Skip to content

Muye pa utantiko wa vilimo

Mungacita Uli Pakuti Muye nu Umi Usuma Kuluta Pali Uu?

Mungacita Uli Pakuti Muye nu Umi Usuma Kuluta Pali Uu?

VINO antu yakaikala ndakai asi ali vino Leza walondanga foo. Walondanga ukuti mu nsi muzuule antu aakacindika Uteesi wakwe pakuti yaipakizya kutungululwa na aliwe nu kulangizya miyele ino wakwatako. Walondanga ukuti antu yaya ni nsansa lino yali capamwi, kuombela pamwi nu kulenga insi ukuya paladaise.

LEZA WALAYA KUZIFYA UMI WA ANTU PANO NSI KULINGANA NA KULONDA KWAKWE

  • “Wene akalesya inkondo pano nsi yonsi.”Masamu 46:9.

  • “Insita yatifika ya konona yao akaonona insi!”Umbwilo 11:18.

  • “Patalaya nanti wenga alailizyanya apakulwala.”Ezaya 33:24.

  • “Na asololwe yane yalasyukila vino yailimile aeneco.”Ezaya 65:22.

Uzye mausowelo yaa yalafikiliziwa uli? Leza wasonta Umwanakwe, Yesu ukuya Umwene mu uteeko wakwi yulu uumalilike ukuti akateeke insi. Baibo ikaama uteeko uu ukuti Uwene wakwe Leza. (Danieli 2:44) Baibo ikalanda pali Yesu ukuti “Leza alamupeela uwene . . . , nawe alaya Umwene.”—Luka 1:32, 33.

Lino Yesu wali pano nsi, wacisile vizungusyo ivingi ivyalangililanga vino ivintu vilazipila antu uku nkoleelo lino alateeka.

YESU WALANGILILE IVISUMA VINO ALI NU KUCITILA ANTU YA CUVWILA UKU NKOLEELO

  • Wapozizye indwala zya misango yonsi, ni ndema.Mateo 9:35.

  • Wamyalalike cipupu pali yemba, kulangilila vino alacingilila antu ku mazanzo akaletwa na vino Leza wapanga. Mako 4:36-39.

  • Walisizye antu mazimbi, kulangalila vino alaapeela antu vino yakalondeka.Mako 6:41-44.

  • Wasangwile amanzi ukuya waini pa winga, ku kulangilila vino alaazwa antu.Yoane 2:7-11.

Uzye mungacita uli pakuti mukaipakizye umi usuma uno Leza akalonda antu amutemwa yaipakizya? Kwaya vino mulinzile ukucita. Baibo ikalanda ukuti “impongolo yakwingilila ku umi iifyenkane. Nu museo wakuilamo wene watala kulondela, cakuti antu akauzana anono sile.”—Mateo 7:14.

KUZANA INZILA YA KU UMI USUMA

Uzye museo wa ku umi ali cani? Leza walanda ukuti: ‘Nene indi Yeova, Leza winu, wiyo akamusambilizya vyakuti vyamuzipila, kuti ivintu vimuzipile. Nkamutungulula umu nzila ino mulinzile kupita mwenemo.’ (Ezaya 48:17) Nga mukupita mu museo uu mulaya nu umi.

Yesu walanzile ukuti: “Nene ndi nzila, ni cumi, nu umi.” (Yoane 14:6) Kuzumila icumi cino Yesu wasambilizyanga nu kukolanya vino wacitanga kungatwazwa kupalama sana kuli Leza nupya umi witu ungaya ningo.

Uzye mungacita uli pa kuzana inzila ya ku umi? Kwaya mipepele iingi, nomba Yesu watucelwile ukuti: “Asi muntu wensi akangama ati, ‘Mwene,  Mwene’ alingila mu wene wa mwiyulu, suka sile yao akacita kulonda kwakwe Tata uwa mwi yulu.” (Mateo 7:21) Walanzile nu kuti: “Mulayamanyila ku milimo yao.” (Mateo 7:16) Baibo ingamwazwa kumanya kupepa kwa cumi.—Yoane 17:17.

Uzye mungalondela uli inzila ya ku umi? Mu kulondela inzila ii mwaya ukumanya Kapeela wa umi. A weni? Uzye a weni izina? Uzye waya uli? I vyani vino akatucitila? Uzye akalonda twacita vyani? *

Leza akalonda antu ukuti yaomba, kulya, kucina alino nu kukwata ulupwa. Tungamanya Kaumba witu nu kuya ya cuza yakwe. Tungalanga ukuti twamutemwa ndi cakuti tukucita vino akalonda. Yesu watiile: “Umi wa pe uwakuti antu yamanye wewe, Leza wenga sile uwa cumi.”—Yoane 17:3.

YEOVA AKAMUSAMBILIZYA “IVYA KUMUZIPILA” KUPITILA MULI BAIBO.​—EZAYA 48:17

CINTU CA KUTANDIKILAKO CINO MULINZILE UKUCITA

Pakuti tusambilile kulacita vino Yeova akalonda cikalondekwa kusenuka. Kucita vii kungatala. Nomba kulanda sile cisinka kusenuka kungatwazwa sana nupya ali nzila ya mpomvu iingatutungulula ku umi. Pakuti muzane masuko ku mauzyo yano antu aingi yakauzya pali Leza, ya Nte yakwe Yeova yakaitemelwa kusambilila Baibo na antu uwila sile pa nsita ni cifulo ivingamuzipila. Mungalanda naswe kuomvya webusaiti ya www.jw.org.