Skip to content

Muye pa utantiko wa vilimo

Uzye Ucuza Winu na Yeova u wa Cumi?

Uzye Ucuza Winu na Yeova u wa Cumi?

“Mupalame kuli Leza, nga nawe amapalama kunomuli.” —YAKO. 4:8.

1. U mulandu ci uno tufwile ukukomya ucuza witu na Yeova?

UZYE mwemwe ya Nte Yakwe Yeova aaipeela, nu kuwatiziwa? Ndi cakuti avino cili, mwakwata icintu icicindame sana, kulikuti ucuza winu na Leza. Nomba, ucuza uo waya umu uzanzo, asi kuli Satana sile, lelo na pa mulandu wa kukanamalilika. Aina Klistu yonsi yaaya ni intazi ii. Acino fwandi ucuza witu na Yeova ufwile ukuya ukome.

2. (a) Uzye ucuza i cani? (Lolini futunoti.) (b) Tungakomya uli ucuza witu na Yeova?

2 Uzye mwemo ucuza winu na Yeova waya uwa cumicumi? Uzye mungatemwa ukukomya ucuza na Yeova? Ilembelo lyakwe Yakobo 4:8 likaatuneena ukuti: “mupalame kuli Leza, nga nawe amapalama kunomuli.” Lolini ukuti paa, pali ivintu viili. * Nga twapalama kuli Leza, nawe kwene akapalama kuli sweswe. Ndi cakuti tukucita vii lyonsi, ucuza witu na Yeova ukakomelako. Lyene, ucuza witu na Yeova ukaya uwa  cumicumi. Tukaya nu utailo uno Yesu waali nao, lino walanzile ati: “Wino wantuma uwa cumi, nemo . . . namumanya.” (Yoa. 7:28, 29) Nomba uzye, i vyani vino mungacita pakuti mupalame kuli Yeova?

Mungalanzyanya na Leza mutuuli? (Lolini palagalafu 3)

3. I cani icingatwazwa pakuti tulanzyanye na Leza?

3 Ukulanzyanya na Yeova lyonsi kwacindama pakuti mupalame kuli aliwe. Nomba mungalanzyanya mutuuli na Leza? Uzye mukalanzyanya uli na cuza winu akaikala ukutali sana? Mufwile, mukalembelana makalata, nu kutumilana mafoni, nupya limwi mukacita vivyo imiku iingi. Fwandi na Yeova kwene mukalanzyanya nawe ukupitila umu kupepa kuli aliwe lyonsi. (Welengini Masamu 142:2.) Nupya Yeova nawe akalanda namwe, lino mukuwelenga Izwi lyakwe nu kwelenganyapo sana. (Welengini Ezaya 30:20, 21.) Lekini lyene tulande pali vino ukulanzyanya kuu kungalenga tupalame sana kuli Yeova, nu kuleka ucuza witu na aliwe ukuya uwa cumicumi.

NGA MUKUSAMBILILA BAIBO ALA YEOVA AKULANDA KULI MWEMWE

4, 5. Uzye Yeova akalanzyanya uli naswe ukupitila Umwizwi Lyakwe? Langililini.

4 Ukwaula nu kutwisika mwamanya ukuti muli Baibo mwaya amazwi yakwe Leza ku yantu yonsi. Nomba uzye Baibo nayo ikalanda vino mungacita pakuti mupalame kuli Yeova? Ica cumi ikalanda. U munzila ci? Lino mukuwelenga Baibo lyonsi, mwalola ndi cakuti mukucita vino ikulanda nupya mwaelenganya pali vino mungaomvya vino mukuwelenga; nga mwacita vivyo ala Yeova akulanda namwe ukuomvya Izwi lyakwe. Cii cingalenga mupalame sana kuli Yeova.—Ayeb. 4:12; Yako. 1:23-25.

5 Limwi, mungawelenga nu kwelenganya apa mazwi yakwe Yesu aakuti: “Mutaika vyuma vinu muno nsi.” Ndi cakuti mwazana ukuti mukakolezya ivya Wene, mungamanya ukuti fwandi Yeova watatemwa. Nupya, ndi cakuti mwazana ukuti mufwile ukwangusya umi winu nu kukolezya ivya Wene, mukamanya ukuti atamilanga muno mufwile ukuombela pakuti mupalame kuli aliwe.—Mate. 6:19, 20.

6, 7. (a) Uzye kusambilila Baibo kukatwazwa uli ukutemwa Yeova nu kutemwikwa kuli aliwe? (b) I vyani vino tufwile ukwelenganyapo sana lino tukusambilila Baibo?

6 Ukusambilila Baibo kusitulanga sile mumwi muno tufwile ukuzifya. Kukatwazwa ukuti twataizya sana pa miyele  yakwe Yeova, na cii cikalenga tumutemwe sana. Nupya lino twamutemwa sana, nawe akatutemwa, lyene ucuza witu na aliwe ukakomelako.—Welengini 1 Kolinto 8:3.

7 Nomba pakuti tupalame kuli Yeova, cacindama ukumanya umulandu uno tukusambililila Baibo. Ilembelo lyakwe Yoane 17:3 likati: “Umi wape uwakuti antu yamanye wewe, Leza wenga sile uwa cumi, nga nu kumanya Yesu Klistu wino watumile.” Fwandi, tutafwile sile kulondesya ukusambilila, lelo tufwile nu kulondesya ‘ukumanya’ Yeova ningo.—Welengini Kufuma 33:13; Masa. 25:4.

8. (a) I vyani vino antu yangaelenganya pali vino Yeova wafulwile Umwene Azaliya, ivyalembwa pali 2 Yamwene 15:1-5? (b) Uzye ukumanya Yeova kungatwazwa uli ukukana twisika pali vino akaomba ivintu?

8 Ndi cakuti twamanya sana Yeova, tutalazunguka lino twazana amalyasi yamwi alembwa muli Baibo yano tutuvwikisye. Tuti limwi mwelenganya pali vino Yeova wacisile kuli Azaliya, mwene wa Yuda, uzye mukauvwa uli? (2 Yamw. 15:1-5) Lolini ukuti antu “yatwalilile ukupeelela impolelwa nu kocela ubani ku ncende zizi kwene” zino yaapepelangako, Azaliya wene umwineco “wacitanga ivintu ivisuma pa manso yakwe Yeova.” Lelo, “Yeova nawe alwalika Azaliya tembwe, nu kufwa wizile afwa na tembwe.” U mulandu ci? Ivyalembwa vitaalanda. Uzye nomba ci cifwile ukutuzungusya sana nanti ukutulenga twaelenganya ukuti Yeova wafulwile Azaliya apaula umulandu? Ngi cakuti twamanya sana vino Yeova waya, tutalacita vivyo. Nupya tulamanya nu kuti wene akasalapula lyonsi “kulingana ni nsambu”. (Yele. 30:11) Ukumanya kuuko, kukalenga tutaile ukuti nanti icakuti tutamanya ningo umulandu uno Yeova wacitiile viivi kuli Azaliya, twamanya ukuti upinguzi wakwe wali uololoke.

9. I visinka ci ivikalangilila umulandu uno Yeova walwalikile Azaliya tembwe?

9 Nomba ndi cakuti caya vivyo, ivyeo na vyuze tungavizana muli Baibo kwene. Umwene Azaliya nupya yamwamanga yakuti Uziya. (2 Yamw. 15:7, 32) Pali 2 Milandu 26:3-5, 16-21, tukasambilila api lyasi kwene lii, ukuti nanti icakuti Uziya wacitanga ivisuma apa nsita imwi, wizile “atandika ukuvwa icilumba,” na cii camuletelile. Waomvile imilimo ino yaombwanga sile na ya simapepo, ukwaula insambu. Ya simapepo aali 81 yaile kuli aliwe pakuti yamulesye. Uzye Uziya wacisile uli? Ali pano walangizye icilumba cino wakweti. ‘Wasokiile sana’ ya simapepo. Aali mulandu uno Yeova wamulwalike tembwe!

10. U mulandu ci uno tutalinzile twalondela ukumanya lyonsi umulandu uno Yeova wacitila ivintu vimwi, nupya tungacita uli pakuti tutaile sana Yeova?

10 Lekini tuvwikisye sana paa. Tuti limwi muli Baibo mutaali ivyeo vii ivyakutwazwa ukuvwikisya umulandu uu, wakwe vino caya uku malyasi yauze asyala, uzye mungati Leza atacisile ningo? Nanti uzye mungelenganya ukuti muli Baibo mwaya ivyeo ivingatupeela usininkizyo wakuti Yeova lyonsi akacita ivyololoke nupya aliwe wamanya icisuma ni ciipe? (Malan. 32:4) Nga twamanya Yeova ningo, tulamutemwa sana nu kumucindika icakuti tutalalondekwa nu kumanya umulandu uno wacitila ivintu vimwi. Mufwile kumanya ukuti mulaya nu kutemwa kuko ndi cakuti sile mwaombesya ukusambilila nu kwelenganya pali vino Leza akumunena ukupitila Umwizwi Lyakwe. (Masa. 77: 12, 13) Na cii, cilalenga ucuza winu na Yeova ukukoma, nupya ulaya uwa cumicumi.

NGA MUKUPEPA ALA MUKULANDA KULI LEZA

11-13. Uzye mwamanya uli ukuti Yeova akauvwa amapepo? (Lolini icikope ca kutandikilako.)

11 Tukaapalama kuli Leza nga tukupepa kuli aliwe. Tukamulumbanya, kumutaizya, alino nu kuleka aatutungulula. (Masa. 32:8) Nomba pakuti ucuza winu na Yeova ukome, mufwile ukumutaila ukuti aka-asuka amapepo.

12 Antu yamwi yazumila ukuti ipepo icintu icakukwazwilizyako sile. Yakati ndi wati Leza wata-asuka ipepo, ala avino welenganya sile vivyo kwene ukuti aata-asuka, nga alino lyene uwaombesya pakuti umale intazi. Nga mwemo mukamanya uli ukuti Yeova akuvwa amapepo inu ?

13 Elenganyini pali ci: Lino Yesu atali aize pano nsi, walolanga kuno Yeova wasukanga amapepo ya antunze. Lyene, lino waombanga umulimo wa kusimikila pano nsi, Yesu waomvyanga amapepo nga akulonda ukulanda kuli Isi uwa kwiyulu. Uzye Yesu nga wasumbanga insita usiku onsi ala akupepa ndi welenganyanga ukuti Yeova asiuvwa mapepo? (Luka 6:12; 22:40-46) Uzye Yesu nga wasambilizyanga asambi yakwe ivya kupepa ndi welenganyanga ukuti ipepo icakwazwilizyako sile umuntu,? Ukwaula nu kutwisika, Yesu wamanyile ukuti ndi ukupepa ala icumicumi ukulanda na Yeova. Apa nsita imwi, Yesu walanzile ati: Tata, “manyile vino ukanguvwa.” Naswe tungataila ukuti Yeova akauvwa mapepo.—Yoa. 11:41, 42; Masa. 65:2.

14, 15. (a) Uzye ukupepela pali cino tukulonda kungatwazwa uli? (b) Uzye amapepo yavwile uli nkazi umwi ukukomya ucuza wakwe na Yeova?

14 Nga mukupepela sile pali cino mukulonda, mungamanya ukuti Yeova ata-asuka ipepo linu, nanti icakuti limwi citanga ciloleke ukuti ata-asuka. Cii cingalenga mwalola ukuti Yeova uwa cumicumi. Nupya lino mukunena Yeova ivili umu mwenzo, angapalama kuli mwemwe.

 15 Elenganyini pali vino Kathy wacisile. * Ataipakizyanga ukuomba umulimo wakusimikila, nanti icakuti waombanga lyonsi. Walanzile ati: “Ntatemilwe umulimo wa kusimikila. Nupya icacumi ntautemilwe. Lino natiile incito ino naombanga, eluda wankomelizye ati uli nu kuya painiya wa nsita yonsi; nupya wampezile na fomu wa kulengelapo upainiya. Napingwilepo ukutandika upainiya, nomba napepanga cila wanda ukuti Yeova angazwe, intemwe umulimo wa kusimikila.” Uzye Yeova waswike ipepo lyakwe? Walanzile ati: “Lyene ndakai indi umu mwaka wakwe citatu kufuma pano natandikile upainiya. Apa mulandu wakuti nkasumba insita ikulu sana umu mulimo wa kusimikila nupya nkasambilila kuli ya nkazi yanji, lyene namanya ivya kusimikila. Ndakai, naatemwa sana umulimo wakusimikila. Ni cisuma sana icakuti, ucuza wane na Yeova wakoma sana ukucila vino wali mpiti.” Amapepo yazwile Kathy ukuya na ucuza wampomvu na Yeova.

UKUSIILA VYONSI MULI YEOVA

16, 17. (a) I vyani vino tungacita pakuti ucuza witu na Yeova utwalilile nupya wakulilako? (b) Iintazi ci ikalamba ino tulalandapo umwi sambililo ililondelilepo?

16 Tulinzile ukutwalilila ukulakomya ucuza witu na Yeova lyonsi. Nga tukulonda Yeova nawe apalame kuli sweswe, tulinzile ukutandikilapo ukupalama kuli aliwe. Fwandi Lekini, lyonsi twalanzyanya na Leza ukupitila umu kusambilila Baibo alino nu kupepa kuli aliwe. Nga twacita vii, ucuza witu na Yeova ulaakulilako nupya cilatwavwa ukucimvya intazi zino tulaya nazyo.

Tulinzile ukulondesya ukukomya ucuza witu na Yeova lyonsi (Lolini amapalagalafu 16, 17)

17 Nomba limwi cingatala sana, ndi cakuti intazi zino tukweti zitaakusila nanti twapepa. Apa nsita ya musango uo, utailo witu muli Yeova ungatonta. Tungatandika ukutwisika ngi cakuti Yeova akauvwa amapepo itu nanti ngi cakuti akatulola ukuti sweswe ya cuza yakwe. Uzye tungacita uli ndi caaya vivyo, nu kutaila ukuti ucuza witu na Yeova uwa cumicumi? Isambililo ililondelilepo lilalanda apa mulandu uu.

^ par. 2 Ucuza walondololwa ukuti, a viivi vino antu yaili yakayuvwa nu kucitila umuze. Fwandi yoili kwene yakacita ivyakulanga ukuti aacuza.

^ par. 15 Aasi mazina yao.