Aomvi yakwe Leza yamwi yaaomvyapo amazwi ndi yaa aali papela lino yakulanda pa kuzana uwa kutwalana nawe. Nanti ciye vivyo, yaamanya amazwi yakukomelezya yano umutumwa Paulo walanzile akutwalilwa sile muli “Klistu”—ukusoka kuu, kulinzile ukwazwa Aina Klistu yonsi. (1 Kol. 7:39) Uzye u mulandu ci uno yakaomvezya amazwi yamusango uu?

Yaayo aakaomvya amazwi yamusango uu yangaayuvwa ukuti yankazi aasimbe yaavula ukucila aina asimbe. Vikwene avino caaya umu mpanga izingi. Elenganyini pali vii viili: Uku Korea, ndi mwapenda ya Nte 100 asimbe, ala 57 aankazi na 43 aina. Uku Colombia nako kwafumile lipoti yakuti ya Nte aingi aaya uku mpanga iiyo aankazi, aina aanono sile.

Umu mpanga zimwi, icikavulunganya ivintu icakuti avyazi aasi yakapepa yakalifya impiya izingi sana pa kutwalizya ana yao, na ci cikalenga ukuti catalila sana aina aatakwata impiya izingi. Ndi nkazi aatali atwalwe welenganya pa vya musango uu, angelenganya ukuti ukuzana umwina muli “Klistu” kutanga kucitike. Limwi anguzya ati, “Uzye i cumicumi ningazana uwakutwalana nawe pa Ina Klistu yanji?” *

Ndi cakuti namwe mwelenganyapo vivyo, mwaiusya ukuti Yeova wamanya ivikamucitikila. I cumicumi wamanya vino mukayuvwa.—2 Mila. 6:29, 30

 Lelo, Yeova watuneena ukupitila muli Baibo ukuti tulinzile ukutwala nanti ukutwalilwa sile muli Klistu. U mulandu ci? Pano wamanya ivingazipila antu yakwe. Asilonda sile ukucingilila antu yakwe uku ntazi izingayaponela pa mulandu nu kukanasoolola ningo ivyakucita, lelo akalonda nu kuti yaye ni nsansa. Umu manda yakwe Neemiya lino aYuda yatwalanga anaci aataapepanga Yeova, Neemiya walanzile pali vino Solomoni wacisile iviipe. Nanti icakuti “Leza watemilwe” sana Solomoni, “anaci ainamasi yalenzile kuti aifye.” (Neem. 13:23-26) Fwandi pakuti ivintu viye ningo, Leza waneena aomvi yakwe ndakai ukutwalana sile na yakapepa ya cumi. (Masa. 19:7-10; Eza. 48:17, 18) Aina Klistu ya cumi yakataizya sana pali vino Leza akayasakamala nupya yakalondela vino akayaneena ukucita, pano u wamanya sana ivingayazwa. Fwandi lino yakumutontela, ala yakwiusya ukuti a Kateeka wa Papelapela.—Mapi. 1:5

Ukwaula nu kutwisika, musiilonda kuti munyepelelwe ukwi “yoko” ilililyonga nu muntu aangamufumya kuli Leza. (2 Kol. 6:14) Aina Klistu aingi ndakai yakauvwila vino Leza akayanena nupya yaasininkizya aineco ukuti ukucita vivyo i cintu icisuma sana. Nomba yamwi yaasoololapo ukukana uvwila Leza.

Magi, * nkazi aakaikala uku Australia, walondolwile ivyacitiike lino watandike ukwizizyanya nu monsi aasi kapepa ati: “Napuswanga uku kulongana imiku iingi pakuti sile inje pamwi nawe. Ukapepa wane wawelile sana pansi.” Latana uwa ku India watemwanine nu mulumendo wino yaasambililanga yonsi uku sukulu uwatandike ukusambilila Baibo. Nomba, umukuya kwa nsita umulumendo wiyo wizile alanga ukuti cino walondanga u kutandika ukwizizyanya na nkazi. Cii calenzile ukuti nkazi afume umu cumi atandika ukupepa kuuze pakuti sile atwalwe.

Muuze wino tungalandapo a Ndengu uwa ku Cameroon. Wali ni myaka ya kuvyalwa 19 lino watwazilwe. Lino yatatala yatwalana, umonsi wamuneenyile ukuti u muntungwa ukutwalilila ukupepa kuno akapepa. Nomba lino papisile sile imilungu iili kufuma pano yatwaliine, iya wamulesizye ukuya uku kulongana. Nkazi walanzi ati: “Natandike ukuya nenga nu kulila sana. Nizile iniluka ukuti natinduvyanya sana. Nayuvwanga sana ulanda nu kulanguluka.”

Ukuya kwene, asi yonsi aakaiza iyasenuka nu kuya ankalwe nu kuta ukulangulukilako ya wao. Lelo, nanti icakuti mutangaya ni ntazi zya musango uu lino mwatwalwa uku muntu aatataila, uzye ucuza winu na Tata winu uwa mwiyulu ungaya uli? Mungayuvwa uli ukumanya ukuti mutuuvwilile ukusoka kusuma kuno wamupeezile ukwakulanga ukuti akamusakamala? Nupya icicindame sana i cakuti, uzye Yeova anguvwa uli pali vino mwapingula ukucita?—Mapi. 1:33.

Aina na yankazi umu nsi yonsi yangazumilizya ukuti ukutwalilwa muli “Klistu” sile ali cintu cisuma sana. Yaayo aatacili yatwale nanti ukutwalwa yakalondesya ukuzanzya Leza lino yaitemelwa ukutwalana nu muntu umulinge pali yakapepa yakwe Leza. Michiko uwa ku Japan aankazi umusimbe wino yalupwa yapatikiizye ukuti atwalwe uku monsi aatataila. Lino walwisyanyanga ni ntazi ii, walolanga kuno auze umu cilongano yakutwalwa uku ina. Walanzile ati: “Natwalilile ukuiusya ne mwineco inti vino Yeova a ‘Leza wa nsansa, NW,’ cisipiliula ukuti pakuti tuye ni nsansa suka sile twatwalwa nanti foo. Nupya nazumila ukuti Leza akatupeela vyonsi vino tukalondesya. Fwandi nanti tutanga tuzane uwakutwalana nawe na lino tukulondesya ukutwalwa, cikazipa sana itutwalilila ukuya asimbe apa nsita iiyo.” (1 Tim. 1:11) Umukuya kwa nsita, Michiko watwazilwe uku mwina umusuma sana, nupya akauvwa ningo sana ukuti walolezile.

Aina yamwi nayo yalolezile pakuti yazane akutwalana nayo aliinge. Bilu aakaikala uku Australia waya pa ina yaayo. Walondolwile ukuti insita zimwi wakumbwanga anaci aasi yakapepa. Lelo, ataalekanga kuti yauvwana sana. U mulandu ci? Atalondanga ukuti atandike ukunyepwa ukwi “yoko ilililyonga na aatataila.” Pa myaka iingi iyapisilepo, watemilwepo yankazi yamwi anono sile,  nomba yankazi yaayo yene yatamutemilwe. Bilu walolezile pa myaka 30 lino atatala wazana nkazi umulinge. Bilu walanzile ati: “nsilanguluka nanti panono.” Walondolwile ukuti: “Nkayuvwa ukuti naapalwa pano tukaya umu kusimikila sweili, tukasambilila Baibo capamwi, nu kupepela Leza capamwi. Nkauvwa ningo ukwizizya pamwi na yacuza yakwe mamane pano yonsi aakapepa yanji yakwe Yeova. Tukaomvya ivisinte vya muli Baibo pakuti icupo citu ciye ningo.”

Uzye i vyani vino mungacita lino mwasiila vyonsi pali Yeova? Conga cino mungacita u kwelenganya pa mulandu uno mutaatwalila nanti ukutwalwa. Ndi cakuti mwazana ukuti umulandu uli pali vino Baibo ikalanda ukuti mulinzile ukutwalilwa “sile muli Klistu,” mulinzile ukutasiiwa pa kucindika isunde lino Leza watupeela. Mwaiusya ukuti Yeova akatemwa sana ndi mukuuvwila vino watuneena muli Baibo. (1 Sam. 15:22; Mapi. 27:11) Mungatwalilila ‘ukutuula macuzi inu’ kuli Leza ukupitila umwi pepo. (Masa. 62:8) Lino mukupepa kuli Yeova lyonsi ukufuma pansi ya mwenzo, ucuza winu nawe ulakomelako. Nupya ucuza winu na Leza ulatwalilila ukukomelako cila wanda lino mukutwalilila ukulwisyanya na mezyo. Mwaiusya ukuti Leza wa Papelapela watemwa aomvi yakwe yonsi acisinka nupya namwe kwene wamutemwa cuze. Akalonda ukumupeela ivikalondekwa na vino mukalondesya umu mwenzo winu. Ataalaya umuntu nanti wenga ukuti ali nu kumupeela uwakutwalana nawe. Lelo, ndi cakuti mukalondesya ukuzana uwakutwalana nawe, Leza wamanya ningo vino angamwazwa pali vino mukayuvwa.—Masa. 145:16; Mate. 6:32.

Insita zimwi mungaayuvwa wakwe kalemba wa masamu Davidi, uwalanzile ati: ‘Kalauka njasuke we Yeova, amaka yane yatiyasila. Utafisa usyu wako kunondi.’ (Ps. 143:5-7, 10) Pa tusita twa musango uwo, mwapeela Tata winu uwa mwiyulu insita pakuti amulanga ivyakucita. Mungacita vivyo lino mukuwelenga sana Izwi lyakwe nu kwelenganya sana pali vino mukuwelenga. Mulamanya vino amasunde yakwe yaaya, nupya mulamanya vino wavwilizye antu yakwe aaliko mpiti. Ndi mukukutika kuli aliwe, mulaalondesya ukumuuvwila lyonsi.

I cani cuze icingazwa ukuti imyaka inu iya usimbe iziipe sana? Mungaomvya insita ino mucili asimbe ukuombesya pakuti muye ni miyele ya kwiluka, ukuya na ukapekape, kuombesya, ukuya umuntu umusuma, ukuya sana kapepa wakwe Leza, nu kutemwikwa uku yantu. Imiyele ii ali ino ikalondekwa sana pakuti muye ni nsansa. (Utan. 24:16-21; Luti 1:16, 17; 2:6, 7, 11; Mapi. 31:10-27) Inkoleelo mwalonda Uwene lino mukuombesya umu mulimo wakusimikila nu kuomba imilimo yuze iya Wina Klistu; ukucita vivyo kulalenga mucingililwe. Bilu, uwatalumbulwa mpiti, walanzile pa myaka ino walondanga ukutwala ati: “Imyaka iiyo yapisile zuwa sana! Naomvizye insita iiyo ukuombela Yeova muli upainiya.”

I cumicumi, ukutwalilwa nanti ukutwalila sile muli “Klistu” kwacindama na ndakai kwene. Ukuvwila amazwi yaa kungalenga kuti mwacindika Yeova nu kuya ni nsansa amanda pe. Baibo ikaati: “U wansansa umuntu aakatiina Yeova, uwatemwa sana amasunde yakwe. Umu ng’anda yakwe mwaya iviya ivya muteengo, nupya uwololoke wakwe ulatwalilila amanda pe.” (Masa. 112:1, 3) Fwandi mwaezya na maka ukuvwila isunde lyakwe Leza ilya ukutwalila nanti ukutwalilwa sile muli “Klistu.”