Skip to content

Muye pa utantiko wa vilimo

Impolelwa ino Leza watupeela iyalenga ukuti tukakwate umi wa manda pee, ali wila ukulu kuluta mawila yonsi

LYASI LYA KUTANDIKILAKO | U WILA CI USUMA UWALUTA MAWILA YONSI?

U Wila ci Usuma Uwaluta Mawila Yonsi?

U Wila ci Usuma Uwaluta Mawila Yonsi?

“Wila usuma onsi ni cakupeelwa cifumaluke consi cikafuma kwiyulu, kuli Tata, Kaumba wino uwaumvile ivya mwiyulu vyonsi vino vikapeela luswepo.” (Yakobo 1:17) Ilembelo lii likalanda pali ukapekape wakwe Tata witu Yeova Leza. Lelo kwaya uwila ukulu cuze uwaluta mawila yonsi yano Leza watupeela. U wila ci uwo? Amazwi yakwe Yesu amanyikwa sana aaya pali Yoane 3:16 yakalanda ukuti: “Pano acino Leza watemilwe amu nsi nga apeela Mwana wakwe wino uwavilwe wenga, kuti wensi wino wataila munoli atakalowe, lelo aye nu umi wape.”

Uwila uno Leza wapeezile, u Mwana wakwe uwavyalwa wenga—ali wila uwaluta mawila yonsi yano twapokelelapo, pano uwila uu walenga tukululwe kufuma ku maifyo, kukota alino ni mfwa. (Masamu 51:5; Yoane 8:34) Nanti cakuti tungezya na maka uli, pasi vino tungacita pakuti tuikulule sweisikulu. Lelo pa mulandu nu kutemwa kwakwe Leza, watupeezile icalondekwanga pakuti tukululwe. Yeova pa kutupeela umwanakwe Yesu Klistu ngi mpolelwa, apakuti atukulule, walenga ukuti tukwate upalilo wa kwikala manda pee. Uzye twakululwa uli? U mulandu ci uno twalondekwanga uku kululwa? Nupya i visuma ci vino tungakwata pa mulandu wakuti twakululwa?

Katulangilile vino cikasenula uku kululwa, tungati u mutengo ungalipilwa pa kuwezya icintu icaticiponga nanti ukulipila pakuti umuntu akululwe kufuma mu uzya. Baibo ikalondolola ukuti avyazi itu akutandikilapo Adamu na Eva yaumvilwe amalilike, nupya yakweti nu upalilo wa kwikala amanda pee mu paladaise pa mpanga ya pansi kumwi na ana kwene yano yali nu kuvyala. (Utandiko 1:26-28) Nomba ica ulanda icakuti yaponzizye upalilo uu lino yasoolwilepo ukukana uvwila Leza—izile iyayembuka. I vyani vyafumilemo? Baibo ikaasuka ukuti: “Iifyo lingile muno nsi pa mulandu wa muntu wenga, nga ni iifyo lyakwe ilyaleta imfwa. Caleka, imfwa nayo yasalangine mu antu yonsi pano antu yonsi iifizye.” (Loma 5:12) Mu cifulo cakuti yavyale ana amalilike, Adamu na Eva yambukizye ana yao iifyo ni cafumilemo imfwa.

Pa mulandu wakuti twizile tuya ayembu, twalondekwanga ukukululwa, fwandi icali nu kulipilwa pakuti tukululwe calondekwanga ukulingana ni caponzile. Lino Adamu wayembwike uku mufulo, wifizye, ni cafumilemo icakuti ataali nu kukwata umi umalilike. Baibo ikatunena ukuti cii calenzile ukuti na ana yakwe Adamu kwene yapyane iifyo ni mfwa. Fwandi calondekwanga umuntu muze mumalilike, kulikuti Yesu, ukuti apeele umi wakwe pakuti tukululwe. (Loma 5:19; Efeso 1:7) Pa mulandu wa kutemwa kwakwe Leza, watupeezile mwanakwe kuti aize atufwile pakuti tukwate upalilo wa kwiza ipakizya umi uno Adamu waponzizye uwa kwikala manda pee muli paladaise pa mpanga ya pansi.—Umbwilo 21:3-5.

Nga twalolekesya sana pali vino imfwa yakwe Yesu yacita, tutanga tutwisike ukuti ilalenga tukaipakizye umi wa manda pee, fwandi u wila ucindame ukuluta. Pakulangizya ukuti tukataizya pa “cakupeelwa cifumaluke,” katulole vino uwila uu wacindama sana lino tumalanda pa vintu 4 vino twalanzilepo umu cipande icafumileko.

 Vino twalondanga. Swe yantunze tukalondesya sana ukwikala manda aingi pakuti tumanye ivintu iviliza. (Kasambilizya 3:11) Nanti icakuti palwitu tutanga tukwanisye, imfwa yakwe Yesu ilalenga ukuti cii cicitike. Baibo ikatunena ukuti: “Pano malipilo yi ifyo, imfwa. Lelo uwila wakwe Leza umi wape muli Klistu Yesu Mwene witu.”—Loma 6:23.

Vino twalondekwanga. Antunze yataali nu kuikulula aineco. Baibo ikalanda ukuti: “Pano umutengo wakulipila apa kuituula, wakulisya ukuluta umu cipimo.” (Masamu 49:7, 8) Fwandi pataali vino twali nu kucita sweineco pakuti tuikulule ukufuma kwi ifyo ni mfwa. Lelo “pa mulandu wa wila wa cikuku cakwe Leza, wene akayalenga kuya aololoke kupitila muli Klistu Yesu,” fwandi Leza watupeezile vino twalondekwanga.—Loma 3:23, 24.

Pa nsita isuma. Baibo ikatunena ukuti: “Lelo Leza watulanga vino watutemwa, pano lino twali tucili yakaifya Klistu watufwilile.” (Loma 5:8) Pa mulandu wakuti Yesu watufwilile “lino twali tucili yakaifya,” imfwa yakwe Yesu iyaya wa mpolelwa, ikalangizya ukutemwa kukulu kuno Leza wakwata asi mulandu nu kwifya kwitu. Nupya ikatupeela nu usininkizyo wakuti ivintu vilazipa nanti icakuti ndakai tukacula uku vipe ivyafuma mu kwifya.

Ukalangilila kutemwa. Baibo ikatunena icalenzile kuti Yeova atupeele umwanakwe ukuya impolelwa, ikati: “Leza watulanzile kutemwa kwakwe pakutuma Mwana wakwe wenga sile muno nsi, pakuti aliwe atupeele umi. Kuu kuli kutemwa kwakuti asi sweswe twatemwa Leza, lelo pano wene uwatutemilwe.”—1 Yoane 4:9, 10

Uzye mungalanga uli ukuti mukataizya pa wila uu ukulu cuze? Iusyini ukuti amazwi yakwe Yesu aaya pali Yoane 3:16 yakalanda sile pa yantu yayo aakataila munoli ukuti, aatalalowa. Baibo ikalondolola utailo ukuti a “maka akuntatwisika vintu vino tukupaalila.” (Ayebulai 11:1) Pakuti tutaile, tulinzile ukumanya ningo vino tukutaila. Acino tukumukomelezya ukuti mwasambilila pali Yeova Leza, kapeela wa “cakupeelwa cifumaluke” alino nu kulondelezya vino mungacita pakuti mukaipakizye ukwikala manda pee pano nsi pa mulandu na vino imfwa yakwe Yesu yacita.

Mungasambilila vyonsi vii ndi mwaya pa webusaiti itu iya www.jw.org. Ya Nte Yakwe Yeova yangatemwa sana ukumwazwa. Tukutaila ukuti lino mukusambilila pa visuma vino uwila uu waleta, cilalenga muvwange nu luzango amazwi yakuti “Nkataizya Leza wino akacita cii muli Yesu Klistu Mwene witu!”—Loma 7:25.