Skip to content

Muye pa utantiko wa vilimo

 BAIBO IKA-AVWA ANTU UKUSENUKA

Nali Uwa Cipyu Nupya Umunkalwe

Nali Uwa Cipyu Nupya Umunkalwe
  • UMWAKA UNO WAVILWE: 1974

  • KUNO WAVYALILWE: MEXICO

  • VINO UMI WAKWE WALI: WALI MUNKALWE, NUPYA UMANGA SANA ANTU

VINO NAALI:

Navyalilwe umu Ciudad uku Mante, umusumba usuma uwa Tamaulipas, ku Mexico. Antu aakaikala umu musumba kwene uu yaya na ukapekape ni cikuuku. Nomba icaulanda i cakuti, umu ncende ii mwacitikanga iviipe sana pa mulandu wakuti mwali vipondo.

Umu lupwa lwitu aonsi twaya 4, nupya nene indi wakwe ciili. Avyazi yane yambatizye umu Ceici cakwe ya Katolika nupya lino papisile insita nailunzile umwi umba lyakwe yakiimba amu ceici kwene cii. Nalondanga ukuzanzya Leza pano natiinanga sana ukupingulwa nu kupya umu moto wa pe.

Lino nali ni myaka 5 yatata yafumile pa ng’anda iyatusya fwenga. Na cii calenzile ukuti inje sana nu ulanda nupya kwati pasi na vino ningacita. Kwene cantalile sana ukuzumila cino yatata yatusiliile pano twayatemilwe sana. Yamayo yatandike ukuomba sana pakuti yatulondela ivyakulya.

Natandike ukupuuka ku sukulu, inja mu kucina na anji yano yaali aikolo pali nene. Anji kwene yaa, yansambilizye ukutukana, kupeepa, ukwiya alino nu kulwa. Lyene vino natemilwe ukuya pa nkoleelo, nasambilile ukulwa ulwete lwa makofi, lwa kutamana ivinzamba, nu lwa kupantana alino nu lwa kuomvya ivyanzo. Icumi kwene nizile inja umunkalwe. Nupya insita izingi nalwanga nu lwete lwakupikana imfuti, icakuti ilingi nayanga ni vilonda yasya yansumba nu mu museo. Uwanda umwi lino yamayo yanzanyile ala yatiyansumba umu museo, yaali sana nu ulanda; avino yankatwisye iyansimwizya ku cipatala!

Uwanda umwi ala indi ni myaka 16, cuzane Jorge watutandalile ku ng’anda. Watunenyile ukuti wali Inte Yakwe Yeova nupya walondanga ukutunena ilyasi limwi ilicindame. Avino watandike ukutulondolwela vino wazumilamo, ala akuomvya Baibo. Pa nsita ii ala ntaatala na welengapo Baibo, nupya natemilwe sana ukumanya izina lyakwe Leza alino nu kulonda kwakwe. Jorge watunenyile ukuti twasambilila Baibo nawe. Naswe twazumile.

VINO BAIBO YANGAVWILE UKUSENUKA:

Natemilwe sana lino nasambilile icumi ukuti icisambilizyo cakuti umoto wape, cisi ca muli Baibo. (Masamu 146:4; Kasambilizya 9:5) Lino nasambilile  sile vivyo, natiile ukutiina Leza. Lelo natandike ukulola Leza ukuti a Tata uwaya nu kutemwa wino akalonda ivisuma vyacitikila ana yakwe.

Lino nasambililanga Baibo, nizile indola ukuti nalondekwanga ukusenuka umu miyeele. Nalondekwanga ukuya umuicefye alino nu kuta unkalwe. Kusunda ukwangavwile aeku kukazanwa pali 1 Kolinto 15:33, apakalanda ukuti “yacuza aipe yakaonona miyele isuma.” Namanyile ukuti pakuti insenuke mu miyele, nalondekwanga ukuta ukucina na antu aali ni miyele iipe. Fwandi natandike ukucina na Ina Klistu acumi yakapepa yanji, pano yene nga yapusana yasiilwa, lelo yakalondela ivyalembwa muli Baibo.

Ukusunda nakuze ukwangavwile kukazanwa pali Loma 12:17-19. Pakati: “Umwi ndi wamucitila ciipe, namwe mutamucitila ciipe. . . . Citini vyonsi vingacitwa pakuti mwikale mu mutende na antu onsi. Mutalandula, . . . Pano calembwa mu malembelo vino Leza wati: ‘Ndalandula, nupya ndayawezezya vicitwa vyao.’” Acino nalekiile Yeova ukuti aaliwe alafumyapo ulufyengo insita yakwe ndi yafika. Natandike ukuta ukuya nu unkalwe.

Ntalilila ivyancitikiile uwanda umwi usiku lino nayanga uku ng’anda. Akaliumba ka yalumendo yano nacinanga nayo kanzanzile, nupya wino yasonsile ukuya umukalamba wao, wizile antimbula pitundu, alino apunda ati, “Ale icingilile tuvwe!” Papo kwene napefile kuli Yeova umu mwenzo, pakuti angavwe ukuzizimizya intazi ii. Nanti icakuti nakweti amaka akulandula, nizile imfumapo sile. Apa wanda uwalondeliilepo, twizile itukomenkana na wiya kwene wino wantimbwile. Nizile nuvwa icipyu sana nu kulonda kuti ndandule, lelo nizile impepa kuli Yeova pakuti angavwe ukuzizimizya. Nizile nzunguka sana ivyacitike, umonsi kwene wii wizile ampalamila nga lino alanda ati: “Njeleleko pali vino vyacitike mutondo usiku. Nani kwene nkulondesya ukuti inje wako wewe. Nkulonda kutandika kusambilila Baibo.” Ala mwandini nayuvwile uwa nsansa sana pali vino ntalandwile! Nupya nkataizya, pano twatandike ukusambilila Baibo nu muntu kwene wii.

kNomba, icaulanda i cakuti, ya lupwa yane yatatwalilile ukusambilila Baibo. Lelo, nemo natwalilile ukusambilila nupya ntalesile icili consi nanti aaliwensi ukundesya ukusambilila. Namanyile ukuti ukucinila pamwi na antu yakwe Leza kwali nu kungavwa ukukanaya sana namasakamika nu kukwata ulupwa luno nalondanga. Avino natwalilile ukulunduluka, nupya umu 1991, nawatiziwe inja Inte Yakwe Yeova.

UKUSENUKA KWANGAVWA SANA:

Baibo yangavwa sana ukusenuka nupya nata unkalwe ni cipyu. Lyene pa nsita ii nkasambilizya antu yonsi ilandwe lyaya muli Baibo ilingayavwa ukuya nu mutende. Ncili nkaomba umulimo wakusambilizya antu Baibo nupya ipapita ni myaka 23.

Insita imwi naomvileko na pa ofesi lya Nte Zyakwe Yeova umu Mexico. Paapa kwene apano nizile indola na Claudia, mama wacance umwina Klistu, nupya twizile tutwalana umu 1999. Icumi cumi nkataizya kuli Yeova pa kumpolelela ukuzana mama wa cumi!

Twatandike ukuombela umu cilongano cimwi umu Mexico kwene icikaomvya Ululimi Lwa Uciulu, muno twavwilizyanga ya ciulu ukusambilila pali Yeova. Lyene apa cisila iizile iyatutuma ku mpanga yuze ku Belize akuno twaile umu kuomba umulimo wakusambilizya antu Baibo. Nanti icakuti twangupazya uwikalo, twakwata vyonsi vino tukalondekwa pakuti tuye ni nsansa, nupya tusilondekwa ni cili consi.

Yamayo nayo kwene izile iyatandika nupya ukusambilila Baibo. Na tatalenzi na mamakwe alino na ana, pa nsita ii a ya Nte Yakwe Yeova. Na yamwi kwene aali yacuza yane mpiti, yano nanenyileko ilandwe lya Wene, ndakai a ya Nte Yakwe Yeova.

Icaulanda icakuti, ya lupwa yamwi yafwa pa mulandu wakuti yatasenwike mu miyeele yao iya unkalwe. Nani kwene ndi cakuti ntasenuka nga nafwa kwati aaliyo. Nkataizya sana kuli Yeova apakuya cuza wakwe alino na pakuya cuza wakwe yakapepa yakwe, pali vino yaali ni cikuuku pakuti nsambilile ukulondela masunde amuli Baibo.