyanyizye, yalondesyanga ukuombela Leza ni myenzo yao yonsi. Fwandi yalapiile pali vino yacisile nupya yasenwike. Acino Leza wayuvwilile uluse, nupya Baibo yaayalumbula nu kuti yaali a onsi afuma cumi.

I VYANI VINO TUNGASAMBILILA UKU YANTU YAA?

Fwemo tutamalilika, fwandi i cikalenga nu kuti insita zimwi twaluvyanya. (Loma 3:23) Nomba lino twaluvyanya cikalondeka ukulanga ukuti umu cumi utulapila, nupya tufwile ukwezya apapezile amaka itu pakuti tuombele pali cino ituluvyanya.

Uzye Yobo, Loti na Davidi yacisile uli pakuti  yaombele pali vino yaluvinye? Yobo wali umuntu wakayele. Lino Leza walanzile nawe, Yobo walangizye ukuti umu cumi walapile. (Yobo 42:6) Vino Loti uvwanga sana uyi pa viipe vino antu amu Sodoma na Gomola yacitanga, vyasininkizye ukuti watemilwe amasunde yakwe Leza. Nomba insita imwi watazile asitooka ukufuma umu musumba uno waali nu kononwa. Nanti ciye vivyo wasusile afuma umu misumba iiya umwali ivicitwa viipe nupya Leza wamupuswisye. Nakupya Loti uvwilile vino Leza wamunenyile nupya ataatazile aelenganya pa vintu vino wasiile. Na Davidi kwene, nanti icakuti wacisile iifyo ilipisye, wasokolwile vyonsi ivyali umu mwenzo wakwe icakuti walapiile, alenga nu uwelelo kuli Leza.—Masamu 51.

Vino Leza welezile aonsi yaaya, cikalanga sile apaswe ukuti wamanya ningo vino antunze yaaya. Leza “wene wamanya vino watuumba, wamanya nu kuti swemo sweswe lukungu sile.” (Masamu 103:14) Nga lyene vino Leza wamanya ukuti tukaluvyanya, i vyani vino akalonda twacita?

Leza “wene wamanya vino watuumba, wamanya nu kuti swemo sweswe lukungu sile.”—Masamu 103:14

UZYE ANTUNZE YANGACITA ULI PAKUTI YAAZANZYA LEZA?

Vino Davidi wanenyile umwanakwe Solomoni, vingatwavwa ukumanya vino tungaazanzya Leza. Wamunenyile ati. ‘We mwanane Solomoni, wauvwila Yeova Leza wa vikolwe vyako, nu kumutumikila nu mwenzo wako onsi.’ (1 Milandu 28:9) Uzye amazwi aakuti nu mwenzo wako onsi, yalola mwi? Cikapiliula ukutemwa Leza nu kulondela amasunde yakwe. Cisipiliula ukuti tufwile ukuya nu mwenzo umaliilike, lelo tufwile ukulondesya nu kuitemelwa ukuombela Leza. Ukutemwa sana Leza nu kumuuvwila u kwalenzile Yobo aye “uwaula mulandu,” nu kulenga Loti ukuti ‘aacita ivyaololoke,’ nupya u kwalenzile ukuti Davidi aacita ‘ivyazanzyanga’ Leza. Nanti icakuti yonsi yaa yataali amaliilike, yaazanzyanga Leza.

Ukutemwa Leza nu mwenzo witu onsi cikapiliula ukuvwila masunde yakwe nu kulondesya ukumuombela

Fwandi ndi cakuti twatandika ukuya na melenganyo aipe, nanti ukulanda vimwi ivingalenga twauvwa uyi, nanti limwi ukucita vimwi ivingalenga twalanguluka, tulinzile twakolanya aonsi yano twalanda paa. Leza wamanya ukuti tutamalilika, insita zimwi tukaluvyanya. Lelo, cino akalonda kuli sweswe, u kumutemwa nu kumuvwila. Ndi tukucita viivyo nu mwenzo witu onsi, ala tukuzanzya Leza.