Skip to content

Muye pa utantiko wa vilimo

Uzye Mwamanyapo Uli?

Uzye Mwamanyapo Uli?

Uzye cilangililo cino Yesu walanzile cako ‘tusimbwa tunono’ wavwanzile nu musalula?

A child with a puppy, Greek or Roman statuette (first century B.C.E. to the second century C.E.)

Pa nsita imwi lino Yesu wali ukunzi ya musumba wa Loma uwaya mu citungu ca Silya, mwanaci umwi Mugiliki waile kuli aliwe ukuti alenge uwazwilizyo. Mu mazwi yano Yesu walekelizye pa kwasuka walanzile pali vino antu ataali Ayuda yakoline na ‘tusimbwa utunono.’ Mu masunde yakwe Mose, yasimbwa yali inyama zimwi izikowele. (Aina Levi 11:27) Uzye Yesu wasaalwile umwanaci wiya ataali Muyuda alino na antu yauze ataali Ayuda?

Awe foo. Cisinka cino Yesu walondanga alondezi yakwe ukumanya icakuti, walinzile ukutandikilapo ukwazwa Ayuda. Fwandi, wanenyile mwanaci Mugiliki ukuti: “Cisi cisuma kutoola vyakulya vya ana nu kusumbila yasimbwa.” (Mateo 15:21-26; Mako 7:26) Ku Agiliki na ina Loma, simbwa cali iciteekwa cimwi cino yatemilwe sana nupya yacisunganga ningo umu ng’anda nupya ana yacinilanga pamwi na tusimbwa. Fwandi izwi lyakuti ‘tusimbwa tunono’ lyali ningo sana, nupya lyalenzile umwanaci wiya ukuvwa ningo vino Yesu walandangapo. Lyene umwanaci waswike Yesu ukuti: “Endi, Mwene na yasimbwa kwene yakalya vilakasi vya vyakulya vya ana vino vikapona pa cipango cakwe wino uwayateeka.” Yesu wataizye sana umwanaci wiya nupya waile apozya umwanakwe—Mateo 15:27, 28.

Uzye Kucelula Kwakwe Paulo Ukwakuti Yatapita Ulwendo Lwa Pa Manzi Kwali Sile Ningo?

Ciwato cikalamba icasendanga iviya (100 C.E.)

Uwato uno Paulo wakwezilemo ala akuya uku Italy, waafilwanga ukupita ningo mulandu nu muza. Lino yatatala yatandika ulwendo luu mutumwa Paulo wacelwileko aali mu wato ukuti yatapita. (Milimo 27:9-12) Uzye cali sile ningo kuyacelula?

Ya kapisya ya mawato yamanyile ukuti kupita pali Yemba wa Mediterranean mu nsita ino kukazuuka sana wali uzanzo. Pakasi kakwe Novemba na pakasi kakwe Maaci, antu yatapitanga pali yemba. Lelo ulwendo luu luno Paulo walandapo lwali nu kuya mu Sepetemba nanti mu Okotoba. Mwi buku limwi (Epitome of Military Science) lino Vegetius umwina Loma walemvile, mu (400 C.E.) walondolola vino cayanga pali yemba ukuti: “Imyezi imwi yazipanga sana, imwi nayo itazipanga, lyene yuze yene awe kutayanga nu kupita pali yemba.” Vegetius walanzile ukuti lwendo lwa pa manzi lwayangako ningo kutandika pa 27 Mei kufika pa 14 Sepetemba lelo injendo zyuze zili kwayanga ukutwisika ukuti kungaya uzanzo, zya kutandika pa 15 Sepetemba kufika pa 11 Novemba nupya kufuma pa 11 Maaci kufika pa 26 Mei. Paulo, wapitanga sana, fwandi afwile wamanyile sana ivingi pa njendo zya pa manzi. Na kapisya wa wato kwene nu mwineco wa wato yamanyile ivyali nu kucitika, lelo yasuzile kucelula kwakwe Paulo. Yasusile iyaundwa.—Mili. 27:13-44.