Skip to content

Muye pa utantiko wa vilimo

 LYASI LYAKUTANDIKILAKO

Uzye “Impelelekezyo”—Ikapiliula Cani?

Uzye “Impelelekezyo”—Ikapiliula Cani?

Uzye lino muvwa amazwi aakuti, “impelelekezyo itipalama!” mukaelenganya pali cani? Uzye mukaelenganya apa kwiza kwakwe Mesiya, ukwiza senda antu asuma ukwiyulu alino nu kusumbila aipe umu moto wa pe, nanti limwi mukaelenganya sile apa kononeka kwa antu? Ukwelenganya kuuko, kungalenga ukuti antu yasakamala sana, alino yauze nayo yangauvwa ningo.

Baibo ikati: “Mpelelekezyo iliza.” (Mateo 24:14) Nupya insita kwene ii, ika-amwa nu kuti “wanda wakwe Leza” alino nu kuti “Alamagedoni.” (Umbwilo 16:14, 16) I cacumi ukuti antu amu mipepele ingi, yatamanya vino impelelekezyo ilaya, yakaelenganya ivyaufi. Lelo Baibo ikalondolola ningo vino impelelekezyo ilaya—ikalondolola vino ikapiliula na vino isipiliula. Nupya Baibo ikatwazwa ukumanya ningo ndi cakuti impelelekezyo yati palama nanti foo. Alino nupya ikatusambilizya vino tungacita pakuti tukapusuke! Nomba, lekini tutale tuvwikisye cisinka pali vino antu yakalanda pa mpelelekezyo nupya tumalola vino ikapiliula. Uzye Baibo ikaati “impelelekezyo” i cani?

 VINO IMPELELEKEZYO ISIPILIULA

  1. IMPELELEKEZYO ASI UKONONWA KWA NSI MU MOTO

    Baibo ikati: “[Leza] wasimpisya insi . . . isi yakutelengana foo.” (Masamu 104:5) Ilembelo lii alino na malembelo yauze yakatwazwa ukumanya ukuti Leza atalatala aonone insi nanti ukuzumilizya yauze ukuyonona!—Kasambilizya 1:4; Ezaya 45:18.

  2. IMPELELEKEZYO ITALAICITIKILA SILE.

    Baibo ikatuneena ukuti impelelekezyo italaicitikila sile—lelo Leza wikako insita ino impelelekezyo ilacitika. Baibo ikaati: “Kusi nanti wenga wamanya kwiza kwa wanda ulya nanti kasita. Angeli ya mwiyulu nanti Mwana kwene yatamanya, suka sile Tata. Cenjelini, pempulini pano mutamanyile lino nsita ii iliza.” (Mako 13:32, 33) Acino fwandi, Leza, [“Tata”] watantika “insita” lino alaleta impelelekezyo.

  3. ANTUNZE NANTI UKUPONA KWA VINTU VYA MWIYULU ASI UKULALEETA IMPELELEKEZYO.

    Uzye impelelekezyo ilatandika uli? Pa Umbwilo 19:11 pakati: “Nupya ndola iyulu lyalekuka, ni mfwalasi itiswe iloleka. Izina lyakwe wino uwakwezilepo yakamwama yakuti, ‘uwakutailwa nupya uwa cumi.’” Pa cikomo 19 pakati: “Nupya ndola cilyanyi nga na yakateeka amu nsi. Yene pamwi ni vita vyao yakongana kuti yalwisye wino uwatakwela pa mfwalasi pamwi ni vita vyakwe.” (Umbwilo 19:11-21) Nanti cakuti amazwi ali paa aunkolanya, lelo yakapiliula ukuti Leza alatuma ivita vyakwe, kulikuti angeli yakwe ukwiza onona alwani yakwe.

Ilyasi ilyaya muli Baibo ilikalanda vino impelelekezyo ilaya, likatusansamusya sana

VINO IMPELELEKEZYO IKAPILIULA

  1. UKONONWA KWA MAUTEEKO AUNTUNZE.

    Baibo ikati: “Umu nsita zyakwe yakateeka yalya, Leza wa kwiyulu alakatusya uwene uno utalatala  wononwe. Wene utalatala ucimviwe, lelo ulonona amawene yauze yonsi nga lyene wikalilila amanda pe.” (Danieli 2:44) Wakwe vino twati tulanda apa cisinka cakwe citatu, “yakateeka amu nsi . . . ni vita vyao,” yano yalakongana kuti “yalwisye wino uwatakwela pa mfwalasi pamwi ni vita vyakwe,” yalononwa.—Umbwilo 19:19.

  2. KUFUMIZIWAPO KWA NKONDO, UNKALWE, NU LUFYENGO.

    ‘[Leza] wene alalesya inkondo pano nsi yonsi.’ (Masamu 46:9) “Pano antu asuma, ali yano yalikala muno nsi, akaele ali yano yalakwata mwenemo icifulo cao. Alino antu aipe yene Leza alayafumya umu mpanga, nupya alafumyamo yakaifya ndi vino antu yakaipula ivikona mu calo.” (Mapinda 2:21, 22) “Ndakai vintu vyonsi nkuvicita ivipya!”—Umbwilo 21:4, 5.

  3. KONONWA KWA MIPEPELE IKASAALULA LEZA NU KUSOMBA ANTU.

    ‘Ya kasema yakasema ivyaufi na ya simapepo nayo yakasambilizya sile vino yatemwa . . . Uzye lyene mulacita uli lino vii vilasila?’ (Yelemiya 5:31) “Pa wanda ulya uwa upinguzi, aingi yalavwanga kunondi yati, ‘Mwene, Mwene uzye asi mwi zina lyako amuno twakosolelanga? Uzye asi mwi zina lyako amuno twafumizizye mipasi yankota, nu kucita ivinjelengwe?’ Lyene nani ndayanena paswe inti, ‘ntamumanyile, fumini pano, mwe yakacita ya viipe.’”—Mateo 7:21-23.

  4. KONONWA KWA ANTU AKATUNGILILA IMITEKELE YA UNTUNZE.

    Yesu Klistu walanzile ati: “Luswepo lwiza umu nsi, lelo antu yakacita viipe. Acino yapingulwa pano yatemwisya imfinzi ukuluta uluswepo.” (Yoane 3:19) Muli Baibo mwaya ilyasi ilikalanda pali vino antu yononyilwe pano nsi pa nsita ino Nowa waliko. Tukawelenga ukuti: “Nupya cali ku manzi yakwe mulamba, kuno insi ya mpiti yononyilwe. Lelo izwi lyakwe Leza ilyasunga mayulu nga ni nsi ino ilipo ilelo, kufika lino vilononwa nu moto. Vyene vyasungwa kufika pa wanda uno yakaifya yalapingulwa nu kononwa.”—2 Petulo 3:5-7.

Uwanda uno “yakaifya yalapingulwa” wakolana nu kononwa kwa “nsi” ukwacitike umu nsita yakwe Nowa. Uzye insi ino yononyilwe i cani? Insi ino twayamo itononike; lelo antu aali “yakaifya,” nupya alwani yakwe Leza, aaliyo yononyilwe. Fwandi, antu aakacita iviipe, aliyo yalononwa apa “wanda” wa upinguzi uno uli apiipi nu kwiza. Lelo yacuza yakwe Leza, yene yalapusuka ndi vino caali kuli Nowa nu lupwa lwakwe.—Mateo 24:37-42.

Ala pano nsi palaziipa cuze lino Leza alonona ya kacita yaviipe yonsi! Ilyasi ilyaya muli Baibo pali vino impelelekezyo ilaya, likatusansamusya sana. Nomba limwi munguzya muti: ‘Uzye Baibo yalanda lino impelelekezyo iliza? Uzye yatipalama? Ningacita uli pakuti nkapusuke?’